The Phnom Penh Post Search

Search form




Logo of Phnom Penh Post newspaper Phnom Penh Post - រោងចក្រ​ផលិត​ឥដ្ឋ​តម្លៃ ៩ ​លាន​ដុល្លារ បើក​នៅ​កំពត

រោងចក្រ​ផលិត​ឥដ្ឋ​តម្លៃ ៩ ​លាន​ដុល្លារ បើក​នៅ​កំពត

Content image - Phnom Penh Post
លោក ជាវ តាយ អភិបាល​ខេត្តកំពត​ ក្នុងពិធីសម្ពោធរោងចក្រ​ផលិត​ឥដ្ឋ​កាលពីថ្ងៃទី ២២ វិច្ឆិកា។ រូបថត រដ្ឋបាលខេត្តកំពត

រោងចក្រ​ផលិត​ឥដ្ឋ​តម្លៃ ៩ ​លាន​ដុល្លារ បើក​នៅ​កំពត

កំពតៈ រោងចក្រ​ផលិត​ឥដ្ឋ​ដ៏ធំ​មួយ​ក្នុង​ខេត្តកំពត ដែល​មាន​ទុនវិនិយោគ ៩ ​លាន​ដុល្លារ​ជា​ការវិនិយោគ​រួមគ្នា​រវាង​វិនិយោគិន​ក្នុងស្រុក និង​វិនិយោគិន​មកពី​ប្រទេស​ចិន​បាន​សម្ពោធ​បើក​ដំណើរការ​ជា​ផ្លូវការ​ហើយ​កាលពី​ថ្ងៃអាទិត្យ ដោយ​អាចមាន​សមត្ថភាព​ផលិត​ឥដ្ឋ​បាន​ប្រមាណ ៨០ ​ម៉ឺន​ដុំ​ ក្នុង​ ១ ​ថ្ងៃ​។

រោងចក្រ​នេះ​ត្រូវបាន​បំពាក់​បច្ចេកវិទ្យា​ទំនើបៗ និង​មាន​ខ្សែចង្វាក់​ផលិតកម្ម​ស្វ័យប្រវត្តិ​។ នៅក្នុង​ដំណាក់កាល​ដំបូង រោងចក្រ​នេះ​នឹង​ប្រើប្រាស់​កម្លាំង​ពលកម្ម ១៧០ ​នាក់​។ រោងចក្រ​នេះ​មាន​ផ្ទៃដី​ទំហំ ៤០ ​ហិកតា​ ស្ថិត​ក្នុងស្រុក​អង្គរជ័យ ខេត្ត​កំពត​។

អភិបាល​ខេត្តកំពត​លោក ជាវ តាយ បាន​ថ្លែង​ក្នុងពេល​ចូលរួម​សម្ពោធ​រោងចក្រ​នេះ​ថា នេះ​គឺជា​សមិទ្ធផល​ថ្មី​ទៀត​ដែល​ខេត្តកំពត​សម្រេចបាន​ដើម្បី​រួមចំណែក​លើកតម្កើង​ផលិតផល​ក្នុងស្រុក បង្កើត​ការងារ​ថ្មីៗ​សម្រាប់​ប្រជាជន​ក្នុង​តំបន់​ព្រមទាំង​កាត់បន្ថយ​ការនាំចូល​ដុំឥដ្ឋ​ពី​ប្រទេស​ជិតខាង​បាន​មួយចំនួន​ផងដែរ​។

លោក​ថ្លែងថា​៖ «​នេះ​ជា​ការរួមចំណែក​យ៉ាង​ធំធេង​ពី​វិស័យ​ឯកជន​ក្នុង​ការអភិវឌ្ឍ​សេដ្ឋកិច្ច​របស់​កម្ពុជា ជាពិសេស​វិស័យ​សំណង់​ក្នុង​ខេត្ត​ឱ្យមាន​កំណើន​ឡើង​ជា​លំដាប់ ហើយ​ក៏បាន​បង្កើត​ឱកាស​ការងារ​ជូន​ប្រជាពលរដ្ឋ​ក្នុង​មូលដ្ឋាន និង​បង្កើន​ប្រាក់ចំណូល​ជូន​ប្រជាពលរដ្ឋ​នៅ​តំបន់​នេះ ដែល​រួមចំណែក​ក្នុង​ការលើកកម្ពស់​ជីវភាព​រស់នៅ​របស់​ប្រជាជន​យើង​»​។

លោក​ក៏បាន​ណែនាំ​ឱ្យ​ម្ចាស់​ក្រុមហ៊ុន​ផលិត​ឥដ្ឋ ត្រូវ​រៀបចំ​ធ្វើយ៉ាងណា​ឱ្យ​ផលិតផល​របស់ខ្លួន​ធានា​បាន​នូវ​គុណភាព​កម្រិត​ស្តង់ដា ការបង្កើត​ឱ្យ​មាន​ឈ្មោះ និង​ដាក់​រូប​ឡូហ្គោ​នៅលើ​ផលិតផល​របស់ខ្លួន​ឱ្យបាន​ច្បាស់លាស់​ផងដែរ​។

