.jpg)
កម្មករ-កម្មការិនី ពេលចេញពីធ្វើការនៅក្នុងរោងចក្រមួយនៅរាជធានីភ្នំពេញ នាពេលកន្លងមក។ ហេង ជីវ័ន
ភ្នំពេញៈ របាយការណ៍របស់ក្រសួងឧស្សាហកម្ម និងសិប្បកម្មបានបង្ហាញថា នៅក្នុងឆ្នាំ ២០១៩ មានរោងចក្រផលិតកម្មបង្កើតថ្មីចំនួន ២៦៩ នៅក្នុងវិស័យផ្សេងៗដោយកើនឡើង ៥១ ភាគរយ ធៀបនឹងឆ្នាំ ២០១៨។
តួលេខបង្ហាញថា រោងចក្របង្កើតថ្មីក្នុងឧស្សាហកម្មកាត់ដេរកើនឡើងភាគច្រើន ទោះបីក្នុងអំឡុងពេលនោះកម្ពុជារងការគំរាមកំហែងនៃការដកប្រព័ន្ធអនុគ្រោះពាណិជ្ជកម្ម EBA ពីសហភាពអឺរ៉ុបក៏ដោយ។ ទោះយ៉ាងណា មកដល់ពេលនេះសហភាពអឺរ៉ុបបានសម្រេចដកប្រព័ន្ធអនុគ្រោះពន្ធ ២០ ភាគរយ លើទំនិញនាំចេញពីកម្ពុជាទៅកាន់ទីផ្សារអឺរ៉ុបហើយកាលពីថ្ងៃទី ១២ ខែកុម្ភៈ ដែលការអនុវត្តនឹងចូលជាធរមាននៅ ៦ ខែបន្ទាប់។
របាយការណ៍បង្ហាញថា គិតត្រឹមចុងឆ្នាំ ២០១៩ ប្រទេស កម្ពុជា មានរោងចក្រសរុបចំនួន ១ ៧៣០ ក្នុងនោះរោងចក្រកាត់ដេរ វាយនភណ្ឌ ស្បែកជើង សម្ភារធ្វើដំណើរមានចំនួន ១ ០៦៩ រោងចក្រកែច្នៃ និងផលិត អាហារ ភេសជ្ជៈ និងថ្នាំជក់ ១៥៧ រោងចក្រក្រដាស ៥៩ រោងចក្រកៃច្នៃកៅស៊ូ និងប្លាស្ទិក ១៤៣ រោងចក្រកែច្នៃផលិតផលឈើ ៥៤ និងរោងចក្រផលិតផលលោហធាតុចំនួន ១៩៥។
ក្នុងតួលេខនេះបង្ហាញថា នៅក្នុងវិស័យរោងចក្រផលិតទាំងនោះបានផ្តល់ការងារចំនួនជាង ១ លាននាក់ កើនឡើង ៧ ភាគរយ ក្នុងចំណោមនោះ ផលិតកម្មកាត់ដេរ ស្បែកជើង និងសម្ភារធ្វើដំណើរ មាន ៩២៣ ៣១៣ នាក់ បានកើនឡើង ៥ ភាគរយ ខណៈវិស័យផ្សេងទៀតស្រូបយក ១១៧ ៨៦១ នាក់ កើនឡើង ២០ ភាគរយ ធៀបនឹងឆ្នាំ ២០១៨។
ថ្លែងក្នុងកិច្ចប្រជុំប្រចាំឆ្នាំកាលពីថ្ងៃចន្ទលោក ចម ប្រសិទ្ធ រដ្ឋមន្ដ្រីក្រសួងឧស្សាហកម្ម និងសិប្បកម្មបានឲ្យដឹងថា កម្ពុជាក៏បានទាក់ទាញរោងចក្រដំឡើង រថយន្ត និងម៉ូតូ រោងចក្រគ្រឿងបន្លាស់រថយន្ត ឧបករណ៍អគ្គិសនី ការផ្គត់ផ្គង់អគ្គិសនី សម្ភារសំណង់ និងរោងចក្រកសិឧស្សាហកម្មផងដែរ។
លោកថ្លែងថា៖ «បច្ចុប្បន្នខ្ញុំមើលឃើញរោងចក្រថ្មីៗបើកដំណើរការនៅក្នុងប្រទេសយើងជាមួយនឹងតម្លៃខ្ពស់ និងឧស្សាហកម្មបច្ចេកវិទ្យាខ្ពស់»។
