.jpg)
លោក អ៊ូច ភា អភិបាលខេត្តតាកែវថ្លែងក្នុងសន្និសីទ។ ហុង មិនា
ភ្នំពេញ: ខេត្តតាកែវទទួលបានការវិនិយោគក្នុងវិស័យវាយនភណ្ឌកាត់ដេរសម្លៀកបំពាក់ និងស្បែកជើងដោយមានរោងចក្រជិត ៥០ បើកដំណើរការនៅឆ្នាំ ២០១៩ ដែលបានផ្តល់ការងារជាង ១ ម៉ឺនកន្លែង ដើម្បីរួមចំណែកអភិវឌ្ឍ និងបង្កើនសេដ្ឋកិច្ចនៅក្នុងខេត្តនេះ។
លោក អ៊ូច ភា អភិបាលខេត្តតាកែវបានថ្លែងក្នុងសន្និសីទសារព័ត៌មានស្តីពីវឌ្ឍនភាព និងទិសដៅការងារនៅទីស្តីការគណៈរដ្ឋមន្ត្រីនៅថ្ងៃម្សិលមិញថា វិស័យឧស្សាហកម្ម និងសិប្បកម្មកំពុងដើរតួយ៉ាងសំខាន់ក្នុងចំណោមវិស័យមួយចំនួនទៀត។
លោកបានឲ្យដឹងថា សហគ្រាស វាយភណ្ឌកាត់ដេរសម្លៀកបំពាក់ និងស្បែកជើងចំនួន ៤៦ ត្រូវបានបង្កើតថ្មីកាលពីឆ្នាំ ២០១៩។ ក្នុងនោះរោងចក្រកាត់ដេរសម្លៀកបំពាក់ចំនួន ២៧ រោងចក្រផលិតស្បែកជើង និងគ្រឿងផ្សំស្បែកជើងចំនួន ១១ រោងចក្រផលិតកាបូប និងខ្សែកាបូប ៥ និងរោងចក្រមួយចំនួនទៀតដោយរោងចក្រទាំងនេះបានផ្តល់ការងារចំនួន ១១ ៦០៦ នាក់។
លោកថ្លែងថា៖ «វិស័យកាត់ដេរបានរួមចំណែកអភិវឌ្ឍវិស័យឧស្សាហកម្មកម្មន្តសាលរបស់ខេត្តតាកែវឲ្យកាន់តែមានភាពចម្រុះសម្បូរបែប បន្ទាប់ពីវិស័យកសិកម្ម ពាណិជ្ជកម្ម និងសេវាកម្មដែលធ្វើឲ្យសេដ្ឋកិច្ចខេត្តនេះរីកចម្រើនថែមទៀត»។
លោកបន្ថែមថា ខេត្តតាកែវក៏មានសហគ្រាសធុនតូច និងមធ្យម និងសិប្បកម្មមានចំនួន ៣០៧ មូលដ្ឋានកាលពីឆ្នាំមុន ដែលមានកម្លាំងពលកម្មចំនួន ៣ ២៤៤ នាក់។
លោក លឹម ហេង អនុប្រធានសភាពាណិជ្ជកម្មកម្ពុជាបានប្រាប់ភ្នំពេញប៉ុស្តិ៍កាលពីសប្តាហ៍មុនថា កម្ពុជានៅតែជាកន្លែងដែលមានសក្តានុពលខ្ពស់សម្រាប់ការវិនិយោគលើការបង្កើតរោងចក្រ ទោះបីកម្ពុជាកំពុងប្រឈមការបាត់បង់ប្រព័ន្ធអនុគ្រោះពន្ធ (EBA) ពីអឺរ៉ុបក៏ដោយ។
លោកថ្លែងថា៖ «ខ្ញុំគិតថានឹងមិនមានអ្វីជាឧបសគ្គសម្រាប់ទីផ្សារផលិតផលពីរោងចក្រវាយនភណ្ឌរបស់កម្ពុជាទេ ព្រោះនៅពេលខាងមុខកម្ពុជានឹងមានទីផ្សារកាន់តែធំ ពិសេសជាមួយបណ្តាប្រទេស Eurasia និងការឈានដល់កិច្ចព្រមព្រៀងពាណិជ្ជកម្មសេរីជាមួយប្រទេសចិន និងកូរ៉េនៅពេលខាងមុខ»។
លោក វង្ស៊ី វិសុទ្ធ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុធ្លាប់បានអះអាងថា ការកើនឡើងចំនួនរោងចក្រថ្មីផ្តោតលើទំនិញធ្វើដំណើរបានបង្ហាញសញ្ញាដ៏ល្អនៃការធ្វើពិពិធកម្មសេដ្ឋកិច្ចរបស់កម្ពុជា និងការបង្កើតការងារថ្មីៗ។
លោកបានថ្លែងថា៖ «មានឧស្សាហកម្ម ២ ផ្សេងទៀតនឹងស្រូបយកការងារកាន់តែច្រើនទី ១ ការកើនឡើងការនាំចេញទៅអាមេរិកនឹងស្រូបយកការងារកាន់តែច្រើន និងទី ២ គឺការបង្កើនការងារកាន់តែច្រើនក្នុងឧស្សាហកម្មកាត់ដេរ»។
កម្ពុជាមានរោងចក្រសរុប ១ ៧៣០ ក្នុងឆ្នាំ ២០១៩ ដោយបង្កើតថ្មី ២៦៩ រោងចក្រ។ LA