ម្ចាស់​រោងចក្រ​ផលិត​ឥដ្ឋ​ខាងលើ​លោក លី គីមវុន បាន​ប្រាប់​ ភ្នំពេញ ​ប៉ុស្តិ៍​ កាលពី​ថ្ងៃ​ចន្ទ​ថា នេះ​ជា​រោងចក្រ​ផលិត​ឥដ្ឋ​ធំ​ទី​ ១ ​ក្នុង​ខេត្តកំពត ដែល​ប្រើប្រាស់​នូវ​បច្ចេកវិទ្យា​ទំនើបៗ ខណៈ​រោងចក្រ​នេះ​នឹង​ផ្តល់​ផល​វិជ្ជមាន​ជាច្រើន​សម្រាប់​សេដ្ឋកិច្ច​ជាតិ តាមរយៈ​ការបង្កើត​ការងារ និង​ជួយ​បំពេញ​តម្រូវការ​ក្នុងស្រុក​។

លោក​បន្តថា ជាមួយ​នឹង​វត្ថុធាតុដើម​នៅក្នុង​ស្រុក​ផ្ទាល់ លោក​រំពឹងថា ដំណើរការ​ផលិត គុណភាព និង​ការចែកចាយ​លើ​ទីផ្សារ​នឹង​មាន​ភាពទូលំទូលាយ ពិសេស​ក្នុង​ខេត្តកំពត និង​ខេត្ត​ជិតខាង​។

លោក​និយាយថា​៖ «​បច្ចុប្បន្ន​រោងចក្រ​អាច​ផលិត​ឥដ្ឋ​បាន ៨០ ​ម៉ឺន​ដុំ​ ក្នុង​ ១ ​ថ្ងៃ ប៉ុន្តែ​បើ​មាន​តម្រូវការ​ខ្ពស់ យើង​នឹង​បង្កើន​ការផលិត​បន្ថែមទៀត​»​។

លោក ហ៊ុយ វណ្ណា អគ្គលេខាធិការ​នៃ​សមាគម​អ្នក​អភិវឌ្ឍន៍​លំនៅឋាន​កម្ពុជា បាន​ស្វាគមន៍​ចំពោះ​ការបើក​ដំណើរការ​រោងចក្រ​ផលិត​ឥដ្ឋ​ដ៏ធំ​នេះ​ដោយ​លោក​និយាយ​ថា ការស្ទុះ​ឡើង​នៃ​វិស័យ​សំណង់​បាន​ជំរុញ​ឱ្យ​ប្រទេស​កម្ពុជា​នាំចូល​សម្ភារ​សំណង់​ស្ទើរ​គ្រប់មុខ​ពី​បរទេស​ក្នុង​នោះ​ក៏មាន​ឥដ្ឋ​ផងដែរ​។

លោក​បន្ថែមថា ខណៈ​វិស័យ​សំណង់​នៅ​កម្ពុជា​នឹង​នៅ​បន្ត​មាន​កំណើន​ជា​បន្តទៀត​នោះ ការជំរុញ​ឱ្យ​មាន​ការបង្កើត​រោងចក្រ​ផលិត​ក្នុង​ស្រុក​កាន់តែ​ច្រើន វា​នឹង​ជួយ​រួមចំណែក​យ៉ាងច្រើន​ដល់​ការលើកកម្ពស់​កំណើនសេដ្ឋកិច្ច​ជាតិ​។

លោក​និយាយថា​៖ «​បច្ចុប្បន្ន​កម្ពុជា​នាំចូល​ឥដ្ឋ​ពី​ក្រៅប្រទេស​ក្នុង​បរិមាណ​ច្រើន​គួរសម​យកមក​បំពេញ​តម្រូវការ​ក្នុងស្រុក ដូច្នេះ​បើ​យើង​មាន​រោងចក្រ​ដែល​អាច​ផលិត​ក្នុងស្រុក​បាន​ច្រើន​នោះ គឺជា​ការល្អ​ណាស់​។ ម្យ៉ាងទៀត​ការផលិត​ក្នុង​ស្រុក​ គឺ​មិន​ត្រឹមតែ​អាចបង្កើត​ការងារ​សម្រាប់​ប្រជាជន​ប៉ុណ្ណោះ​ទេ ប៉ុន្តែ​វា​ថែមទាំង​អាច​មាន​តម្លៃ​ធូរ​ថ្លៃ​ផងដែរ​»៕ LA

អត្ថបទគួរចាប់អារម្មណ៍

  • ខេត្តបាក់និញៈ សួនឧស្សាហ​កម្ម​ Yen Phong 1 Industrial Park នៅខេត្ត Bac Ninh ភាគខាងជើង​បាន​ក្លាយជា​​សួនឧស្សាហ​កម្មលើក​ដំបូង​នៅក្នុងប្រទេស​វៀតណាម ដែលទទួល​បាន​​បណ្ដាញ​ទូរគមនា​គមន៍​ 5G ដោយ​បច្ចេកវិទ្យាថ្មីនេះ​​ បានដាក់​​ឲ្យដំណើរការ​នៅទីតាំងនោះ​ដោយ​ក្រុមហ៊ុន Viettel កាល​ពីថ្ងៃព្រហស្បតិ៍។​​

