.jpg)
លោក គួច ចំរើន អភិបាលខេត្តព្រះសីហនុដែលបានដឹកនាំមន្ត្រីជំនាញចុះពិនិត្យទីតាំងរោងចក្រកាលពីថ្ងៃចន្ទ។ រូបថត គួចចំរើន/KuochChamroeun
ភ្នំពេញៈ វិនិយោគិនខ្មែរ និងចិនបានរួមគ្នាបោះទុនវិនិយោគប្រមាណ ៨ លានដុល្លារ ក្នុងការសាងសង់រោងចក្រកែច្នៃផ្លែឈើសម្រាប់នាំចេញនៅក្នុងខេត្តព្រះសីហនុ។
អ្នកនាំពាក្យសាលាខេត្តព្រះសីហនុលោក ឃាង ភារម្យ បានប្រាប់ភ្នំពេញប៉ុស្តិ៍ កាលពីថ្ងៃពុធថា បច្ចុប្បន្នក្រុមហ៊ុន Shang Da Jian Hui International Agriculture Product and Logistic Co., Ltd កំពុងដំណើរការសាងសង់រោងចក្រកែច្នៃផ្លែឈើពីផ្លែស្វាយ ស្វាយចន្ទី ម្នាស់ និងចេក។
បើតាមលោក ភារម្យ មកដល់ពេលនេះខេត្តព្រះសីហនុមានសហគ្រាសធុនតូច និងមធ្យម និងសិប្បកម្មកំពុងប្រតិបត្តិការសរុប ១ ១៤៩ មូលដ្ឋាន និងមានទុនវិនិយោគជាង ២៦,៨៩ លានដុល្លារ។
លោក គួច ចំរើន អភិបាលខេត្តព្រះសីហនុដែលបានដឹកនាំមន្ត្រីជំនាញចុះពិនិត្យទីតាំងរោងចក្រនេះកាលពីថ្ងៃចន្ទបានសម្តែងនូវការគាំទ្រយ៉ាងខ្លាំងចំពោះគម្រោងនេះ។ លោកថ្លែងថា៖ «ខ្ញុំនឹងជួយសម្រួលរាល់នីតិវិធីនានាដើម្បីឲ្យរោងចក្រនេះដំណើរការ ព្រោះរោងចក្រនេះអាចស្រូបយកផ្លែស្វាយ និងផ្លែឈើដទៃទៀតពីប្រជាពលរដ្ឋដើម្បីកែច្នៃធ្វើការនាំចេញ»។
កម្ពុជា និងចិន កាលពីថ្ងៃអង្គារបានសម្រេចកិច្ចព្រមព្រៀងជាផ្លូវការក្នុងការនាំចេញស្វាយស្រស់ចំនួន ៥០ ម៉ឺនតោន ក្នុង ១ ឆ្នាំ ដែលនេះជាការបើកផ្លូវនាំចេញកសិផលរបស់កម្ពុជាទៅកាន់ទីផ្សារប្រទេសចិន។
លោក វេង សាខុន រដ្ឋមន្ត្រីក្រសួងកសិកម្មបានថ្លែងនៅក្នុងពិធីចុះហត្ថលេខាលើកិច្ចព្រមព្រៀងថា ប្រទេសចិនមានតម្រូវការស្វាយស្រស់ ៨ លានតោន ក្នុង ១ ឆ្នាំ ដែលនេះជាឱកាសល្អក្នុងការនាំចេញផ្លែស្វាយ បន្ទាប់ពីផ្លែចេកអំបូងលឿងត្រូវបាននាំចេញជាផ្លូវការទៅចិនកាលពីឆ្នាំ ២០១៩។
កាលពីឆ្នាំ ២០១៩ កម្ពុជាបាននាំចេញផ្លែស្វាយស្រស់ ៥៨ ១៦២ តោន ទៅកាន់ប្រទេសចំនួន ៥ រួមមាន ថៃ វៀតណាម សិង្ហបុរី បារាំង រុស្ស៊ី និងទីក្រុងហុងកុង។ នេះបើយោងតាមរបាយការណ៍ក្រសួងកសិកម្ម៕LA
