.jpg)
លោក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ និងមេបញ្ជាការកងទ័ពជើងគោក បានចូលរួមក្នុងពិធីសម្ពោធជាផ្លូវការនូវរោងចក្រ រ៉ូសប្លាស្ទិក (ខេមបូឌា) កាលពីសប្ដាហ៍មុន។ រូបថត ហ្វេសប៊ុក
ភ្នំពេញៈ រោងចក្រផលិតបំពង់ទុយោទឹក រ៉ូសប្លាស្ទិក (ខេមបូឌា) ដែលកាន់កាប់ដោយវិនិយោគិនក្នុងស្រុកបានបើកសម្ពោធជាផ្លូវការកាលពីថ្ងៃអាទិត្យ ដើម្បីបំពេញសេចក្តីត្រូវការក្នុងស្រុកដែលកំពុងកើនឡើងក្នុងវិស័យសំណង់។
រោងចក្រដែលមានទីតាំងស្ថិតនៅក្នុងភូមិពោងទឹក ខណ្ឌដង្កោ រាជធានីភ្នំពេញ បានបើកដំណើរការសាកល្បងនឹងដាក់លក់ផលិតផលដែលផលិតចេញពីរោងចក្រនេះជាង ១ ឆ្នាំមកហើយ ខណៈវត្តមាននៃរោងចក្រនេះត្រូវបានគេរំពឹងថានឹងកាត់បន្ថយការនាំចូល។
លោក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ និងមេបញ្ជាការកងទ័ពជើងគោកបានថ្លែងក្នុងពិធីសម្ពោធជាផ្លូវការនូវរោងចក្រ រ៉ូសប្លាស្ទិក (ខេមបូឌា) នេះថា ការបង្កើតរោងចក្រនេះគឺឆ្លុះបញ្ចាំងយ៉ាងច្បាស់អំពីទំនុកចិត្តរបស់អ្នកវិនិយោគជាតិ និងអន្តរជាតិមកលើការដឹកនាំរបស់រាជរដ្ឋាភិបាលកម្ពុជា។ លោកបន្តថា រោងចក្រនេះមិនត្រឹមតែបង្កើតឡើងដើម្បីបំពេញតម្រូវការផ្គត់ផ្គង់ក្នុងស្រុកប៉ុណ្ណោះទេ ប៉ុន្តែវាក៏អាចធ្វើការប្រកួតប្រជែងជាមួយនឹងផលិតផលនាំចូលផងដែរ។
លោកថ្លែងថា៖ «ការបង្កើតរោងចក្រឧស្សាហកម្មផលិតទុយោ និងបំពង់ទីបជ័រ របស់ រ៉ូសប្លាស្ទិក (ខេមបូឌា) នាពេលនេះបង្ហាញថា ការវិនិយោគក្នុងស្រុកពិតជាបានចូលរួមចំណែកយ៉ាងសំខាន់ក្នុងភាពជាដៃគូជាមួយរាជរដ្ឋាភិបាល នៅក្នុងការជំរុញការអភិវឌ្ឍវិស័យឧស្សាហកម្ម និងការលើកកម្ពស់សហគ្រិនភាពក្នុងវិស័យឯកជនដើម្បីស្ថិរភាពនៃកំណើនសេដ្ឋកិច្ចជាតិព្រមទាំងការលើកស្ទួយកិត្យានុភាពជាតិនៅលើឆាកអន្តរជាតិតាមរយៈសា្លកយីហោផលិតក្នុងស្រុក»។
បុគ្គលិកម្នាក់របស់រោងចក្រនេះបានប្រាប់ភ្នំពេញប៉ុស្តិ៍ក្នុងលក្ខខណ្ឌសុំមិនបញ្ចេញឈ្មោះថា រោងចក្ររបស់ខ្លួនផលិតនូវរាល់ផលិតផលទុយោទឹកគ្រប់ប្រភេទដើម្បីផ្គត់ផ្គង់ទីផ្សារក្នុងស្រុកដែលជាការឆ្លើយតបទៅនឹងការការកើនឡើងនៃតម្រូវការក្នុងវិស័យសំណង់ដែលកំពុងកើនឡើង។
បុគ្គលិករូបនេះបានថ្លែងថា៖ «រោងចក្ររបស់យើងកំពុងផលិតនូវផលិតផលទុយោទឹកនានាដាក់លក់លើទីផ្សារ ហើយកំពុងទទួលបានការពេញនិយម និងទទួលស្គាល់នូវគុណភាពនៃផលិតផលយើង»។ ទោះបីយ៉ាងនេះក្តីលោកពុំបានបង្ហាញពីសមត្ថភាពនៃការផលិតរបស់រោងចក្រនេះទេ។
លោក ហ៊ុន ម៉ាណែត បានឲ្យដឹងថា តាមការខិតខំរបស់ក្រុមហ៊ុនរហូតទទួលបាននូវវិញ្ញាបនបត្រស្តង់ដាអន្តរជាតិ ISO បានបញ្ជាក់អំពីការយកចិត្តទុកដាក់របស់ស្ថាបនិកក្រុមហ៊ុនលើគុណភាពនៃផលិតផលដែលក្រៅពីការផ្គត់ផ្គង់នៅលើទីផ្សារក្នុងស្រុកដែលកំពុងមានតម្រូវការខ្លាំង ក្រុមហ៊ុនក៏មានទស្សនវិស័យក្នុងការនាំចេញផលិតផលនេះទៅក្នុងទីផ្សារអន្តរជាតិផងដែរ ដោយក្រុមហ៊ុនអាចសាកល្បងសម្លឹងមើលទីផ្សារអនុតំបន់មេគង្គ ទីផ្សារអាស៊ាន និងទីផ្សារនៅក្នុងតំបន់នៃកិច្ចព្រមព្រៀងភាពជាដៃគូសេដ្ឋកិច្ចទូលំទូលាយ ក៏ដូចជាទីផ្សារធំៗដទៃទៀតក្នុងពិភពលោក។
លោកបានថ្លែងថា៖ «សក្តានុពលនេះ គឺជាតំណាងសក្ខីភាពនៃការរីកចម្រើនរួមគ្នារបស់យើង ដែលឆ្លុះបញ្ចាំងតាមរយៈកំណើនសេដ្ឋកិច្ចខ្ពស់ក្នុងរយៈពេល ២០ ឆ្នាំជាប់គ្នា។ កំណើនបែបនេះគឺមិនមែនកើតឡើងដោយងាយស្រួលឥតហេតុនោះទេ គឺជាលទ្ធផលនៃការបូកបញ្ចូលគ្នានៃកំណើនលើគ្រប់វិស័យទាំងអស់ ទាំងកម្រិតជីវភាពរស់នៅរបស់ប្រជាជន មន្ត្រីរាជការ កងកម្លាំងប្រដាប់អាវុធ សង្គមស៊ីវិល និងវិស័យឯកជន»។
កាលពីខែមករាក្រុមហ៊ុន Chip Mong Industry ដែលជាបុត្រសម្ព័ន្ធ Chip Mong Group ក៏បានបើកដំណើរការជាផ្លូវការនូវរោងចក្រផលិតបំពង់ទុយោទឹកគ្រប់មុខផងដែរ ដែលមានសមត្ថភាពផលិតក្នុងរង្វង់ ៥ ពាន់តោនក្នុង ១ ខែ៕
