.jpg)
CMA បានប្ដេជ្ញាចិត្តជាមួយសមាជិករបស់ខ្លួនក្នុងការរៀបចំឥណទានឡើងវិញ សម្រាប់អតិថិជនដែលបាត់បង់ប្រាក់ចំណូលប្រចាំថ្ងៃរបស់ពួកគេ ដោយសារតែការរីករាលដាលជំងឺកូវីដ ១៩។ រូបថត សហការី
ភ្នំពេញ៖ សមាគមមីក្រូហិរញ្ញវត្ថុកម្ពុជា (CMA) បានប្ដេជ្ញាចិត្តជាមួយសមាជិករបស់ខ្លួនក្នុងការរៀបចំឥណទានឡើងវិញសម្រាប់អតិថិជនដែលបាត់បង់ប្រាក់ចំណូលប្រចាំថ្ងៃរបស់ពួកគេ ដែលរងផលប៉ះពាល់ដោយសារតែការរីករាលដាលជំងឺកូវីដ ១៩។
យោងតាមសេចក្ដីប្រកាសព័ត៌មានរួមរបស់ CMA កាលពីថ្ងៃទី ១៧ ខែមេសា សមាជិកទាំងអស់នឹងខិតខំប្រឹងប្រែងឲ្យអស់ពីលទ្ធភាព ដើម្បីឆ្លើយតប និងគាំទ្រអតិថិជនរបស់ខ្លួន ដែលកំពុងប្រឈមនឹងការពិបាកនៅក្នុងអំឡុងពេលវេលាដ៏ពិបាក ដើម្បីធានានិរន្តរភាពរបស់វិស័យនេះ។
សមាជិករបស់សមាគមកំពុងអនុវត្ត និងដោះស្រាយបញ្ហាដោយពឹងផ្អែកលើគោលការណ៍ផ្ទៃក្នុងរបស់ពួកគេ ស្របទៅនឹងប្រភេទអតិថិជន ទំហំនៃផលប៉ះពាល់ និងស្ថានភាពជាក់ស្ដែងរបស់អថិតិជនម្នាក់ៗ ហើយដំណោះស្រាយទាំងនោះត្រូវអនុលោមតាមសេចក្ដីណែនាំរបស់ធនាគារជាតិនៃកម្ពុជា។
សេចក្ដីប្រកាសព័ត៌មានបានបន្តថា៖ «ដើម្បីទទួលបានការគាំទ្រ និងដំណោះស្រាយជាពិសេសការរៀបចំឥណទានឡើងវិញ អតិថិជនត្រូវទំនាក់ទំនងទៅគ្រឹះស្ថានដែលខ្លួនបានខ្ចីប្រាក់ ដើម្បីពិភាក្សាអំពីស្ថានភាព និងលទ្ធភាពដោះស្រាយនានាជាមួយនឹងបុគ្គលិកគ្រឹះស្ថាន។ អតិថិជនត្រូវផ្តល់ព័ត៌មានឲ្យបានគ្រប់ជ្រុងជ្រោយ ដើម្បីទទួលបានដំណោះស្រាយសមស្រប និងឈ្នះ-ឈ្នះទាំងអស់គ្នា ដើម្បីបន្តនិរន្តរភាពវិស័យហិរញ្ញវត្ថុ និងសេដ្ឋកិច្ចជាតិ»។
ចំពោះអតិថិជនដែលរងផលប៉ះពាល់តិចតួច ឬមិនរងផលប៉ះពាល់ ហើយមានលទ្ធភាពសងត្រឡប់វិញ សមាគមសូមធ្វើការលើកទឹកចិត្តដល់អតិថិជនឲ្យបន្តបង់សងត្រឡប់តាមធម្មតា ដោយទុកលទ្ធភាពឲ្យគ្រឹះស្ថាននីមួយៗ យកលទ្ធភាពដែលខ្លួនមានទៅជួយដល់អតិថិជនរងផលប៉ះពាល់ធ្ងន់ធ្ងរ»។