  • ភ្នំពេញៈ កម្ពុជា​នាំចេញ​ទំនិញ​ទៅ​ទីផ្សារ​អាមេរិក​មានតម្លៃ​ជាង ៦ ​ពាន់​លាន​ដុល្លារ​ ក្នុង​រយៈពេល​ ១១ ​ខែ ឆ្នាំ​ ២០២០ កើន​ជាង ២២ ​ភាគរយ​ធៀបនឹង​រយៈពេល​ដូចគ្នា​ឆ្នាំ​ ២០១៩ ខណៈ​ទំហំ​ពាណិជ្ជកម្ម​ទ្វេភាគី​មានតម្លៃ​ជាង ៦,៣ ​ពាន់​លាន​ដុល្លារ​។ នេះ​បើ​យោងតាម​ទិន្នន័យ​ពី​ការិយាល័យ​ពាណិជ្ជកម្ម​អាមេរិក​។

  • ភ្នំពេញៈ ត្រឹម​រយៈពេល​ជិត​ ១ ​ខែ​ប៉ុណ្ណោះ​ចាប់ពី​ថ្ងៃទី​ ២០ ធ្នូ ដល់​ថ្ងៃទី​ ១៧ មករា ពលករ​ខ្មែរ​ដែល​បាន​វិលត្រឡប់​មកពី​ប្រទេស​ថៃ​តាម​ច្រក​នៃ​បណ្តា​ខេត្ត​ជាប់​ព្រំដែន​កម្ពុជា-ថៃ​ចំនួន​ ៦៩ ​នាក់ ​ត្រូវបាន​រកឃើញ​វិជ្ជមាន​កូវីដ​ ១៩ ដោយ​ក្នុង​នោះ​ពលករ​ដែល​បាន​ព្យាបាល​ជាសះស្បើយ​ ២១ ​នាក់​។

  • ស្ទឹងត្រែងៈ កម្លាំង​នគរបាល​ប្រឆាំង​គ្រឿងញៀន​គ្រោង​នឹង​បញ្ជូន​បុរស​ជនជាតិ​ឡាវ​​ ២ ​នាក់ និង​វត្ថុតាង​គ្រឿងញៀន​ជិត​ ៥០ ​គីឡូក្រាម​ទៅ​តុលាការ​នៅ​ព្រឹក​ថ្ងៃ​ចន្ទ​នេះ​ ខណៈ​ដែល​សមត្ថកិច្ច​កម្ពុជា​កំពុង​សហការ​ជាមួយ​សមត្ថកិច្ច​ឡាវ​ ដើម្បី​តាម​រក​ចាប់ខ្លួន​ជនជាតិ​ឡាវ​ ៤ ​នាក់​ទៀត​ដែល​រត់គេចខ្លួន​។

  • ភ្នំពេញៈ លោក ហង់ជួន ណារ៉ុន រដ្ឋមន្ត្រី​ក្រសួង​អប់រំ ​យុវជន និង​កីឡា​បាន​ដឹកនាំ​កិច្ចប្រជុំ​ដាក់​ចេញ​វិធានការ​បន្ថែម​ដល់​សាលារៀន​ដែល​កំពុង​ត្រូវបាន​ប្រើប្រាស់​ជា​មណ្ឌល​ចត្ដាឡីស័ក ពិសេស​សាលារៀន​តាម​ខេត្ដ​ជាប់​ព្រំដែន​ប្រទេស​ថៃ និង​វៀតណាម​ដើម្បី​ធ្វើយ៉ាងណា​ធានា​ផ្ដល់​ការសិក្សា​ដល់​សិស្ស​គ្រប់គ្នា​ក្នុង​ឆ្នាំ​សិក្សា​ថ្មី​នេះ​។

  • ភ្នំពេញៈ លោក​ឧបនាយករដ្ឋមន្ត្រី ស ខេង រដ្ឋមន្ត្រី​ក្រសួង​មហាផ្ទៃ​បាន​ណែនាំ​ឱ្យ​អាជ្ញាធរ​គ្រប់លំដាប់​ថ្នាក់​លុបបំបាត់​ការបង្ក​សំឡេង​រំខាន​លើស​កម្រិត​ដោយ​យានយន្ដ​គ្រប់​ប្រភេទ និង​លុបបំបាត់​កន្លែង​កែច្នៃ​បំពង់​ស៊ី​ម៉ាំង​ដែល​បង្ក​ភាព​រំខាន​ដល់​អារម្មណ៍ និង​សិទ្ធិ​រស់នៅ​របស់​ពលរដ្ឋ