The Phnom Penh Post Search

Search form

Logo of Phnom Penh Post newspaper Phnom Penh Post - រោង​ចក្រ​ផលិត​ក្បឿង​ខ្នាត​ធំ​ដំ​បូង​នៅ កម្ពុជា បើក​ដំ​ណើរ​ការ

រោង​ចក្រ​ផលិត​ក្បឿង​ខ្នាត​ធំ​ដំ​បូង​នៅ កម្ពុជា បើក​ដំ​ណើរ​ការ

Content image - Phnom Penh Post
ទិដ្ឋភាព​ក្នុង​រោងចក្រផលិតទុយោ​របស់​ក្រុមហ៊ុន ជីប ម៉ុង អីុនដាស្រ្ទីស៍ ក្នុង​ពេល​បើក​សម្ពោធ​កាល​ពី​ថ្ងៃ​សុក្រ។ ហេង ជីវ័ន

រោង​ចក្រ​ផលិត​ក្បឿង​ខ្នាត​ធំ​ដំ​បូង​នៅ កម្ពុជា បើក​ដំ​ណើរ​ការ

ភ្នំពេញៈ រោង​ចក្រ​ផលិត​ក្បឿង ​និង​ទុ​យោ ធំ​ជាង​គេ​មួយ​របស់​​កម្ពុជា ​ដែល​ជា​​វិ​និ​យោ​គ​ដោយ​ក្រុម​ហ៊ុន ​ជីប​ ម៉ុង ​គ្រុប​បាន​ដាក់​ឲ្យ​ដំ​ណើរ​ការ​ ដើម្បី​ចាប់​យ​ក​តម្រូវ​ការ​ដែល​កំ​ពុង​កើន​ឡើ​​ង​ក្នុង​វិ​ស័យ​សំ​ណ​ង់​​កម្ពុ​ជា​។

រោង​ចក្រ ​ដែល​វិ​និ​យោគ​ដោយ​ ជីប​ម៉ុង ​អីុន​ដា​ស្រ្ទីស៍ ​ជា​ក្រុម​​ហ៊ុន​បុត្រ​សម្ព័ន្ធ ​របស់​ជីប ម៉ុង​ គ្រុប​ស្ថិត​នៅ​លើ​ផ្ទៃ​ដី​ ១១ ​​ហិក​តា ក្នុង​សង្កាត់​រលួស ខណ្ឌ​ដង្កោ រាជ​ធានី​ភ្នំ​ពេញ​ដោយ​រំ​ពឹង​ថា​នឹង​អាច​ជួយ​កាត់​​បន្ថយ​​ការ​ពឹង​ផ្អែក​លើ​ផលិត​​ផល​នាំ​ចូល​បាន​មួយ​ចំ​ណែក​។ នេះ​បើ​យោង​​តាម​សេច​ក្តី​ប្រ​កាស​ព័ត៌​មាន​របស់​ក្រុម​ហ៊ុន​។​

សេច​ក្តី​ប្រ​កាស​ព័ត៌​មាន​បាន​ឲ្យ​ដឹង​ថា រោង​ចក្រ​ក្បឿង​នេះ មាន​សម​ត្ថភាព​​ផលិត​ក្បឿង​បាន​​ចំ​នួន​ ១៤​០ ​សន្លឹក​ក្នុង ១ ​នាទី ចំ​ណែ​ក​​រោង​ចក្រ​ទុ​យោ​មាន​​សមត្ថ​ភាព​ផលិត​​ទុ​យោ​បាន​ ៥០០ ​តោន​ក្នុង​​មួយ​ខែ​។

លោក​ លាង​ ឃុន ប្រ​ធាន​ក្រុម​​អគ្គ​នា​យក​ក្រុម​ហ៊ុន​ ជីប ម៉ុង​ គ្រុប បាន​ឲ្យ​ដឹង​ថា ការ​បើក​ដំ​ណើរ​ការ​រោង​ចក្រ​ផលិត​ក្បឿង និង​ទុយោ​នេះ​ គឺ​​ជា​ដំ​ណើរ​វិ​វឌ្ឍន៍​ថ្មី​មួយ​ទៀត​របស់​ក្រុម​ហ៊ុន​ក្នុង​ការ​រួម​ចំ​ណែក​កាត់​បន្ថយ​អត្រា​នៃ​ភាព​ក្រី​ក្រ​តាម​រយៈ​ការ​បង្កើត​ការ​ងារ ​កាត់​បន្ថយ​ការ​ធ្វើ​ចំ​ណាក​ស្រុក និង​លើក​កម្ពស់​កំ​ណើន​សេដ្ឋ​កិច្ច​​ជាតិ​កម្ពុជា​។