លោក ប៊ុន មុន្នី អគ្គនាយកមីក្រូហិរញ្ញវត្ថុ វិថី បានឲ្យដឹងថា រហូតមកដល់ពេលនេះគ្រឹះស្ថានរបស់លោក មិនទាន់បានរៀបចំឥណទានឡើងវិញទេ ដោយសារតែមិនមានអតិថិជនរាយការណ៍ពីផលប៉ះពាល់របស់ពួកគេ។ លោកបន្តថា៖ «ប្រសិនបើយើងមានអតិថិជនណាមួយដែលរងផលប៉ះពាល់ទាក់ទងមកយើង យើងនឹងបញ្ជូនបុគ្គលិកទៅជួប និងសិក្សាលើពួកគេ ដើម្បីយើងនឹងរៀបចំឥណទានឡើងវិញ»។
លោកបញ្ជាក់ថា៖ «ទោះបីយ៉ាងណាប្រសិនបើយើងដឹងថា ភាគច្រើននៃអតិថិជនរបស់យើងត្រូវរងផលប៉ះពាល់ យើងរៀបចំផែនការក្នុងការចាប់ផ្ដើមការរៀបចំឥណទានឡើងវិញ ចាប់ផ្ដើមពីខែនេះ ដោយអនុលោមតាមគោលការណ៍ណែនាំពីនិយតកររបស់យើង (ធនាគារជាតិនៃកម្ពុជា)»។
លោក សាយ សូនី នាយកប្រតិបត្តិ ប្រាសាក់ បានប្រាប់ភ្នំពេញប៉ុស្ដិ៍ កាលពីថ្ងៃអាទិត្យថា ស្ថាប័នលោករាយការណ៍ថាមានអតិថិជន ២-៣ នាក់ ស្នើសុំការរៀបចំឥណទានឡើងវិញ ដោយសារពួកគេមិនមានប្រាក់ចំណូលពីអាជីវកម្មក្នុងអំឡុងពេលនេះ។
លោកលើកឡើងថា៖ «មានអតិថិជនមួយចំនួនដែលមានផលប៉ះពាល់ដោយផ្ទាល់ ដោយសារតែកូវីដ ១៩ និងមួយចំនួនរងផលប៉ះពាល់ដោយប្រយោល។ ប៉ុន្តែភាគច្រើននៃអតិថិជនរបស់យើង នៅតែគោរពតាមកាតព្វកិច្ចសងត្រឡប់កម្ចីរបស់ពួកគេ និងធ្វើការសងត្រឡប់ប្រាក់កម្ចីតាមពេលវេលាសងត្រឡប់។ ដើម្បីឆ្លើយតបនឹងការស្នើសុំរបស់អតិថិជន យើងវាយតម្លៃស្ថានការណ៍របស់អតិថិជន និងពិភាក្សាជាមួយអតិថិជន ដើម្បីស្វែងរកដំណោះស្រាយសមស្រប និងទទួលយកសម្រាប់ភាគីទាំង ២»។
ធនាគារជាតិនៃកម្ពុជាកាលពីថ្ងៃទី ២៧ ខែមីនា បានចេញសារាចរណែនាំមួយដល់គ្រឹះស្ថានហិរញ្ញវត្ថុទាំងអស់ស្ដីពីការរៀបចំឥណទានឡើងវិញសម្រាប់កម្ចីនៅក្នុងវិស័យអាទិភាពទាំង ៤ ក្នុងគោលបំណងរក្សាស្ថិរភាពហិរញ្ញវត្ថុ គាំទ្រសកម្មភាពសេដ្ឋកិច្ច និងបន្ធូរបន្ថយបន្ទុកលើអ្នកជាប់បំណុល ដែលប្រឈមនឹងការធ្លាក់ចុះប្រាក់ចំណូល ក្នុងអំឡុងការរីករាលដាលកូវីដ ១៩ កាន់តែខ្លាំងនេះ។ វិស័យអាទិភាពទាំង ៤ គឺវិស័យទេសចរណ៍ កាត់ដេរ សំណង់ ដឹកជញ្ជូន និងឡូជីស្ទិក៕ LA
