ភ្នំពេញៈ រោងចក្រផលិតស៊ីម៉ងត៍ក្រោមការវិនិយោគ ១១០ លានដុល្លារ នៅខេត្តកំពតបានដំណើរការជាផ្លូវការកាលពីថ្ងៃព្រហស្បតិ៍ ដោយអាចផលិតបាន ១ លានតោនក្នុង ១ ឆ្នាំ។
រោងចក្រនេះក្លាយជារោងចក្រស៊ីម៉ងត៍ទី ៥ នៅក្នុងប្រទេស កម្ពុជា ដើម្បីជាការឆ្លើយតបទៅនឹងការអភិវឌ្ឍយ៉ាងរហ័សនៃវិស័យសំណង់។
លោក ស៊ុយ សែម រដ្ឋមន្ដ្រីក្រសួងរ៉ែ និងថាមពលបានឲ្យដឹងក្នុងពិធីដែលចូលរួមបើកដោយលោកនាយករដ្ឋមន្ត្រី ហ៊ុន សែន ថា គម្រោងវិនិយោគនេះត្រូវបានអភិវឌ្ឍលើផ្ទៃដី ៦៧៨,៤ ហិកតា ក្នុងស្រុកដងទុង ខេត្តកំពតដោយរោងចក្រនេះស្ថិតលើផ្ទៃដីទំហំ ៩១ ហិកតា ជាមួយនឹងទុនវិនិយោគប្រហែល ១១០ លានដុល្លារ ជាការវិនិយោគរួមរវាងក្រុមហ៊ុនក្នុងស្រុក ថៃ ប៊ុនរ៉ុង ស៊ីម៉ងត៍ និងវិនិយោគិនចិន។
រោងចក្រនេះអាចផលិតស៊ីម៉ងត៍បានប្រហែល ២ ៥០០ តោន ក្នុង ១ ថ្ងៃ ឬស្មើនឹង ១ លានតោន ក្នុង ១ ឆ្នាំ។ រោងចក្រនេះផលិតស៊ីម៉ងត៍ចំនួន ២ ប្រភេទ គឺស៊ីម៉ងត៍បាវ និងស៊ីម៉ងត៍សម្រាប់បូក។
លោក ស៊ុយ សែម បានថ្លែងថា៖ «ពិតហើយ យើងមានការផ្គត់ផ្គង់គ្រប់គ្រាន់សម្រាប់ឆ្នាំ ២០១៨ និងឆ្នាំ ២០១៩ ប៉ុន្តែចំនួនអគារ និងហេដ្ឋារចនាសម្ព័ន្ធ កំពុងកើនឡើងយ៉ាងខ្លាំងចាប់ពីឆ្នាំ ២០១៨ រហូតដល់ចុងឆ្នាំ ២០១៩ ដែលធ្វើឲ្យតម្រូវការស៊ីម៉ងត៍ផលិតនៅក្នុងស្រុកមិនគ្រប់គ្រាន់ និងតម្រូវឲ្យមានការនាំចូលមួយចំនួនពីប្រទេសជិតខាង ដើម្បីឆ្លើយតបនឹងតម្រូវការ»។
លោកនាយករដ្ឋមន្ដ្រី ហ៊ុន សែន ដែលបានធ្វើជាអធិបតីក្នុងពិធីដាក់ឲ្យដំណើរការនេះបានឲ្យដឹងថា រោងចក្រស៊ីម៉ងត៍ថ្មីនេះគឺជាសមិទ្ធផលថ្មីរបស់រដ្ឋាភិបាលក្នុងការទាក់ទាញការវិនិយោគមកប្រទេសនេះ។
លោកបានថ្លែងថា៖ «ខ្ញុំក៏ចង់ប្រកាសថា យើងនឹងប្រើប្រាស់ស៊ីម៉ងត៍កាន់តែច្រើន ដើម្បីសាងសង់ផ្លូវថ្នល់ផ្សេងទៀតនៅក្នុងប្រទេសនេះ ទាំងនៅទីក្រុង និងតំបន់ជនបទ»។
លោកនាយករដ្ឋមន្ដ្រីបន្តថា៖ «ខ្ញុំសូមសរសើរដល់ក្រុមហ៊ុន ថៃ ប៊ុនរ៉ុង សម្រាប់ការសាសង់រោងចក្រស៊ីម៉ងត៍នៅទីនេះក្នុងការរួមចំណែកសម្រាប់ការប្រើប្រាស់ និងកំណើនសេដ្ឋកិច្ចជាតិ។ ខ្ញុំសូមកោតសរសើរដល់អាជ្ញាធរពាក់ព័ន្ធ ពិសេសខេត្តកំពតក្នុងការជួយសម្រួលដល់ការបង្កើតរោងចក្រស៊ីម៉ងត៍នៅថ្ងៃនេះ»។
លោកបន្ថែមថា៖ «រោងចក្រស៊ីម៉ងត៍ថ្មីនេះនឹងមិនគ្រាន់តែរួមចំណែកដល់កំណើនតម្រូវការបច្ចុប្បន្នសម្រាប់វិស័យសំណង់ប៉ុណ្ណោះទេ ប៉ុន្តែថែមទាំងការបង្កើតការងារសម្រាប់ប្រជាជនរបស់យើងផងដែរ»។
លោក ហឹម សីហា នាយកផ្នែកស្រាវជ្រាវនៅក្រុមហ៊ុន VTrust Appraisal បានប្រាប់ភ្នំពេញប៉ុស្ដិ៍នៅពេលថ្មីៗនេះថា ការកើនឡើងផ្នែកសំណង់បង្កើតតម្រូវការជាច្រើនលើសម្ភារៈសំណង់នៅក្នុងរយៈពេលប៉ុន្មានឆ្នាំថ្មីៗនេះ។ លោកបញ្ជាក់ថា៖ «យើងមើលឃើញវិស័យសំណង់យើង កំពុងរីកដុះដាលដូចផ្សិតគ្រប់ទីកន្លែងនៅពេលនេះ ពិសេសនៅទីក្រុងភ្នំពេញដែលមានខុនដូ ផ្ទះល្វែង និងលំនៅឋានជាច្រើនដែលត្រូវការតម្រូវការជាច្រើនលើទីផ្សារសម្ភារសំណង់»។
លោក ស៊ុយ សែម ឲ្យដឹងថា ត្រឹមចុងឆ្នាំ ២០១៩ កម្ពុជាមានរោងចក្រស៊ីម៉ងត៍៥ ដែលស្រូបយកបុគ្គលិកប្រហែល ២ ៧០០ នាក់ និងអាចមានសមត្ថភាពការផលិត ៨ លានតោន ជាមួយនឹងទុនវិនិយោគចំនួន ៨០០ លានដុល្លារ៕ LA