ចាប់តាំងពីការកើនឡើងដល់តម្លៃខ្ពស់បំផុតជាង ២ ០០០ ដុល្លារ ក្នុង ១ អោនស៍ កាលពីខែសីហា ឆ្នាំ ២០២០ មាសត្រូវបានជួញដូរនៅក្នុងទំនោរធ្លាក់ចុះ ជាមួយនឹងតម្លៃប្រែប្រួលប្រចាំថ្ងៃជាមធ្យម ៣០ ដុល្លារ។
លោក George Black ប្រធានទីប្រឹក្សាហិរញ្ញវត្ថុនៃក្រុមហ៊ុន ហ្គោលដេន អេហ្វអិកស៍ លីង ឃែភីថល បានចែករំលែកកត្តាដែលជះឥទ្ធិពលដល់ទិសដៅខាងមុខរបស់មាស និងរបៀបដែលអ្នកជួញដូរអាចទទួលបានប្រាក់ចំណេញលើការប្រែប្រួលនេះ។
ចំណុចដំបូងដែលត្រូវពិចារណា គឺអតិផរណាដែលជាការចុះខ្សោយនៃតម្លៃរូបិយប័ណ្ណ។ យោងតាមសេដ្ឋវិទូជាន់ខ្ពស់នៅ the Research Division of the Federal Reserve Bank បានបញ្ជាក់ថា អត្រាអតិផរណាសម្រាប់រយៈពេល ១០ ឆ្នាំ បច្ចុប្បន្ននេះ គឺស្ថិតនៅក្នុងកម្រិតខ្ពស់រយៈពេល ៥ ឆ្នាំហើយ។
នេះមានន័យថា តួអង្គទីផ្សារមានការរំពឹងថានឹងមានអតិផរណាខ្ពស់ក្នុងរយៈពេល ១០ ឆ្នាំខាងមុខ។ ជាក់ស្ដែង ៤០ ភាគរយនៃប្រាក់ដុល្លារអាមេរិកដែលមានស្រាប់ត្រូវបានបោះពុម្ពក្នុងរយៈពេលតែ ១២ ខែចុងក្រោយនេះប៉ុណ្ណោះ ដែលជាចំនួនទឹកប្រាក់ច្រើនបំផុតដែលមិនធ្លាប់មានពីមុនមកនៃការបោះពុម្ពលុយ ហើយក៏ជាផលប៉ះពាល់ដែលនឹងជ្រាបចូលក្នុងវិស័យសេដ្ឋកិច្ចជាច្រើន។
គួរបញ្ជាក់ផងដែរថា មាសគឺជាទ្រព្យមានតម្លៃប្រើសម្រាប់ការពារប្រឆាំងនឹងផលប៉ះពាល់នៃអតិផរណា ដូច្នេះវាជាកត្តាមួយដែលនឹងរួមចំណែកដល់ស្ថិរភាពមាសក្នុងកម្រិតតម្លៃខ្ពស់ជាងនេះ។
ម្យ៉ាងវិញទៀតមាសមិនត្រូវការចំណាយការប្រាក់ឡើយ ហើយទិន្នផលរតនាគារអាមេរិកកំពុងតែកើនឡើង ដែលបណ្តាលឱ្យវិនិយោគិនមួយចំនួនផ្ទេរប្រាក់ពីទ្រព្យសម្បត្តិជាមាសទៅជាសញ្ញាបណ្ណអាមេរិក។ នៅពេលសេដ្ឋកិច្ចអាមេរិកងើបឡើងវិញ វិស័យសេដ្ឋកិច្ចកាន់តែរឹងមាំ ទន្ទឹមនឹងការបន្តថយចុះនៃចំនួនករណីថ្មីនៃជំងឺកូវីដ ១៩ នឹងដាក់សម្ពាធការលក់កាន់តែខ្លាំង។
មុំល្អបំផុតដើម្បីរកប្រាក់ចំណេញនៅក្នុងលក្ខខណ្ឌទាំងនេះ គឺតាមរយៈការជួញដូរមាសនៅចន្លោះតម្លៃមធ្យមប្រចាំថ្ងៃ។ លោក George បានផ្ដល់យោបល់ឱ្យទិញមាសនៅតម្លៃ ១ ៦៩០ ដុល្លារក្នុង ១ អោនស៍ ដោយកំណត់មុខងារយកប្រាក់ចំណេញនៅតម្លៃ ១ ៨៣០ ដុល្លារ និងមុខងារបញ្ឈប់ហានិភ័យនៅតម្លៃ ១ ៦៥០ ដុល្លារ៕