លោក​ថ្លែង​ថា​៖​ ​«​​​នេះ​​​ជា​ការ​រួម​ចំ​ណែក​ក្នុង​ការ​លើក​ស្ទួយ​មុខ​មាត់​ប្រ​ទេស​ កម្ពុជា ​ក្នុង​​វិ​ស័យ​ឧស្សា​ហ​កម្ម ​តាម​​រយៈ​ការ​បោះ​ជំ​ហាន​ពី​ប្រ​ទេស​​កសិ​កម្ម​ទៅ​ជា​ប្រ​ទេស​ឧស្សា​ហ​កម្ម ព្រម​ទាំង​ជួយ​កាត់​បន្ថយ​ការ​នាំ​ចូល​សម្ភារ​សំ​ណ​ង់​​ពី​បរ​ទេស និង​ជួយ​​បង្កើន​កំ​ណើន​​សេដ្ឋ​កិច្ច​ជាតិ»។

រដ្ឋ​មន្ត្រី​ក្រ​សួង​ឧស្សា​ហ​កម្ម និង​​សិប្ប​កម្ម​ លោក​ ចម​ ប្រ​សិទ្ធ បាន​លើក​ឡើង​នៅ​ក្នុង​ពិ​ធី​បើក​ដំ​ណើរ​​ការ​រោង​ចក្រ​នេះ​កាល​ពី​ថ្ងៃ​សុក្រ​ថា​ ការ​បង្កើត​រោង​ចក្រ​ឧស្សា​ហកម្ម​ខ្នាត​ធំ​ចំ​នួន​ ២ ​នេះ​គឺ​​ជា​​ការ​ចូល​​​រួម​ចំ​ណែក​ដ៏​សំ​ខាន់​​របស់​វិ​ស័យ​ឯក​ជន​​ក្នុង​ការ​​ជំរុញ​កំ​ណើន​សេដ្ឋ​កិច្ច​កម្ពុជា​​ឲ្យ​រក្សា​បាន​នូវ​​កំ​ណើន​ប្រ​កប​​ដោយ​ភាព​រឹង​មាំ ដើម្បី​ឈាន​​ឆ្ពោះ​ទៅ​សម្រេច​បាន​នូវ​ចក្ខុ​វិ​ស័យ​ក្នុង​ការ​ប្រែ​ក្លាយ​កម្ពុជា​ទៅ​ជា​ប្រ​ទេស​មាន​ប្រាក់​ចំ​ណូល​មធ្យម​កម្រិត​ខ្ពស់​ក្នុង​ឆ្នាំ​ ២០៣០ និង​ឈាន​ទៅ​ជា​ប្រ​ទេស​មាន​ចំ​ណូល​ខ្ពស់​ក្នុង​ឆ្នាំ​ ២០៥០។

លោក​បញ្ជាក់​ថា​៖​​​ «​នេះ​ជា​វឌ្ឍន​ភាព​មួយ​នៃ​ការ​ ចូល​រួម​របស់​វិ​ស័យ​ឯក​ជន​ក្នុង​ការ​អនុ​វត្ត​ប្រ​កប​ដោយ​ផ្លែ​ផ្កា​នូវ​គោល​នយោ​បាយ​អភិ​វឌ្ឍន៍​​វិ​ស័យ​ឧស្សាហ​កម្ម​ឆ្នាំ​ ២០១៥​-​​២០២៥ របស់​រាជ​រដ្ឋា​ភិ​បាល​កម្ពុជា»។

លោក​បាន​បន្ត​ថា ការ​បង្កើត​ពា​ណិជ្ជ​កម្ម ​ដែល​មាន​ផលិត​ផល និង​សេ​វា​កម្ម​ក្នុង​វិ​ស័យ​ផ្សេង​ៗ​របស់​ក្រុម​ហ៊ុន​ ជីប​ ម៉ុង មិន​ត្រឹម​តែ​អាច​បង្កើត​ឱ​កាស​ការ​ងារ​ដ៏​ច្រើន​សន្ធឹក​សន្ទាប់​សម្រាប់​ប្រ​ជា​ពល​រដ្ឋ​ខ្មែរ​តែ​ប៉ុ​ណ្ណោះ​ទេ ប៉ុន្តែ​ថែម​ទាំង​អាច​ជួយ​រួម​ចំ​ណែក​ធ្វើ​ឲ្យ​ប្រ​ទេស​យើង​មាន​ផលិត​ផល​ក្នុង​ស្រុក​ដែល​មាន​ទាំង​គុណ​ភាព និង​តម្លៃ​សម​រម្យ​​ទៀត​ផង​​។

