.jpg)
លោក កែវ រតនៈ (ទី៥ រាប់ពីឆ្វេង) អំឡុងពេលទៅទស្សនកិច្ចរោងចក្រផលិតដែកថែបរបស់ក្រុមហ៊ុន ហុង ឌី សេង (ខេមបូឌា) ស្ទីល ឯ.ក កាលពីខែកញ្ញា។ រូបថត សហការី
ភ្នំពេញៈ រោងចក្រផលិតដែកថែបរបស់ក្រុមហ៊ុន ហុងឌីសេង (ខេមបូឌា) ស្ទីល ឯ.ក ដែលវិនិយោគដោយវិនិយោគិនចិនក្នុងទឹកប្រាក់ប្រមាណ ១៦,៧ លានដុល្លារនៅក្នុងស្រុកឧដុង្គ ខេត្តកំពង់ស្ពឺបានប្រកាសចាប់ផ្ដើមប្រតិបត្តិការនៅខែធ្នូនេះ។
លោក Lin Xiangrong ប្រធានក្រុមហ៊ុន ហុង ឌី សេង (ខេមបូឌា) ស្ទីល ឯ.ក បានឱ្យដឹងក្នុងអំឡុងកិច្ចប្រជុំជាមួយលោក កែវ រតនៈ អគ្គនាយកអគ្គិសនីកម្ពុជា កាលពីថ្ងៃទី ២៧ ខែវិច្ឆិកាថា បន្ទាប់ពីការសាងសង់រយៈពេល ១ ឆ្នាំក្រុមហ៊ុន ហុង ឌី សេង បានឈានចូលក្នុងដំណាក់កាលធ្វើតេស្តនូវគុណភាព។
លោកបន្ថែមថា ក្រុមហ៊ុននឹងដាក់ឱ្យប្រតិបត្តិការជាផ្លូវការនៅខែនេះ ដោយមានទិន្នផលប្រចាំឆ្នាំ ៥០០ ០០០ តោននៅក្នុងដំណាក់កាលដំបូង។
លោក Lin Xiangrong បានកត់សម្គាល់ថា៖ «ថ្មីៗនេះ នាយកដ្ឋានអគ្គិសនីបានបញ្ចប់រួចរាល់នូវការបញ្ជូនថាមពលផ្គត់ផ្គង់ដល់រោងចក្ររបស់យើង និងកំពុងស្ថិតក្នុងដំណាក់កាលដាក់ឱ្យដំណើរការដ៏ទូលំទូលាយចុងក្រោយ ដើម្បីធានាថា រោងចក្រនេះអាចដំណើរការផលិតដោយរលូន និងលក់ផលិតផលដល់ទីក្រុងនានានៅកម្ពុជា»។
លោកថ្លែងថា៖ «ក្រុមហ៊ុនសូមថ្លែងអំណរគុណចំពោះ EDC សម្រាប់ការគាំទ្ររបស់ខ្លួនដល់រោងចក្ររបស់យើងក្នុងរយៈពេលវែង»។
កាលពីខែកញ្ញា លោក កែវ រតនៈ អគ្គនាយកអគ្គិសនីកម្ពុជា EDC បានចុះទៅពិនិត្យក្រុមហ៊ុនដោយផ្ទាល់ និងបានសន្យាថា នឹងគាំទ្រយ៉ាងពេញទំហឹងដល់តម្រូវការថាមពលរបស់ក្រុមហ៊ុននេះ។
ក្នុងអំឡុងពេលកិច្ចប្រជុំនោះលោកក៏បានឱ្យដឹងថា ការសាងសង់របស់ក្រុមហ៊ុននឹងជួយលើកកម្ពស់ប្រតិបត្តិការសេដ្ឋកិច្ច និងពាណិជ្ជកម្មរវាងប្រទេសចិន និងកម្ពុជាផងដែរ។
លោកថ្លែងថា៖ «ខ្ញុំសង្ឃឹមថា យើងអាចនាំយកក្រុមវិនិយោគិនជនជាតិចិនកាន់តែច្រើនចូលមកវិនិយោគនៅប្រទេសកម្ពុជា និងកសាងអនាគតកាន់តែប្រសើរសម្រាប់ប្រទេសកម្ពុជា។ កិច្ចខិតខំប្រឹងប្រែងរួមរបស់ប្រទេសទាំង ២ នេះច្បាស់ណាស់នឹងនាំមកថ្ងៃអនាគតកាន់តែប្រសើរសម្រាប់ប្រជាជនចិន និងប្រជាជនកម្ពុជា»។
លោក យស មុនីរ៉ាត់ អគ្គនាយកនៃអគ្គនាយកដ្ឋានធនធានរ៉ែនៃក្រសួងរ៉ែ និងថាមពលបានប្រាប់ភ្នំពេញប៉ុស្ដិ៍កាលពីខែកញ្ញាថា រោងចក្រនេះនឹងជួយកាត់បន្ថយការនាំចូលដែកថែបពីបរទេស។
លោកបានបញ្ជាក់ថា៖ «យើងស្វាគមន៍ និងគាំទ្រការបង្កើតរោងចក្រផលិតដែកថែប ដើម្បីកែច្នៃសំណល់លោហធាតុ សម្រាប់ការប្រើប្រាស់ក្នុងស្រុក»។
ក្រុមហ៊ុននេះភាគច្រើនផលិតផលិតផលដូចជា ខ្សែលួស ដែកថ្នាំងអំពៅ និងដែកសរសៃដើម្បីបម្រើទីផ្សារសំណង់កម្ពុជា។
ទិន្នន័យពីអគ្គនាយកដ្ឋានគយ និងរដ្ឋាករនៃក្រសួងសេដ្ឋកិច្ច និងហិរញ្ញវត្ថុបង្ហាញថា កម្ពុជាបាននាំចូលសម្ភារសំណង់មានតម្លៃ ៥៦៥,៩១ លានដុល្លារនៅឆមាសទី ១ ឆ្នាំនេះ ខណៈការនាំចូលមានតម្លៃជាង ១,៥១ ពាន់លានដុល្លារក្នុងឆ្នាំ ២០១៩។
បើធ្វើការបែងចែកទៅតាមប្រភេទ កម្ពុជាបាននាំចូលដែកថែបក្នុងបរិមាណ ២១៧ ១៥១ តោនមានតម្លៃ ១៤០,៨ លានដុល្លារ ស៊ីម៉ងត៍ ៦៨១ ៨១៧ តោន មានតម្លៃ ៤៣,២៧ លានដុល្លារ និងសម្ភារសំណង់ចំនួន ៦៧២ ៧៨៥ តោនមានតម្លៃ ៣៨១,៨៤ លានដុល្លារ។
ក្នុងរយៈពេលពេញមួយឆ្នាំ ២០១៩ កម្ពុជាបាននាំចូលដែកថែប ៧២២ ៦២១ តោនមានតម្លៃ ៤៧៧,១៩ លានដុល្លារ ស៊ីម៉ងត៍ ១,៩៧ លានតោន មានតម្លៃ១២៨,៨៥ លានដុល្លារ និងសម្ភារសំណង់ ១,៧ លានតោន មានតម្លៃ ៩០០,៥១ លានដុល្លារ៕ LA
