ភ្នំពេញៈ រាជបណ្ឌិត្យសភាកម្ពុជាបានចាត់ទុករបាយការណ៍របស់អង្គការសិទ្ធិមនុស្សស្តីពីវិស័យមីក្រូហិរញ្ញវត្ថុ (MFI) នៅកម្ពុជាគឺជារឿងមួយដែលមិនអាចទទួលយកបាន ព្រោះធ្វើឡើងដោយមិនឈរលើមូលដ្ឋាននៃការស្រាវជ្រាវច្បាស់លាស់ និងមានលក្ខណៈជាការយកចំណេញផ្នែកនយោបាយ។ នេះបើតាមលោក សុខ ទូច ប្រធានរាជបណ្ឌិត្យសភាកម្ពុជាថ្លែងកាលពីថ្ងៃម្សិលមិញ។
ការលើកឡើងនេះជាការឆ្លើយតបទៅនឹងរបាយការណ៍នាពេលថ្មីៗនេះរបស់អង្គការសិទ្ធិមនុស្សលីកាដូ និងសមាគមធាងត្នោតស្តីពី «វិស័យមីក្រូហិរញ្ញវត្ថុធ្វើឲ្យខូចខាតដល់ទ្រព្យបញ្ចាំនៅជនបទ»។
រាជបណ្ឌិត្យសភាកម្ពុជាកាលពីថ្ងៃម្សិលមិញបានរៀបចំកិច្ចពិភាក្សាតុមូលស្ដីពី «ដំណើរប្រព្រឹត្តទៅនិងភាពជាដៃគូនៃសេវាកម្មធនាគារ និងគ្រឹះស្ថានមីក្រូហិរញ្ញវត្ថុនៅកម្ពុជា» ដើម្បីបង្ហាញពីការស្រាវជ្រាវរបស់ខ្លួន។
លោក សុខ ទូច ប្រធានរាជបណ្ឌិត្យសភាកម្ពុជាបាននិយាយថាតាមរយៈការសិក្សាស្រាវជ្រាវ និងធ្វើសម្ភាសរបស់រាជបណ្ឌិត្យសភាកម្ពុជាទៅលើមនុស្សជាង ៣ ០០០ នាក់ ក្នុងបណ្តាខេត្តជាច្រើនមិនបានរកឃើញមានបញ្ហាដូចរបាយការណ៍របស់អង្គការទាំង ២ ដែលបានលើកឡើងថា កម្រិតបំណុលដែលផ្ដល់ដោយគ្រឹះស្ថានមីក្រូហិរញ្ញវត្ថុបានបង្ខំឲ្យគ្រួសារនៅតាមជនបទលក់ដីរបស់ពួកគេទេ។
លោកថា៖ «បើយកមនុស្សចំនួន ២៨ នាក់ដែលមានបញ្ហាក្នុងចំណោមមនុស្ស ២,៥ លាននាក់ តើហ្នឹងជាអ្វី? អាហ្នឹងគឺជារឿងមិនត្រឹមត្រូវទេ សូមឲ្យធ្វើការសិក្សាត្រូវផ្អែកលើវិទ្យាសាស្ត្រ ហើយកុំយកចំណុចទាំងអស់ហ្នឹងទៅវាយគេ។ កំហុសតែ ១ យើងមិនអាចយកមកវាយតម្លៃជាប្រព័ន្ធបានទេ»។
តាមលោក សុខ ទូច រាជបណ្ឌិត្យសភាកម្ពុជាបានធ្វើការស្រាវជ្រាវផ្អែកលើលក្ខណៈវិទ្យាសាស្ត្រ ដូចជា ទ្រឹស្តី ការសិក្សាស្រាវជ្រាវ ការអនុវត្ត លទ្ធផល និងក្រមសីលធម៌។
កាលពីដើមខែសីហានេះរបាយការណ៍របស់អង្គការសិទ្ធិមនុស្សក្នុងស្រុក លីកាដូ និងសមាគមធាងត្នោតបានបង្ហាញថា ការផ្តល់កម្ចីរបស់មីក្រូហិរញ្ញវត្ថុកំពុងធ្វើខូចខាតទ្រព្យបញ្ចាំនៅជនបទនឹងធ្វើឲ្យប្រជាជនមានបំណុលវ័ណ្ឌក។ របាយការណ៍នេះត្រូវបានធ្វើឡើងតាមរយៈការសិក្សាក្នុងឃុំចំនួន ១០ នៅខេត្តក្រុងចំនួន ៥ ដែលរួមមានទីក្រុងភ្នំពេញដោយបានសម្ភាសអតិថិជនរបស់គ្រឹះស្ថានមីក្រូហិរញ្ញវត្ថុចំនួន ២៨ នាក់។
