.jpg)
ក្រុមហ៊ុន Royal Group របស់លោក គិត ម៉េង កាលពីម្សិលមិញបានចុះអនុស្សរណៈយោគយល់គ្នា (MoU) ជាមួយក្រសួងប្រៃសណីយ៍ និងទូរគមនាគមន៍ (MPTC) ដើម្បីគាំទ្រវិស័យឌីជីថលរបស់ប្រទេស កម្ពុជា។ Cambodia Chamber of Commerce
ភ្នំពេញៈ ក្រុមហ៊ុន Royal Group របស់លោក គិត ម៉េង កាលពីម្សិលមិញបានចុះអនុស្សរណៈយោគយល់គ្នា (MoU) ជាមួយក្រសួងប្រៃសណីយ៍ និងទូរគមនាគមន៍ (MPTC) ដើម្បីគាំទ្រវិស័យឌីជីថលរបស់ប្រទេស កម្ពុជា។ នេះបើយោងតាមសេចក្ដីប្រកាសព័ត៌មាន។
ការចុះហត្ថលេខាដែលត្រូវបានធ្វើជាអធិបតីភាពដោយលោក គិត ម៉េង អគ្គនាយកក្រុមហ៊ុន Royal Group និងលោក ត្រាំ អ៊ីវតឹក រដ្ឋមន្ដ្រីក្រសួងប្រៃសណីយ៍ និងទូរគមនាគមន៍ នឹងបង្កើនកិច្ចសហការរវាងគ្នា ក៏ដូចជាការបង្កើតផែនការសម្រាប់ការដាក់ឲ្យប្រើប្រាស់លើបច្ចេកវិទ្យាជំនាន់ក្រោយទំហំធំ ដូចជាកម្មវិធីអេឡិចត្រូនិក សម្រាប់រដ្ឋាភិបាល បច្ចេកវិទ្យា (AI) បច្ចេកវិទ្យា IoT មជ្ឈមណ្ឌលការបង្កើតថ្មី និងមជ្ឈមណ្ឌលផ្ទុកទិន្នន័យជាដើម។
លោក គិត ម៉េង បានឲ្យដឹងក្នុងអំឡុងការចុះហត្ថលេខាលើកិច្ចព្រមព្រៀងកាលពីម្សិលមិញថា ភាគីទាំង ២ នេះ នឹងបង្កើតក្រុមការងាររួមមួយដែលធ្វើការលើប្រព័ន្ធឌីជីថល ដើម្បីជំរុញរបៀបវារៈនេះ។
លោកថ្លែងថា៖ «ក្រុមហ៊ុន Royal Group នឹងធ្វើការងារជាមួយក្រសួងប្រៃសណីយ៍ និងទូរគមនាគមន៍ ដើម្បីដំណើរការលើបច្ចេកវិទ្យា 5G នៅក្នុងប្រទេស កម្ពុជា»។
លោកបន្តថា៖ «យើងមានគម្រោងជាច្រើន ដែលកំពុងដំណើរការ ហើយយើងជឿជាក់ថា យើងនឹងអាចក្លាយទៅជាអ្នកតំណាងឈានមុខគេរបស់ប្រទេស កម្ពុជា នៅក្នុងវិស័យនេះ»។
MoU នេះក៏បានបញ្ជាក់ពីវិធានការពង្រឹងសន្ដិសុខផ្សេងៗទាក់ទងនឹងបច្ចេកវិទ្យាដូចជាការទាញយកឯកសារដែលបាត់បង់ និងសុវត្ថិភាពអ៊ីមែលរបស់រដ្ឋាភិបាល។
លោក គិត ម៉េង ឲ្យដឹងថា កម្ពុជា នឹងក្លាយជាឧទាហរណ៍មួយក្នុងតំបន់សម្រាប់ការវិវត្តបច្ចេកវិទ្យាស្របតាមកំណើនសេដ្ឋកិច្ច និងពាណិជ្ជកម្ម៕ LA