លោក ​យក់​ សុ​ធី​រិទ្ធ ប្រ​ធាន​គ្រប់​​គ្រង​ទូ​ទៅ​នៃ​ក្រុម​ហ៊ុន ​Worldbridge Homes Co., Ltd ដែល​កំ​ពុង​អភិ​វឌ្ឍន៍​លំ​នៅ​ឋាន​តម្លៃ​សម​រម្យ​ស្ថិត​ក្នុង​ស្រុក​ស្អាង​ ខេត្ត​កណ្តាល បាន​ស្វា​គមន៍​ចំ​ពោះ​ព័ត៌​មាន​នេះ ដោយ​លោក​លើក​ឡើង​ថា ជា​ការ​ល្អ​ណាស់​ដែល​កម្ពុជា​មាន​រោង​ចក្រ​​ផលិត​សម្ភារ​ផ្គត់​ផ្គង់​ដល់​វិ​ស័យ​​សំ​ណង់​ ខណៈ​វិ​ស័យ​ ១ ​​នេះ​​កំ​ពុង​មាន​ការ​រីក​ចម្រើ​ន​​យ៉ាង​ខ្លាំង។​

លោក​ថ្លែង​ថា៖​ «ការ​បង្កើត​រោង​ចក្រ​ក្នុង​ស្រុក​បែប​​នេះ​វា​នឹង​ផ្តល់​នូវ​ភាព​សម្បូរ​​បែប​ដល់​អ្នក​វិ​និ​យោគ និង​អ្នក​ប្រើ​ប្រាស់​ ខណៈ​កន្លង​មក​សម្ភារ​ ដែល​យើង​ប្រើ​ប្រាស់​​ភាគ​ច្រើ​ន​សុទ្ធ​តែ​នាំ​ចូល​មក​ពី​បរ​ទេស។ ដូ​ច្នេះ​ប្រ​សិន​បើ​យើង​អាច​ផលិត​​ក្នុង​ស្រុក​បាន វា​​នឹង​ជួយ​ជំ​រុញ​ឲ្យ​​វិ​ស័យ​សំ​ណង់​នៅ​កម្ពុជា​ឲ្យ​កាន់​តែ​រីក​ចម្រើន​លឿន​បន្ថែម​ទៀត​»។

ទាក់​ទង​នឹង​គម្រោង​លំ​នៅ​ឋាន​របស់​ក្រុម​ហ៊ុន Worldbridge Homes Co., Ltd លោក សុ​ធី​រិទ្ធ បាន​ប្រាប់​ថា ក្រុម​ហ៊ុន​របស់​លោក​ប្រើ​​ប្រាស់​​ទាំង​ផលិត​ផល​ក្នុង​ស្រុក និង​នាំ​ចូល​។ ​លោក​បញ្ជាក់​ថា៖ ​«ខ្ញុំ​​​មាន​សុ​ទិ​ដ្ឋិ​និ​យម​ថា ​ប្រ​សិន​បើ​ការ​ផលិត​ផលិត​ផល​ក្នុង​ស្រុក​របស់​​យើង​​មាន​ការ​ត្រួត​ពិ​និត្យ​គុណ​ភាព​ និង​ស្តង់​ដារ​ត្រឹម​ត្រូវ​នោះ​​នឹង​ទទួល​បាន​ជា​មិន​ខាន​»​​។​

កាល​ពី​ដើម​ខែ​កុម្ភៈ ​ឆ្នាំ​ ២០​១៨ នេះ​ក្រុម​ហ៊ុន​ ជីប ​ម៉ុង​ គ្រុប​ ក៏​បាន​​បើក​សម្ពោធ​រោង​ចក្រ​ផលិត​ស៊ី​ម៉ងត៍​របស់​ខ្លួន​ដែល​​​ស្ថិត​ក្នុង​ស្រុក​បន្ទា​យ​​មា​ស​ខេត្ត​កំ​ពត​​។

រោង​ចក្រ​​នេះ​​សាង​សង់​​លើ​ផ្ទៃ​ដី​ទំ​ហំ​ជាង​​ ១១​០ ហិក​តា​ជា​​ការ​វិនិ​យោគ​​​ដោយ​ស​ហ​ការ​ជា​មួយ​​ក្រុម​ហ៊ុន​ស្យ៉ា​ម​​ ស៊ី​​ធី​ ស៊ី​មេន​របស់​​ប្រ​ទេស​ ថៃ ក្នុង​តម្លៃ​​ស​រុ​​ប​ ២៦២ ​លាន​ដុល្លារ​។

រោង​​ចក្រ​នេះ​​មាន​សមត្ថ​ភាព​​អាច​ផលិត​​ស៊ី​ម៉​ង​ត៍​បាន​ ៥,០០០ តោន​ក្នុង​​ ១ ​ថ្ងៃ ឬ​ស្មើ​នឹង ១,៧ លាន​តោន​ក្នុង​ ១ ឆ្នាំ​៕ LA

អត្ថបទគួរចាប់អារម្មណ៍