.jpg)
កសិករនៅខេត្តរតនគិរី ហាលដំឡូងមីរបស់ខ្លួន។ ហេង ជីវ័ន
ភ្នំពេញៈ រោងចក្រកែច្នៃដំឡូងមី Green Leader Holding Group នៅខេត្ត ក្រចេះ គ្រោងនឹងដាក់ឲ្យប្រតិបត្តិការនៅដើមឆ្នាំក្រោយ ខណៈការសាងសង់រោងចក្រសម្រេចបានជាង ៧០ ភាគរយ។ នេះបើយោងតាមលោក Gao Hua អគ្គនាយកក្រុមហ៊ុន Green Leader Cambodia ។
ក្រុមហ៊ុនគ្រោងនឹងវិនិយោគសរុប ១៥០ លានដុល្លារលើវិស័យឧស្សាហកម្មដំឡូងមីនៅកម្ពុជា។
រោងចក្រដំបូងរបស់ក្រុមហ៊ុនស្ថិតនៅក្នុងខេត្តក្រចេះ ត្រូវបានចាប់ផ្ដើមដំណើរការសាងសង់កាលពីខែមេសា ឆ្នាំនេះ ដោយបានគ្រោងដាក់ឲ្យដំណើរការនៅចុងឆ្នាំនេះ ប៉ុន្តែត្រូវបានពន្យារពេលវិញ។
លោក Gao Hua អគ្គនាយកក្រុមហ៊ុន Green Leader Cambodia បានថ្លែងថា៖ «រោងចក្រនេះបានបញ្ចប់ជិត ៧០ ភាគរយហើយ ខណៈវាត្រូវបានពន្យារពេល ដោយសារតែរដូវភ្លៀង និងបច្ចេកទេសមួយចំនួនសម្រាប់ការសាងសង់»។
លោកបានបន្តថា៖ «ឧបករណ៍សម្រាប់ការដំឡើងរោងចក្រនេះត្រូវបានរៀបចំរួចហើយ ហើយយើងកំពុងរង់ចាំការដឹកជញ្ជូនមកពីប្រទេសចិន»។
លោកបន្ថែមថា រោងចក្រនេះនឹងដាក់ឲ្យដំណើរការនៅខែកុម្ភៈឆ្នាំក្រោយ។
រោងចក្រនេះស្ថិតក្នុងស្រុកស្នួល លើផ្ទៃដី ២០ហិកតា នឹងអាចកែច្នៃដំឡូងមីស្រស់បានប្រហែល ៦០០ ០០០ តោនក្នុងមួយឆ្នាំ មានសមត្ថភាពផលិតម្សៅដំឡូងមី ឬម្សៅដំឡូងមីកែច្នៃប្រចាំឆ្នាំបាន ១៥០ ០០០តោន។
លោក Hua បានឲ្យដឹងថា ក្រុមការងារមកពីក្រសួងកសិកម្ម ក្រសួងពាណិជ្ជកម្ម និងអង្គការ UNDP បានកំណត់យកសហករណ៍កសិករដំឡូងមីជាង ១០ រួចហើយ ដោយអាចផ្គត់ផ្គង់បានប្រហែល ៣០ ភាគរយនៃតម្រូវការប្រចាំឆ្នាំសម្រាប់រោងចក្រនេះ និងជិត ៤០ ភាគរយផ្សេងទៀតត្រឹមឆ្នាំ ២០១៩។
លោកបានថ្លែងថា៖ «ការអនុវត្តការធ្វើកសិកម្មតាមកិច្ចសន្យា ត្រូវបានអនុវត្តយ៉ាងប្រសើរ ទោះបីជាល្បឿននៃការបញ្ចប់មានភាពយឺតយ៉ាវក៏ដោយ ប៉ុន្តែការពិចារណាជាប្រចាំនៃចំនួនដ៏ច្រើនរបស់កសិករដែលចូលរួម ព្រមទាំងតំបន់គ្របដណ្ដប់ទីតាំងនេះ»។
លោកបន្តថា៖ «ភាពជឿជាក់លើការបញ្ចប់គឺខ្ពស់ ដោយសារតែគំនិតផ្ដួចផ្ដើមរបស់ក្រសួងពាក់ព័ន្ធ និង UNDP បានប្ដេជ្ញាចិត្ត និងការចូលរួមនៅក្នុងគម្រោងនេះ»។
លោកបន្ថែមថា ក្រុមហ៊ុន Green Leader បានអភិវឌ្ឍចក្ខុវិស័យច្បាស់លាស់ និងការប្ដេជ្ញាចិត្តផ្ដោតលើទីផ្សារនាំចេញមួយចំនួនក្នុងទិសដៅទៅប្រទេសចិន ជប៉ុន និងសហភាពអឺរ៉ុប។
លោកស្រី វុឌ្ឍី អ្នកនាំពាក្យក្រសួងកសិកម្ម មានភាពជឿជាក់លើរោងចក្រនេះថា វានឹងធានាទីផ្សារដំឡូងមីសម្រាប់កសិករ។
លោកថ្លែងថា៖«រោងចក្រនេះនឹងផ្ដល់ទីផ្សារប្រកបដោយស្ថិរភាព សម្រាប់កសិករដំឡូងមី និងធានាតម្លៃដំឡូងមី បន្ទាប់ពីការធ្វើកសិកម្មតាមកិច្ចសន្យាត្រូវបានធ្វើឡើង»។
លោកបន្តថា៖ «កសិករលែងមានការបារម្ភអំពីទីផ្សារទៀតហើយ» ដោយមានរោងចក្រកែច្នៃមួយនៅក្នុងតំបន់ដាំដុះដំឡូងមី រោងចក្ររបស់ក្រុមហ៊ុន Green Leader មួយនេះអាចផ្ដល់ដល់កសិករនូវទីផ្សារប្រកបដោយស្ថិរភាពតាមរយៈការធ្វើកសិកម្មតាមកិច្ចសន្យា។
តួលេខរបស់ក្រសួងកសិកម្មបានបង្ហាញថា ការដាំដុះដំឡូងមីនៅកម្ពុជាបានកើនឡើងដល់ ៦១៤ ០០០ហិកតា ដោយផ្ដល់បរិមាណផលដល់ ១៣ ៨១៧ ០០០ តោនកាលពីឆ្នាំ ២០១៧៕LA