របាយការណ៍ឲ្យដឹងថាទម្រង់នៃការផ្ដល់កម្ចីដ៏ធ្ងន់ធ្ងរនេះបានបង្កើនប្រាក់ចំណូលយ៉ាងច្រើនសម្រាប់គ្រឹះស្ថានមីក្រូហិរញ្ញវត្ថុ និងដៃគូផ្ដល់កម្ចីបរទេសរបស់ពួកគេ ប៉ុន្តែវាមានផលប៉ះពាល់អវិជ្ជមានលើសន្ដិសុខនៃការកាន់កាប់ដីធ្លីរបស់ពលរដ្ឋ ពិសេសសហគមន៍ដែលងាយទទួលរងគ្រោះ។
របាយការណ៍បានឲ្យដឹងទៀតថាក្នុងចំណោមកូនបំណុល ២៨ គ្រួសារដែលត្រូវបានធ្វើសម្ភាសមាន ២២ គ្រួសារត្រូវបានបង្ខំឲ្យលក់ដី ឬទៅចងការប្រាក់បន្តដើម្បីយកមកសងបំណុល និងបណ្ដាលឲ្យមានការរំលោភសិទ្ធិមនុស្ស ដូចជាបង្ខំឲ្យពលរដ្ឋលក់ដីរបស់ពួកគេ បណ្ដាលឲ្យមានការកេងប្រវ័ញ្ចកម្លាំងពលកម្មកុមារ និងការធ្វើចំណាកស្រុកជាដើម។
លោក សុខ ទូច បានលើកឡើងថា ខណៈមានការបញ្ចេញរបាយការណ៍ដែលមិនឆ្លុះបញ្ចាំងការពិតនេះក៏មានអ្នកនយោបាយមួយចំនួនបានឆ្លៀតឱកាសយកការស្រាវជ្រាវដែលមិនមានមូលដ្ឋានច្បាស់លាស់នេះមកវាយប្រហារលើរដ្ឋាភិបាល។ លោកថ្លែងថា៖ «សូមអ្នកនយោបាយកុំប្រើប្រាស់អ្វីដែលគ្មានការសិក្សាស្រាវជ្រាវមកធ្វើជារបកគំហើញ ដើម្បីវាយប្រហារ ឬយកចំណេញផ្នែកនយោបាយ សូមអាណិតសង្គម និងប្រជាជនផង»។
លោក គា បូរាណ ប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា (CMA) បានឲ្យដឹងថាសមាគមបានចេញលិខិតផ្លូវការមួយស្នើឲ្យអង្គការ/អ្នកស្រាវជ្រាវខាងលើបញ្ចូលព័ត៌មានលម្អិតមក CMA ប៉ុន្តែមិនទទួលបាននោះទេ។ លោកបន្តថា CMA ពិតជាចង់បានព័ត៌មានពិត និងតម្លាភាព។
លោកថ្លែងថា៖ «យើងមិនត្រូវការឲ្យគាត់ធ្វើការផ្សព្វផ្សាយជាសាធារណៈទេ តែក្នុងនាមជាដៃគូបើសិនជាគាត់យល់ថា ការសិក្សាស្រាវជ្រាវនេះដើម្បីផ្តល់ជាធាតុចូលសម្រាប់អភិវឌ្ឍន៍ប្រទេសកម្ពុជាគ្រប់វិស័យឲ្យបានប្រសើរ បន្តចំណេះដឹងឲ្យប្រជាជនកាន់តែប្រសើរ គាត់គួរតែធ្វើការងារនេះឲ្យបានជិតស្និទ្ធជាមួយសមាគមដើម្បីស្វែងយល់ទាំងអស់គ្នា ហើយយើងនឹងធ្វើការសិក្សាទាំងអស់គ្នាដូចអ្វីដែលរាជបណ្ឌិត្យសភាបានធ្វើ»។
បើតាមលោក បូរាណ គិតត្រឹមដំណាច់ឆមាសទី ១ ឆ្នាំ ២០១៩ ចំនួនអតិថិជនដែលប្រើប្រាស់ឥណទានរបស់គ្រឹះស្ថានមីក្រូហិរញ្ញវត្ថុមានជិត ២,១ លាននាក់ក្នុងនោះអតិថិជនជិត ១ លាននាក់បានខ្ចីប្រាក់តិចជាង ៤ លានរៀល ចំណែកអតិថិជនសន្សំប្រាក់ មាន ២,៥ លាននាក់ដែលស្មើនឹង ៣,៤ ពាន់លានដុល្លារ។ ផលបត្រឥណទាន (Portfolio) មានជាង ៦,៤ ពាន់លានដុល្លារ៕ LA