.jpg)
ភ្នំពេញៈ រោងចក្រអគ្គិសនីដើរដោយប្រេងខ្មៅតម្លៃ ៣៨០ លានដុល្លារដែលមានអានុភាពផលិត ៤០០ មេហ្គាវ៉ាត់នៅស្រុកល្វាឯម ខេត្តកណ្តាល នឹងត្រូវដាក់ឲ្យដំណើរការដំណាក់កាលដំបូងចំនួន ១០០ មេហ្គាវ៉ាត់នៅចុងខែសីហាខាងមុខ។
រោងចក្រអគ្គិសនីនេះបានសាងសង់លើផ្ទៃដីសរុប ៤៣ ហិកតានៅភូមិកោះរះក្រោម ឃុំកោះរះ ស្រុកល្វាឯម ខេត្តកណ្តាល។ គម្រោងនេះក៏នឹងសាងសង់អនុស្ថានីយ ១ កន្លែងសម្រាប់ភ្ជាប់មកបណ្តាញជាតិតាមខ្សែបញ្ជូនតង់ស្យុងខ្ពស់ ២៣០ គីឡូវ៉ុល ដើម្បីចែកចាយថាមពលអគ្គិសនី។
លោក គង់ សោភ័ណ្ឌ អភិបាលខេត្តកណ្តាលបានអះអាងកាលពីថ្ងៃពុធថា ការសាងសង់រោងចក្រអគ្គិសនីដើរដោយប្រេងខ្មៅនេះសម្រេចបាន ៩០ ភាគរយហើយ។ រោងចក្រនេះនឹងអាចដាក់ឲ្យដំណើរការក្នុងដំណាក់កាលដំបូងនៅខែក្រោយនេះ។
លោកថ្លែងថា៖ «រោងចក្រនេះនឹងជួយបំពេញបន្ថែមការផ្គត់ផ្គង់អគ្គិសនីនៅទូទាំងប្រទេស រួមទាំងខេត្តកណ្តាលផងដែរ។ យើងនឹងមានថាមពលអគ្គិសនីប្រើគ្រប់គ្រាន់តាមតម្រូវការ»។
លោក វិចទ័រ ហ្សូនា អគ្គនាយកនៃអគ្គនាយកដ្ឋានថាមពលនៃក្រសួងរ៉ែ និងថាមពល ប្រាប់ភ្នំពេញប៉ុស្តិ៍កាលពីខែមុនថា រោងចក្រថាមពលអគ្គិសនីដើរដោយប្រេងខ្មៅនេះនឹងបញ្ចេញថាមពលអគ្គិសនីតែនៅពេលមានតម្រូវការអគ្គិសនីខ្ពស់ប៉ុណ្ណោះ។
លោកបានបន្តថា៖ «សព្វថ្ងៃនេះការផ្គត់ផ្គង់អគ្គិសនីយើងលើសតម្រូវការហើយ។ បើការសាងសង់ចប់ដាក់ដំណើរបានក៏យើងមិនទាន់បញ្ឆេះវាដែរ ព្រោះរោងចក្រដើរដោយប្រេងថ្លៃដើមផលិតខ្ពស់ជាងវារីអគ្គិសនី យើងគ្រាន់តែទុកត្រៀមសម្រាប់ពេលមានតម្រូវការអគ្គិសនីខ្ពស់នៅរដូវប្រាំង»។
លោក ស៊ុយ សែម រដ្ឋមន្ត្រីក្រសួងរ៉ែ និងថាមពលបានថ្លែងក្នុងកិច្ចប្រជុំបូកសរុបលទ្ធផលការអនុវត្តកម្មវិធីការងារ ឆ្នាំ ២០១៩ ថា ការអភិវឌ្ឍប្រភពអគ្គិសនីបង្កើនសមត្ថភាពផលិត បញ្ជូន ចែកចាយ និងការភ្ជាប់បណ្តាញឲ្យអ្នកប្រើប្រាស់គឺជាការងារចម្បងដែលក្រសួងកំពុងអនុវត្តជាបន្តបន្ទាប់ ដើម្បីធ្វើឱ្យកម្ពុជាមានប្រភពអគ្គិសនីគ្រប់គ្រាន់សម្រាប់បំពេញតម្រូវការកំណើនប្រើប្រាស់។
លោកបានថ្លែងថា៖ «ជាមួយគ្នានេះការកែលម្អការផ្តល់សេវាអគ្គិសនីដល់អ្នកប្រើប្រាស់ និងការបញ្ចុះតម្លៃអគ្គិសនីក៏បាននិងកំពុងផ្តល់គុណប្រយោជន៍ដល់ប្រជាពលរដ្ឋទូទាំងប្រទេស»៕ LA