លោក លឹម ហេង អនុប្រធានសភាពាណិជ្ជកម្មកម្ពុជាបានប្រាប់ភ្នំពេញ-ប៉ុស្ដិ៍កាលពីថ្ងៃចន្ទថា តាមរយៈនិន្នាការនេះប្រទេសកម្ពុជានឹងទាក់ទាញវិនិយោគិនកាន់តែច្រើន។ លោកបន្តថា វាក៏ជួយក្នុងការបង្កើនការនាំចេញរបស់កម្ពុជាទៅទីផ្សារអន្តរជាតិផងដែរ។ លោកថ្លែងថា៖ «ការកើនឡើងរោងចក្រថ្មីវាបង្ហាញសញ្ញាដ៏ល្អមួយនៃការរីកចម្រើនសេដ្ឋកិច្ចកម្ពុជា ហើយវានឹងអាចបង្កើតការងារកាន់តែច្រើនសម្រាប់ប្រជាជនក្នុងស្រុកផងដែរ»។
លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជាដែលមានសមាជិកជាង ៣០០ បានឲ្យដឹងថា ការវិនិយោគលើវិស័យស្រូវអង្ករបានកើនឡើងផងដែរកាលពីឆ្នាំមុនដោយសារសមាជិករោងម៉ាស៊ីនកិនស្រូវបានបង្កើនសមត្ថភាពឡសម្ងួត និងឃ្លាំងស្ដុកដើម្បីឆ្លើយតបស្របតាមតម្រូវការកាលពីឆ្នាំមុន។ លោកថា៖ «សមាជិកខ្ញុំបានបង្កើនទីផ្សារទិសដៅនាំចេញរបស់ពួកគេ វាបង្ហាញថាអង្ករមានទីផ្សារប្រកបដោយសក្ដានុពល»។
លោក វង្ស៊ី វិសុទ្ធ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុបានឲ្យដឹងនៅក្នុងសន្និសីទមួយកាលពីចុងខែមករាថា លោកទទួលស្គាល់ការកើនឡើងចំនួនរោងចក្រថ្មីនៅក្នុងវិស័យមិនមែនកាត់ដេរ និងទំនិញធ្វើដំណើរបានបង្ហាញសញ្ញាដ៏ល្អនៃការធ្វើពិពិធកម្មសេដ្ឋកិច្ចរបស់កម្ពុជា និងការបង្កើតការងារថ្មីសម្រាប់ប្រជាជនក្នុងស្រុក។
លោកបានថ្លែងថា៖ «មានឧស្សាហកម្ម ២ ផ្សេងទៀតនឹងស្រូបយកការងារកាន់តែច្រើន ទី១ ការកើនឡើងការនាំចេញទៅអាមេរិកនឹងស្រូបយកការងារកាន់តែច្រើន និងទី២ គឺការបង្កើនការងារកាន់តែច្រើនក្នុងឧស្សាហកម្មកាត់ដេរ»។ លោកបន្ថែមថា ការនាំចេញទៅអាមេរិកបានកើនជាង ៣០ ភាគរយ កាលពីឆ្នាំ ២០១៨ និង ៤៧ ភាគរយ កាលពីឆ្នាំ ២០១៩។
ក្រសួងឧស្សាហកម្ម និងសិប្បកម្មបានបង្ហាញកាលពីឆ្នាំមុនថា ការនាំចេញសរុបរបស់កម្ពុជាផ្នែកសម្លៀកបំពាក់ ស្បែកជើង និងសម្ភារធ្វើដំណើរមានតម្លៃជាង ៩,៣២៥ ពាន់លានដុល្លារ កើន ១១ ភាគរយ ធៀបនឹងឆ្នាំ ២០១៨ និងជាង ៣,៣៨៦ ពាន់លានដុល្លារ នៃផលិតផលដែលរួមមានអង្ករ ផលិតផលកសិកម្មផ្សេងទៀត និងកង់ជាដើម៕LA
