.jpg)
បាត់ដំបងៈ រោងចក្រផលិតស៊ីម៉ងត៍ដំបូងដែលវិនិយោគ ២៣០ លានដុល្លារ នៅក្នុងខេត្តបាត់ដំបងបានបើកដំណើរការពីថ្ងៃម្សិលមិញដែលអ្នកនៅក្នុងឧស្សាហកម្មនេះរំពឹងថានឹងកាត់បន្ថយការនាំចូលពីក្រៅប្រទេសកាន់តែច្រើន។
រោងចក្រផលិតស៊ីម៉ងត៍ Battambang Conch Cement ដែលមានសមត្ថភាពផលិត ៥ ពាន់តោនក្នុងមួយថ្ងៃមានទីតាំងស្ថិតនៅក្នុងឃុំស្តៅ ស្រុករតនមណ្ឌល ខេត្តបាត់ដំបង ត្រូវបានបើកដាក់ឲ្យដំណើរការក្រោមអធិបតីភាពលោកនាយករដ្ឋមន្ត្រី ហ៊ុន សែន។
រោងចក្រដែលត្រូវបានសាងសង់លើផ្ទៃដីទំហំ ៣១៦ ហិកតា គឺជាការវិនិយោគរួមរវាងក្រុមហ៊ុន Conch International Holding (HK) Limited និងក្រុមហ៊ុន Battambang KT Cement Co., Ltd ។
លោក វិញ ហួរ អគ្គនាយកក្រុមហ៊ុន Battambang Conch Cement បានថ្លែងថា វត្តមាននៃរោងចក្រផលិតស៊ីម៉ងត៍នេះនឹងធ្វើឲ្យឧស្សាហកម្មស៊ីម៉ងត៍កម្ពុជាកាត់បន្ថយស៊ីម៉ងត៍នាំចូលពីក្រៅប្រទេស។
លោកថ្លែងថា៖ «ចាប់ពីពេលនេះតទៅរោងចក្រស៊ីម៉ងត៍របស់យើងរួមនឹងរោងចក្រស៊ីម៉ងត៍ផ្សេងទៀតនៅក្នុងឧស្សាហកម្មនេះនឹងអាចផ្គត់ផ្គង់តម្រូវការទីផ្សារ ហើយយើងនឹងប្រកួតប្រជែងជាមួយស៊ីម៉ងត៍នាំចូលលើគុណភាព និងតម្លៃ»។
លោក វិញ ហួរ បន្តថារោងចក្រថ្មីនេះក៏នឹងជំរុញឲ្យតម្លៃស៊ីម៉ងត៍ក្នុងស្រុកធ្លាក់ចុះផងដែរ។
យោងតាមលោកនាយករដ្ឋមន្ដ្រី ហ៊ុន សែន ការបើកដំណើរការរោងចក្រស៊ីម៉ងត៍ថ្មីនេះបានធ្វើឲ្យរោងចក្រស៊ីម៉ងត៍ក្នុងស្រុកសរុបកើនឡើងដល់ ៤ រោងចក្រ ខណៈការផលិតសរុបកើនឡើងដល់ ៧ លានតោនក្នុងមួយឆ្នាំ។
លោកបង្ហាញថា៖ «ទាំងនោះគឺជាតម្រូវការដែលកម្ពុជាកំពុងអភិវឌ្ឍន៍ដោយសារកំណើននៃការសាងសង់ដូចជាសាលារៀន និងអគារ»។ លោកបន្តថា៖ «កម្ពុជាមិនគ្រាន់តែផ្គត់ផ្គង់ស៊ីម៉ងត៍នៅក្នុងស្រុកប៉ុណ្ណោះទេ ប៉ុន្តែថែមទាំងមានបំណងនាំចេញទៅទីផ្សារអន្តរជាតិផងដែរ»។
តាមលោកនាយករដ្ឋមន្ត្រី រោងចក្រផលិតស៊ីម៉ងត៍នេះនឹងផ្គត់ផ្គង់ទៅកាន់ខេត្តមួយចំនួនដូចជាខេត្តបាត់ដំបង ពោធិ៍សាត់ ប៉ៃលិន បន្ទាយមានជ័យ និង សៀមរាប។ ទោះយ៉ាងនេះក្តីលោកបញ្ជាក់ថាកម្ពុជានៅមានតម្រូវការច្រើន ដែលទាមទារឲ្យមានការវិនិយោគបន្ថែមនៅក្នុងឧស្សាហកម្មនេះ៕LA
