.jpg)
កម្មករកំពុងលើកស៊ីម៉ងត៍ដាក់លើឡាននៅម្តុំស្ថានីយរថភ្លើងក្នុងទីក្រុងភ្នំពេញ នាពេលកន្លងមក។ ហេង ជីវ័ន
ភ្នំពេញៈ រោងចក្រផលិតស៊ីម៉ងត៍ថ្មីមួយទៀតដែលមានទីតាំងនៅខេត្តបាត់ដំបងនឹងចាប់ផ្តើមដំណើរការផលិតកម្មនៅថ្ងៃសុក្រសប្តាហ៍នេះ ដោយមានសមត្ថភាពផលិត ១,៧ លានតោនក្នុងមួយឆ្នាំ។ នេះបើយោងតាមការឲ្យដឹងពីលោក ស៊ុយ សែម រដ្ឋមន្ត្រីក្រសួងរ៉ែ និងថាមពល។
ថ្លែងក្នុងពិធីប្រជុំបូកសរុបសមិទ្ធផលនៃការគ្រប់គ្រង និងការអភិវឌ្ឍវិស័យរ៉ែ និងថាមពលកាលពីសប្តាហ៍មុនលោក ស៊ុយ សែម បញ្ជាក់ថានៅពេលដែលរោងចក្រស៊ីម៉ងត៍ថ្មីមួយទៀតនេះដំណើរការ កម្ពុជានឹងមានលទ្ធភាពផលិត និង ផ្គត់ផ្គង់ស៊ីម៉ងត៍ស្របតាមតម្រូវការក្នុងស្រុក។ លោកថ្លែងថា៖ «យើងនឹងមានរោងចក្រផលិតស៊ីម៉ងត៍ពេញលេញ ៤ ដែលឲ្យដំណើរការដែលអាចផលិតស៊ីម៉ងត៍បាន ៧ លានតោនក្នុងមួយឆ្នាំ»។
ខណៈរដ្ឋមន្ដ្រីមិនបានលើកឡើងពីឈ្មោះជាក់លាក់របស់រោងចក្រស៊ីម៉ងត៍ដែលនឹងចាប់ផ្ដើមដំណើរការនៅសប្ដាហ៍នេះ តែរោងចក្រ ១ គត់ដែលមានសមត្ថភាពគឺក្រុមហ៊ុន Battambang Conch Cement Co Ltd ដែលជាការវិនិយោគរួមរវាងក្រុមហ៊ុនចិន Conch International Holdings (HK) Ltd និងក្រុមហ៊ុនស៊ីម៉ងត៍ក្នុងស្រុក Battambang KT Cement Co Ltd ។
ការសាងសង់រោងចក្រនេះបានចាប់ផ្ដើមកាលពីខែតុលាឆ្នាំ ២០១៦ នៅលើផ្ទៃដីទំហំ ១០០ ហិកតានៅស្រុករតនមណ្ឌល ខេត្តបាត់ដំបង ជាមួយនឹងការវិនិយោគប្រហែល ២៣០ លានដុល្លារ។
លោក យស មុនីរ៉ាត់ អគ្គនាយកនៃអគ្គនាយកដ្ឋានធនធានរ៉ែ និងជាអ្នកនាំពាក្យក្រសួងរ៉ែ និងថាមពលបានយល់ស្របថា ប្រទេសនេះនៅពេលនេះនឹងអាចផ្គត់ផ្គង់តម្រូវការស៊ីម៉ងត៍ដោយខ្លួនឯងបាន ប៉ុន្តែលោកបានទទួលស្គាល់ថាមានការពិបាកក្នុងការទទួលបានទិន្នន័យច្បាស់លាស់លើតម្រូវការស៊ីម៉ងត៍នៅកម្ពុជា។
អ្នកនាំពាក្យរូបនេះបានកត់សម្គាល់ថា ដោយមានកំណើនប្រកបដោយស្ថិរភាពនៅក្នុងវិស័យសំណង់ ការវិនិយោគកាន់តែច្រើនលើការផលិតស៊ីម៉ងត៍អាចនៅតែចាំបាច់នៅពេលអនាគត។ លោកថ្លែងថា៖ «តម្រូវការស៊ីម៉ងត៍ និងសម្ភារសំណង់ផ្សេងទៀតកំពុងរីកចម្រើនខ្លាំង»។
លោកបន្តថា៖ «នៅពេលនេះប្រសិនបើរោងចក្រដែលមានស្រាប់ប្រតិបត្តិការពេញលេញ រោងចក្រទាំងនោះអាចផ្គត់ផ្គង់តម្រូវការបច្ចុប្បន្នបាន ប៉ុន្តែប្រសិនបើល្បឿនតម្រូវការបន្តកើនឡើងកាន់តែច្រើនឡើងៗ យើងគិតថា យើងនឹងត្រូវការការវិនិយោគបន្ថែមលើរោងចក្រស៊ីម៉ងត៍»។
កាលពីខែកុម្ភៈរោងចក្រផលិតស៊ីម៉ងត៍ ជីប ម៉ុង អ៊ិនស៊ី ស៊ីមេន ខបភើរេសិន (CMIC) នៅខេត្តកំពតបានប្រកាសដាក់ឲ្យដំណើរការជាផ្លូវការ ដោយមានសមត្ថភាពផលិតស៊ីម៉ងត៍ ៥០០០ តោនក្នុងមួយថ្ងៃ ឬស្មើនឹង ១,៧ លានតោនក្នុងមួយឆ្នាំក្រោមទុនវិនិយោគសរុបចំនួន ២៦២ លានដុល្លារ។
រោងចក្រនេះត្រូវបានសាងសង់ឡើងលើផ្ទៃដីទំហំជាង ១១០ ហិកតានៅភូមិព្រៃតាព្រិត ឃុំស្តេចគង់ខាងលិច ស្រុកបន្ទាយមាស។ រោងចក្រនេះគឺជាការសហការវិនិយោគរវាងក្រុមហ៊ុនក្នុងស្រុកគឺ ក្រុមហ៊ុនជីបម៉ុង គ្រុប ដែលកាន់កាប់ភាគហ៊ុន ៦០ ភាគរយ និងក្រុមហ៊ុនស្យ៉ាម ស៊ីធី ស៊ីមេន របស់ថៃ ដែលមានភាគហ៊ុន ៤០ ភាគរយ។
លោក Aidan Lynam នាយកប្រតិបត្តិក្រុមហ៊ុន ជីប ម៉ុង អ៊ិនស៊ី បានលើកឡើងកាលពីម្សិលមិញថា ផលិតផលស៊ីម៉ងត៍ពីរោងចក្រថ្មីនេះនឹងរួមចំណែកឆ្លើយតបនឹងតម្រូវការស៊ីម៉ងត៍នៅកម្ពុជាដែលកំពុងកើនឡើងដែលត្រូវបានប៉ាន់ប្រមាណថាមានជាង ៦ លានតោនកាលពីឆ្នាំ ២០១៧។
លោកបន្តថា ផលិតផលស៊ីម៉ងត៍របស់ CMIC អាចរួមចំណែកបំពេញតម្រូវការនៅលើទីផ្សារប្រមាណ ២៥ ភាគរយ៕ LA
