The Phnom Penh Post Search

Search form




Logo of Phnom Penh Post newspaper Phnom Penh Post - រោងចក្រ​វារីអគ្គិសនី តាតៃ ​បើក​ដំណើរ​ការ

រោងចក្រ​វារីអគ្គិសនី តាតៃ ​បើក​ដំណើរ​ការ

រោងចក្រ​វារីអគ្គិសនី តាតៃ ​បើក​ដំណើរ​ការ

កោះកុងៈ រោងចក្រ​វារីអគ្គិសនី​ស្ទឹង​ តាតៃ អនុភាព​ ២៤៦ ​មេហ្គាវ៉ាត់​ក្រោម​ការ​វិនិយោគ​ទឹក​ប្រាក់​ ៥៤០ ​លាន​ដុល្លារ​ដោយ​ក្រុមហ៊ុន​ចិន​ចាប់​ផ្ដើម​​ផលិត​អគ្គិសនី​នៅ​រោងចក្រ​ទីមួយ​របស់​ខ្លួន​មាន​អនុភាព ៨២ មេហ្គាវ៉ាត់​ពី​ថ្ងៃពុធ។ នេះ​បើ​តាម​ភ្នាក់ងារ​ព័ត៌មាន​រដ្ឋ​ចិន​ស៊ីនហួ។

រោង​ចក្រ​ដែល​មាន​ទីតាំង​នៅ​ខេត្ត​កោះកុង វិនិយោគ​ដោយ​ក្រុម​ហ៊ុន China National​ Heavy Machinery Corporation (CHMC) ​កសាង​ឡើង​ស្ថិត​ក្រោម​កិច្ច​ព្រម​ព្រៀង​សាងសង់​ ដំណើរ​ការ​ផ្ទេរ​ (BOT) ដែល​មាន​រយៈពេល​ ៣៧ ឆ្នាំ។ រោង​ចក្រ​នេះ​ចំណាយ​ពេល​សាងសង់​ ៥​ឆ្នាំ​មក​ហើយ​តាំង​ពី​ឆ្នាំ​ ២០១០។

ប្រភពពី​ស៊ីន​ហួ​ឲ្យ​ដឹងថា៖ «រោងចក្រ​មួយ​បាន​ចាប់​ផ្ដើម​ប្រតិបត្តិការ​កាលពី​ថ្ងៃ​ពុធ ខណៈ​​ការ​សាងសង់​រោងចក្រ​ពីរ​​ទៀត​កំពុង​ដំណើរ​ការ​នៅ​ឡើយ។ ដំណើរ​ប្រតិបត្តិការ​របស់​ទំនប់​នេះ​នឹង​រួម​ចំណែក​ក្នុង​ការ​អភិវឌ្ឍ​សកម្មភាព​សេដ្ឋកិច្ច និង​កាត់​បន្ថយ​ការ​ខ្វះ​ខាត​អគ្គិសនី​នៅ​ក្នុង​ប្រទេស​កម្ពុជា»។

រោងចក្រ​វារី​អគ្គិសនី​នៅ​ទន្លេឫស្សី​ជ្រុំ​ក្រោម​កម្លាំង ៣៣៨ ​មេហ្គាវ៉ាត់ នៅ​ស្រុក​មណ្ឌល​សីម៉ា​ ខេត្ត​កោះ​កុង​ ដែល​ត្រូវ​បាន​វិនិយោគ​ដោយ​ក្រុមហ៊ុន China Huadian Corp ​ក្នុង​ទឹក​ប្រាក់​ ៥០០ ​លាន​ដុល្លារ​​ស្ថិត​ក្រោម​កិច្ច​ព្រមព្រៀង BOT រយៈពេល​ ៣៥​ឆ្នាំ​ បាន​ចាប់​​ផ្ដើម​ប្រតិបត្តិ​ការ​ពី​ដើម​ខែ​កុម្ភៈ​ផង​ដែរ។

តាម​ក្រសួង​រ៉ែ និង​ថាមពល​ក្រុមហ៊ុន​ចិន​​បាន​វិនិយោគ​ជាង​​ ១,៦ ​ពាន់​លាន​ដុល្លារ​​ដើម្បី​សាងសង់​ទំនប់​វារី​អគ្គិសនី​ ៦ ​នៅ​​កម្ពុជា​ដែល​​មាន​សមត្ថភាព​សរុប ៩២៨ ​មេហា្គវ៉ាត់៕PB

អត្ថបទគួរចាប់អារម្មណ៍