កោះកុងៈ ក្រុមហ៊ុនYazaki Corporationជាក្រុមហ៊ុនផ្គត់ផ្គង់គ្រឿងបន្លាស់រថយន្តរបស់ជប៉ុនគ្រោងនឹងចាប់ផ្តើមដំណើរការរោងចក្រផលិតគ្រឿងបន្លាស់រថយន្តនៅចុងខែនេះ។
អ្នកជំនាញបានឲ្យដឹងថា រោងចក្រនេះនឹងជួយធ្វើពិពិធកម្មក្នុងវិស័យនាំចេញរបស់កម្ពុជា។
លោក Yasuhiko Yazaki ប្រធានក្រុមហ៊ុន Yazaki Corporation ដែលបានជួបជាមួយលោកនាយករដ្ឋមន្ត្រី ហ៊ុន សែន កាលពីថ្ងៃពុធបានឲ្យដឹងថា រោងចក្រដែលសាងសង់នៅតំបន់សេដ្ឋកិច្ចពិសេសកោះកុង ក្នុងខេត្តកោះកុង បានបញ្ចប់ការសាងសង់ហើយ ហើយគ្រោងនឹងបើកដំណើរការជាផ្លូវការនៅថ្ងៃទី១៧ ខែនេះ។
រោងចក្រនេះត្រូវបានបំពាក់ និងដំឡើងគ្រឿងបច្ចេកទេសទំនើប ហើយផលិតផលគ្រឿងចក្រទាំងអស់នឹងត្រូវនាំចេញទៅកាន់ប្រទេសផ្សេងៗទៀត នៅជុំវិញពិភពលោក។ ទោះបីយ៉ាងនេះក្តី លោក Yasuhiko Yazaki មិនបានបង្ហើបឲ្យដឹងអំពីទឹកប្រាក់ដែលបានវិនិយោគនិងសមត្ថភាពផលិតនៅក្នុងរោងចក្រនេះឡើយ។
លោកនាយករដ្ឋមន្ត្រី ហ៊ុន សែន សាទរចំពោះក្រុមហ៊ុននេះដែលបានសម្រេចចិត្តមកបណ្តាក់ទុននៅកម្ពុជា ដោយលោកលើកឡើងថា រដ្ឋាភិបាលនឹងធានាថា ក្រុមហ៊ុននេះមិនមានហានិភ័យគ្រោះមហន្តរាយ ឬ បញ្ហានយោបាយឡើយ។
នៅក្នុងរយៈពេលប៉ុន្មានឆ្នាំចុងក្រោយនេះការវិនិយោគមកពីប្រទេសជប៉ុនមានការកើនឡើងជាបណ្តើរៗ។
លោក Suzuki Hiroshi អគ្គនាយក និងជាប្រធានអ្នកសេដ្ឋកិច្ចប្រចាំវិទ្យាស្ថានស្រាវជ្រាវពាណិជ្ជកម្មកម្ពុជា បានឲ្យដឹងថា ការវិនិយោគរបស់ក្រុមហ៊ុនជប៉ុននឹងទទួលបានផលប្រយោជន៍ច្រើនដោយសារថ្លៃពលកម្មថោក និងទីតាំងល្អនៅចន្លោះបាងកក និងហូជីមិញ។
លោកថ្លែងថា៖ «ថ្លៃពលកម្មជាកត្តាសំខាន់ណាស់ដោយសារផលិតកម្មខ្សែភ្លើង ត្រូវប្រើកម្លាំងពលកម្មច្រើន។ ការដឹកជញ្ជូនងាយស្រួលទៅកាន់ច្រកសមុទ្រខាងកើតប្រទេសថៃ ហើយជាកត្តាដ៏សំខាន់ដោយសារថ្លៃនិងពេលវេលាដឹកជញ្ជូន។ ខ្ញុំជឿជាក់ថា Yazaki នឹងនាំចេញផលិតផលទាំងអស់ពីខេត្តកោះកុង ទៅប្រទេសថៃពិសេសទៅកាន់ច្រកសមុទ្រខាងកើត ដែលនៅទីនោះ មានរោងចក្រផលិតរថយន្តមួយចំនួនរបស់ជប៉ុន»។
ក្រុមហ៊ុន Yazaki នឹងក្លាយជាគំរូដ៏ល្អក្នុងការបង្កើតទំនាក់ទំនងឈ្នះ ឈ្នះរវាងកំណើនសេដ្ឋកិច្ចកម្ពុជា និងក្រុមហ៊ុនអភិវឌ្ឍន៍របស់ជប៉ុន ហើយការវិនិយោគរបស់ Yazaki នឹងផ្តល់ការងារល្អៗ និងឥទ្ធិពលល្អដល់ការនាំចេញរបស់កម្ពុជា ដោយជួយធ្វើពិពិធកម្មវិស័យនាំចេញ និងគោលដៅនាំចេញរបស់កម្ពុជា។ នេះបើតាមលោក Suzuki Hiroshi។
លោក គង់ នួន ប្រធានក្រុមហ៊ុនចែកចាយរថយន្តតូយ៉ូតាពីជប៉ុន មកកម្ពុជា បានឲ្យដឹងថា តម្រូវការរថយន្តទំនើបៗនៅកម្ពុជាមានប្រហែល២ម៉ឺនគ្រឿងក្នុងមួយឆ្នាំក្នុងនោះតូយ៉ូតាមានចំណែកទីផ្សារ៧០ភាគរយ។
កាលពីខែកញ្ញា AEON ជាក្រុមហ៊ុនអភិវឌ្ឍន៍ផ្សារទំនើបដ៏ធំជាងគេនៅជប៉ុន និងជាប្រតិបត្តិករចែកចាយធំជាងគេ បានសម្រេចចិត្តវិនិយោគទឹកប្រាក់២០០លានដុល្លារដើម្បីសាងសង់ផ្សារទំនើបកម្ពស់៤ជាន់នៅភ្នំពេញ ហើយការសំណង់នេះនឹងចាប់ផ្តើមនៅសប្តាហ៍ក្រោយ។
ក្រុមហ៊ុន Minebea បានបណ្តាក់ទុន៦០លានដុល្លារដើម្បីសាងសង់រោងចក្រវិនិយោគគ្រឿងម៉ូទ័រនៅតំបន់សេដ្ឋកិច្ចពិសេសភ្នំពេញ។
ការវិនិយោគរបស់ជប៉ុននៅកម្ពុជា បានកើនឡើងដល់៧៥លានដុល្លារកាលពីឆ្នាំមុន ដោយកើនឡើងពី៣៥លានដុល្លារកាលពីឆ្នាំ២០១០។ នេះបើយោងតាមស្ថានទូតជប៉ុន៕ CS
