.jpg)
កម្មករកាត់ដេរចេញពីធ្វើការ ពីរោងចក្រកាត់ដេរសម្លៀកបំពាក់នៅសង្កាត់ចោមចៅ ខ័ណ្ឌពោធិសែនជ័យ កាលពីសប្តាហ៍មុន។
ភ្នំពេញ៖ ដោយការរីករាលជំងឺកូវីដ ១៩ នៅតែបន្តជះឥទ្ធិពលអវិជ្ជមានដល់សង្គមនិងសេដ្ឋកិច្ច ក្នុងស្មារតីបុរេសកម្ម និង ទទួលខុសត្រូវខ្ពស់ រដ្ឋាភិបាលបានដាក់ចេញវិធានការជុំទី៨ បន្តទៀតក្នុងគោលបំណងទប់ស្កាត់ការរីករាលដាលជំងឺកូវីដ ១៩ និង បន្តជួយរក្សាលំនឹងអាជីវកម្ម ធុរកិច្ចក្នុង វិស័យដែលទទួលរងផលប៉ះពាល់ធ្ងន់ធ្ងរ។
សេចក្តីប្រកាសព័ត៌មានរបស់រដ្ឋាភិបាលបានផ្សាយកាលពីថ្ងៃទី ២៥ មីនា បានឲ្យដឹងថា វិធានការជុំទី៨ នេះដើម្បីជួយកាត់បន្ថយផលប៉ះពាល់មកលើស្ថានភាពសង្គម និងសេដ្ឋកិច្ចដែលបណ្តាលមកពីការឆ្លងក្នុងព្រឹតិ្តការណ៍សហគមន៍ ២០ កុម្ភៈ លើវិស័យវាយនភណ្ឌកាត់ដេរ ស្បែកជើង ផលិតផលធ្វើដំណើរ ការបូបនិង វិស័យទេសចរណ៍។
បន្ទាប់ពីរោងចក្រ សហគ្រាស និងអាជីវកម្មក្នុងវិស័យខាងលើនេះដែលទទួលបានលិខិតអនុញ្ញាតឲ្យព្យួរកិច្ចសន្យាការងារ ឬ លិខិតអនុញ្ញាតឲ្យពន្យាការព្យួរកិច្ចសន្យាការងារពីក្រសួងការងារនិងបណ្តុះបណ្តាលវិជ្ជាជីវៈ ក្រោយពីបានបំពេញតាមលក្ខណៈវិនិច្ឆ័យ និងលក្ខខណ្ឌនៃការព្យួរកិច្ចសន្យាការងាររដ្ឋាភិបាលនឹងបន្តផ្តល់ប្រាក់ឧបត្ថម្ភ ៤០ ដុល្លារ ក្នុង ១ ខែសម្រាប់កម្មករនិយោជិកមួយ នាក់ដល់ស័យវាយនភណ្ឌកាត់ដេរ ស្បែកជើង ផលិតផលធ្វើដំណើរ ការបូបសម្រាប់រយៈពេល ៣ ខែបន្តទៀត ចាប់ពីខែមេសា ដល់ ខែមិថុនា។ ម្ចាស់រោងចក្រ សហគ្រាសក្នុងវិស័យនេះត្រូវបន្ថែម ៣០ ដុល្លារ ដែល កម្មករនិយោជិកនឹងទទួលបានសរុប ៧០ ដុល្លារ ក្នុង ១ ខែ។
អ្នកក្នុងវិស័យទេសចរណ៍ រួមមាន សណ្ឋាគារ ផ្ទះសំណាក់ ភោជនីយដ្ឋាន និងភ្នាក់ងារទេសចរណ៍ក៏នឹងទទួលបានប្រាក់ឧបត្ថម្ភចំនួន ៤០ដុល្លារផងដែរសម្រាប់រយៈពេល ៣ ខែបន្តទៀតចាប់ពីខែមេសា ដល់ ខែមិថុនា។
