.jpg)
លោក ហ៊ុន សែន ក្នុងជំនួបពិភាក្សាជាមួយលោក Dmitry Tsvetkov កាលពីថ្ងៃចន្ទ។ រូបថត SPM
ភ្នំពេញៈ លោក Dmitry Tsvetkov ឯកអគ្គរដ្ឋទូតប្រទេសរុស្ស៊ី គាំទ្រប្រទេស កម្ពុជា លើកិច្ចព្រមព្រៀងពាណិជ្ជកម្មសេរីជាមួយនឹងប្រទេស រុស្ស៊ី ដែលវិស័យឯកជនរំពឹងថា ពាណិជ្ជកម្មថ្មីនេះនឹងបង្កើនការនាំចេញផលិតផលរបស់ខ្លួនទៅទីផ្សារថ្មី។
ថ្លែងនៅក្នុងកិច្ចប្រជុំជាមួយលោក Dmitry Tsvetkov ឯកអគ្គរដ្ឋទូតរុស្ស៊ីប្រចាំនៅប្រទេស កម្ពុជា កាលពីថ្ងៃចន្ទ លោកនាយករដ្ឋមន្ដ្រី ហ៊ុន សែន បានឲ្យដឹងថា ប្រទេសទាំង ២ មានទំនាក់ទំនងការទូតល្អ។ ប្រទេស រុស្ស៊ី បានរួមចំណែកដល់កំណើនសេដ្ឋកិច្ចរបស់ប្រទេស កម្ពុជា។
លោកថ្លែងថា៖ «ប្រទេស រុស្ស៊ី នឹងផ្ដល់ជំនួយដល់ប្រទេសកម្ពុជា និងគាំទ្រប្រទេស កម្ពុជា ក្នុងការចុះហត្ថលេខាលើកិច្ចព្រមព្រៀងពាណិជ្ជកម្មសេរីនេះ។ ក្នុងរយៈពេល ៦ ឆ្នាំកន្លងមកប្រទេស កម្ពុជា និងរុស្ស៊ី បានចុះហត្ថលេខាលើឯកសារចំនួន ៦២ និងបានចុះហត្ថលេខាលើកិច្ចព្រមព្រៀងចំនួន ១៤»។
កម្ពុជា និងរុស្ស៊ី បានសន្យាថា នឹងរៀបចំដំណើរទស្សនកិច្ចរវាងថ្នាក់ដឹកនាំនៃប្រទេសទាំង ២ ក្នុងគោលបំណងដើម្បីពង្រឹងកិច្ចសហប្រតិបតិ្តការ និងបង្កើនពាណិជ្ជកម្មទ្វេភាគី។
លោក ហ៊ុន សែន ថ្លែងថា៖ «យើងកំពុងរៀបចំសម្រាប់ដំណើរទស្សនកិច្ចលោកនាយករដ្ឋមន្ដ្រីប្រទេសរុស្ស៊ីមកកាន់ប្រទេសកម្ពុជា ព្រមទាំងខ្លួនខ្ញុំផ្ទាល់ក៏នឹងទៅធ្វើទស្សនកិច្ចប្រទេសរុស្ស៊ីផងដែរ»។
បច្ចុប្បន្នកម្ពុជាបាននាំចេញអង្កររបស់ខ្លួនទៅកាន់ទីផ្សារជាង ២០ ទិសដៅនៅសហភាពអឺរ៉ុប។
លោក លន់ យ៉េង អគ្គលេខាធិការ សហព័ន្ធស្រូវអង្ករកម្ពុជា (CRF) បានប្រាប់ភ្នំពេញប៉ុស្ដិ៍កាលពីថ្ងៃអង្គារថា កិច្ចព្រមព្រៀងនេះនឹងបង្កើនសមត្ថភាពប្រកួតប្រជែងនៃការនាំចេញអង្កររបស់ប្រទេស កម្ពុជា។
លោកបន្តថា៖ «យើងបាននាំចេញអង្ករទៅទីផ្សាររុស្ស៊ី ប៉ុន្តែវាមានចំនួនតិចតួចធៀបនឹងទិសដៅទីផ្សារផ្សេងទៀត។ ប្រសិនបើយើងមានកិច្ចព្រមព្រៀង វានឹងផ្ដល់ឱកាសកាន់តែច្រើនសម្រាប់ប្រទេស កម្ពុជា ក្នុងការបង្កើនការនាំចេញអង្កររបស់ខ្លួនទៅរុស្ស៊ី»។
លោក កាំង ម៉ូនីកា អគ្គលេខាធិការរងសមាគមរោងចក្រកាត់ដេរនៅកម្ពុជា បានឲ្យដឹងថា កិច្ចព្រមព្រៀងពាណិជ្ជកម្មនេះនឹងបង្កើនទំហំពាណិជ្ជកម្ម និងឧស្សាហកម្មនាំចេញទាំងអស់។
លោកថ្លែងថា៖ «រហូតមកដល់ពេលនេះកម្ពុជាក៏បាននាំចេញនូវផលិតផលមួយចំនួនទៅកាន់ប្រទេស រុស្ស៊ី ផងដែរ ប៉ុន្តែក្នុងចំនួនតិចតួចបំផុត»។
ពាណិជ្ជកម្មទ្វេភាគីរវាងកម្ពុជា និងសហព័ន្ធរុស្ស៊ី មានតម្លៃប្រមាណជាង ៥៥,៣៩ លានដុល្លារ កាលពីឆ្នាំមុនធ្លាក់ចុះ ៤០,៤៤ ភាគរយ បើធៀបនឹងឆ្នាំ ២០១៨ ដែលមានតម្លៃជាង ៩៣ លានដុល្លារ។ នេះបើយោងតាមរបាយការណ៍ក្រសួងពាណិជ្ជកម្ម។
ទិន្នន័យនេះបង្ហាញថា ប្រទេស កម្ពុជា បាននាំចេញផលិតផលក្នុងតម្លៃប្រហែល ៥១ លានដុល្លារ កាលពីឆ្នាំមុន កើនឡើង ២៧,៨ ភាគរយ ធៀបនឹងឆ្នាំ ២០១៨ ខណៈដែលការនាំចូលមានតម្លៃ ៣,៦ លានដុល្លារ។
EAEU គឺជាអង្គការអន្តរជាតិមួយដែលតំណាងប្លុករបស់បណ្ដាប្រទេសនៅអាស៊ីកណ្ដាលភាគខាងជើង និងអឺរ៉ុបខាងកើត ដោយមានផលិតផលក្នុងស្រុកសរុប (GDP) រួមចំនួន ៥ ពាន់ពាន់លានដុល្លារ។
ប្លុកនេះរួមមានរដ្ឋជាសមាជិក ៥ គឺអាមេនី បេឡារុស កាហ្សាក់ស្ថាន កៀហ្ស៊ីស៊ីស្ថាន និងរុស្ស៊ី ដោយមានប្រជាជនសរុប ១៨៣ លាននាក់៕LA
