ភ្នំពេញៈ រោងចក្រផលិតអគ្គិសនីដើរដោយថាមពលធ្យូងថ្មចំនួន ២ ដែលមានទុនវិនិយោគប្រមាណ ១ ពាន់លានដុល្លារនៅខេត្តព្រះសីហនុនាពេលនេះសម្រេចការសាងសង់បាន ៣៥ ភាគរយហើយ បន្ទាប់ពីបានចាប់ផ្តើមសាងសង់កាលពីខែធ្នូ ឆ្នាំ ២០១៩។
គម្រោងនេះជាការវិនិយោគរួមគ្នារវាងក្រុមហ៊ុនក្នុងស្រុក Cambodia International Investment and Development Group (CIIDG) និងក្រុមហ៊ុន China Huadian Hongkong Company Limited (CHDHK) មានអនុភាពសរុប ៧០០ មេហ្គាវ៉ាត់។
តាមផែនការគម្រោងសាងសង់រោងចក្រទាំង ២ ដែលមានផ្ទៃដី ៥៤,៩ ហិកតា ស្ថិតនៅស្រុកស្ទឹងហាវ ខេត្តព្រះសីហនុនេះនឹងត្រូវបញ្ចប់នៅចុងឆ្នាំ ២០២២ ហើយអាចផ្គត់ផ្គង់អគ្គិសនីនាដើមឆ្នាំ ២០២៣។
លោក វិចទ័រ ហ្សូនា អគ្គនាយកនៃអគ្គនាយកដ្ឋានថាមពលនៃក្រសួងរ៉ែ និងថាមពលបានប្រាប់ភ្នំពេញប៉ុស្តិ៍ថា តាមរបាយការណ៍ចុងក្រោយដែលផ្តល់ដោយក្រុមហ៊ុនកាលពីថ្ងៃទី ៣០ ខែធ្នូ ឆ្នាំ ២០២០ បង្ហាញថា ដំណើរការសាងសង់រោងចក្រអគ្គិសនីទាំង ២ នេះសម្រេចបាន ៣៥ ភាគរយហើយ។
លោកបានថ្លែងថា៖ «អ្នកវិនិយោគរបស់យើងគាត់មានទុនគ្រប់គ្រាន់ និងមានការតាំងចិត្តខ្ពស់ក្នុងការអភិវឌ្ឍគម្រោង។ ខ្ញុំឃើញថា ក្រុមហ៊ុនដែលទទួលបានសម្បទានវិនិយោគពីរដ្ឋាភិបាលលើរោងចក្រផលិតថាមពលនានាសុទ្ធតែមានដំណើរការទៅមុខជានិច្ច»។
គម្រោងនេះត្រូវបានគណៈរដ្ឋមន្ត្រីកម្ពុជាអនុម័តកាលពីខែឧសភា ឆ្នាំ ២០១៨ ជាប្រភេទគម្រោងសម្បទានអាជីវកម្មស្ថិតក្រោមទម្រង់សាងសង់ ប្រតិបត្តិការ ធ្វើជាម្ចាស់ និងផ្ទេរដែលមានរយៈពេល ៣៥ ឆ្នាំ។
លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុបានឱ្យដឹងថា ដំណើរការអភិវឌ្ឍន៍រោងចក្រផលិតថាមពលដើរដោយធ្យូងថ្មទាំង ២ នេះដំណើរការយ៉ាងរលូនដោយសម្រេចបានចន្លោះពី ១០ ទៅ ១៥ ភាគរយហើយនៃផ្នែកសំណង់ដោយលោកសង្ឃឹមថា គម្រោងនេះនឹងចប់តាមផែនការកំណត់។
លោកបន្ថែមថា៖ «នៅពេលរោងចក្រនេះភ្ជាប់ទៅបណ្តាញជាតិវានឹងចែកចាយទៅគ្រប់សេចក្តីត្រូវការនៅកម្ពុជា»។
ការផ្គត់ផ្គង់ថាមពលប្រចាំខែក្នុងខេត្តព្រះសីហនុជាមធ្យមគឺចន្លោះពី ៨៣ ទៅ ៨៥ មេហ្គាវ៉ាត់នៅក្នុងអំឡុងពេលនៃវិបត្តិជំងឺកូវីដ។
សព្វថ្ងៃនេះ ក្រុមហ៊ុន CIIDG ក៏កំពុងដំណើរការរោងចក្រអគ្គិសនីដើរដោយធ្យូងថ្មទី ១ មានតម្លៃ ៣៨៣ លានដុល្លារ និងមានអនុភាព ២៧០ មេហ្គាវ៉ាត់ នៅខេត្តព្រះសីហនុ ហើយក្រុមហ៊ុនក៏គ្រោងបើកដំណើរការដំណាក់ទី ២ ចំនួន ១៣៥ មេហ្គាវ៉ាត់នៅឆ្នាំ ២០២១ នេះ។
ថាមពលអគ្គិសនីដែលកំពុងប្រើប្រាស់នៅកម្ពុជាបច្ចុប្បន្នមានប្រភពមកពីរោងចក្រដើរដោយធ្យូងថ្ម ៣២ ភាគរយ វារីអគ្គិសនីពី ៣៦-៤០ ភាគរយ ក្រៅពីនោះ គឺមកពីប្រភពថាមពលពន្លឺព្រះអាទិត្យ និងការនាំចូលពីប្រទេសជិតខាង។ នេះបើតាមលោក ហ្សូនា៕LA