រដ្ឋាភិបាលបន្តលើលែងការបង់ពន្ធប្រចាំខែគ្រប់ប្រភេទចំពោះសណ្ឋាគារ ផ្ទះសំណាក់ ភោជនីយដ្ឋាន និងក្រុមហ៊ុនភ្នាក់ងារទេសចរណ៍ដែលបានចុះបញ្ជីជាមួយអគ្គនាយកដ្ឋានពន្ធដារ និងមានសកម្មភាពអាជីវកម្មនៅទីក្រុងភ្នំពេញ ខេត្តសៀមរាប ព្រះសីហនុ កែប កំពត ក្រុងបាវិតខេត្តស្វាយរៀង និងក្រុងប៉ោយប៉ែតខេត្តបន្ទាយមានជ័យសម្រាប់រយៈពេល ៣ ខែទៀត(មេសា ដល់ មិថុនា)។
ប៉ុន្តែអាជីវកម្មទាំងនេះ នៅតែមានកាត្វកិច្ចដាក់លិខិតប្រកាសពន្ធអាករ និងប្រើប្រាស់ប្រព័ន្ធអនឡាញសម្រាប់គ្រប់គ្រង់អាករលើតម្លៃបន្ថែម (E-VAT) ជារៀងរាល់ខែក្នុងអំឡុងពេលនៃការលើកលែងនេះ។
ជាមួយគ្នា រដ្ឋាភិបាលបន្តលើកលែងការបង់ភាគទានរបបសន្តិសុខសង្គមផ្នែកហានិភ័យការងារ និងផ្នែកថែទាំសុខភាពនៃបេឡាជាតិសន្តិសុខសង្គម ក្នុងអំឡុងពេលព្យួរអាជីវកម្ម ឬផ្អាកដំណើរការអាជីវកម្ម។
រដ្ឋាភិបាលក៏បន្តជួយដល់វិស័យអាកាសចរណ៍ដោយបន្តលើកលែងការបង់ពន្ធអប្បបរមាសម្រាប់រយៈពេល ៣ ខែបន្ថែមទៀត (មេសា ដល់ មិថុនា) ដូចក្រុមហ៊ុនអាកាសចរណ៍ដែលបានចុះបញ្ជីនៅកម្ពុជា ព្រមទាំងបន្តពន្យាការបង់ប្រាក់ជំពាក់កម្រៃអាកាសចរស៊ីវិលសម្រាប់រយៈពេល ៣ ខែ (មេសា ដល់ មិថុនា) ជាមួយនឹងការអនុញ្ញាតឲ្យក្រុមហ៊ុនអាកាសចរណ៍ទាំងនោះរៀបចំបង់ ប្រាក់ជំពាក់នោះជាដំណាក់កាលក្រោយពីរយៈពេលពន្យានេះ។
ក្រសួង ស្ថាប័នពាក់ព័ន្ធទាំងអស់ត្រូវអនុវត្តនូវសេចក្តីណែនាំនេះទៅតាមសមត្ថកិច្ចរបស់ខ្លួនឲ្យមានប្រសិទ្ធភាពខ្ពស់បំផុត។
រាជរដ្ឋាភិបាលបន្តតាមដានជាប់ជាប្រចាំនូវស្ថានភាពជំងឺកូវីដ១៩លើស្ថានភាពសង្គម សេដ្ឋកិច្ច និងហិរញ្ញវត្ថុក្នុងក្របខណ្ឌសកលតំបន់និង ប្រទេសដើម្បីពិនិត្យវាយតម្លៃពីផលប៉ះពាល់នៃជំងឺកូវីដ១៩ មកលើវិស័យសំខាន់ដល់សេដ្ឋកិច្ចកម្ពុជាក្នុងទិសដៅធ្វើបច្ចុប្បន្នភាពនិងត្រៀមដាក់ចេញវិធានការថ្មីៗបន្ថែមចាំបាច់នានា សំដៅស្តារ និងជំរុញកំណើនសេដ្ឋកិច្ច ក្រោមក្របខណ្ឌផែនការយុទ្ធសាស្ត្រស្តារសេដ្ឋកិច្ចឡើងវិញក្នុងអំឡុង និងក្រោយពីវិបត្តិជំងឺកូវីដ១៩៕
