The Phnom Penh Post Search

Search form




Logo of Phnom Penh Post newspaper Phnom Penh Post - រ៉ូយ៉ាល់​គ្រុប​ចុះ​កិច្ចព្រមព្រៀង​ទិញ​ជីគីមី​ពី​វៀតណាម​

រ៉ូយ៉ាល់​គ្រុប​ចុះ​កិច្ចព្រមព្រៀង​ទិញ​ជីគីមី​ពី​វៀតណាម​

រ៉ូយ៉ាល់​គ្រុប​ចុះ​កិច្ចព្រមព្រៀង​ទិញ​ជីគីមី​ពី​វៀតណាម​

131230_12
ជីកសិកម្មនាំចូលពីវៀតណាមដាក់លក់តាមទីផ្សារនៅកម្ពុជា

ភ្នំពេញៈ ក្រុមហ៊ុន​ជី Nitrogen Chemicals & Fertilizer Cambodia Ltd ដែល​ជា​ក្រុមហ៊ុន​បុត្រសម្ព័ន្ធ​របស់​ក្រុមហ៊ុន រ៉ូយ៉ាល់ គ្រុប ខេមបូឌា បាន​ចុះ​ហត្ថលេខា​លើ​កិច្ចព្រមព្រៀង​ទិញ​ជី​កសិកម្ម ជាមួយ​ក្រុមហ៊ុន Dap Vinchen Limited និង​ក្រុមហ៊ុន Petrovietnam Fertilizer & Chemicals របស់​ប្រទេស​វៀតណាម​ដើម្បី​ជំរុញ​វិស័យ​កសិកម្ម​នៅ កម្ពុជា​។ នេះ​បើ​តាម​ការ​ឲ្យ​ដឹង​ពី​មន្ដ្រី​ជាន់​ខ្ពស់​មកពី​ក្រុមហ៊ុន Nitrogen Chemicals កាលពី​ម្សិលមិញ។

កិច្ចព្រមព្រៀង​នេះ​ត្រូវ បាន​ចុះ​ហត្ថលេខា​ក្នុង​ចំណោម​កិច្ចព្រមព្រៀង​៨​ទៀត ក្នុង​អំឡុង​ទស្សនកិច្ច​ជា​ផ្លូវការ​របស់​លោក​នាយករដ្ឋមន្ដ្រី កម្ពុជា​ទៅ​កាន់​ប្រទេស​វៀតណាម ជា​ប្រទេស​ក្នុង​ចំណោម​សមាជិក​អាស៊ាន​ទាំង​១០ បន្ទាប់ពី​លោក​ត្រូវ​តែងតាំង​ថ្មី​ជា​នាយករដ្ឋមន្ដ្រី​ក្រោយ​ការ បោះឆ្នោត​ប្រកប​ដោយ​ភាព​ចម្រូងចម្រាស​។

លោក ឈុន គីម ប្រធាន​គ្រប់គ្រង​ហិរញ្ញវត្ថុ និង​ទទួល​ខុសត្រូវ​ផ្នែក​ចែកចាយ​ជី​នៃ​ក្រុមហ៊ុន Nitrogen Chemicals បាន​ប្រាប់​ភ្នំពេញ​ប៉ុស្ដិ៍​ថា ក្រុមហ៊ុន​នេះ​គ្រោង​នឹង​នាំ​ចូល​ជី​បី​ប្រភេទ​រួមមាន ជី អ៊ុយរេ ជី​DAP និង​ជី​NPK ប៉ុន្តែ​បដិសេធ​មិន​ផ្ដល់​ការ​អត្ថាធិប្បាយ​ពី ចំនួន​តោន និង​ពេលវេលា​ជាក់លាក់​ដែល​ក្រុមហ៊ុន​នឹង​ចាប់ផ្ដើម​ធ្វើការ​នាំ​ចូល​នោះ​ទេ​។ លោក​និយាយ​ថា​៖ «​មិន​ប្រាកដ​ទេ! ក្រុមហ៊ុន​ស្នើ​អ្នក​ជំនាញ​ខាង​ជី មកពី​ប្រទេស​វៀតណាម​ដើម្បី​សិក្សា​ពី​ប្រភេទ​ដី​អ្វី ត្រូវការ​ជី​ប្រភេទ​អ្វី បន្ទាប់មក​យើង​នឹង​សម្រេច​ចិត្ត​។ យើង​មិន​អាច​ចេះ​តែ​នាំ​ចូល​ទេ​»​។ លោក បញ្ជាក់​ថា ក្រសួង​កសិកម្ម រុក្ខាប្រមាញ់ និង​នេសាទ បាន​អនុញ្ញាត​ឲ្យ​ក្រុមហ៊ុន​នាំ​ចូល​ជី​កសិកម្ម​ចំនួន​១៩០ ០០០ តោន​ក្នុង​មួយ​ឆ្នាំៗ​។

លោក​និយាយ​ទៀត​ថា​៖ «​នៅ​ជំហាន ដំបូង​ហ្នឹង​គឺ​យើង​នាំ​ជី​យក​មក​ឲ្យ​កសិករ​យើង តាម​ដេប៉ូ​ចែក​ទៅ​ដល់​កសិករ​និង​បណ្តាញ​នៅ​ខេត្ត​។ ដំណាក់កាល​ទី​ពីរ​គឺ រ៉ូយ៉ាល់​គ្រុប មាន​គម្រោង​កសាង​រោងចក្រ​ជី​មួយ​នៅ​ស្ទឹងហាវ​។ ខាង​ក្រុមហ៊ុន​វៀតណាម​មាន​ការ​ចាប់​អារម្មណ៍​លើ​ចំណុច​ហ្នឹង​។ គេ​នឹង​មក​សិក្សា គេ​នឹង​ឲ្យ​ជា​គំនិត និង​មាន​ការ​ចូលរួម​យ៉ាង​ម៉េច​នោះ នៅពេល​ក្រោយ​»។

យោងតាម ស្ថិតិ​របស់​ក្រសួង​កសិកម្ម កាលពី​ឆ្នាំ​២០១២ មាន​ក្រុមហ៊ុន​ប្រហែល​២០​ដែល នាំ​ចូល​ជី​កសិកម្ម​គីមី​ដើម្បី​ផ្គត់ផ្គង​ទីផ្សារ​នៅ​កម្ពុជា​។

លោក យ៉ង សាំង​កុមារ ប្រធាន​អង្គការ​សេដាក និយាយ​ថា ជីកសិកម្ម​គីមី​ដែល​បាន​នាំ​ចូល​នឹង​ជួយ​ដល់​កសិករ​ក្នុង​ការ បង្កើន​ទិន្នផល​។ ប៉ុន្តែ​ដើម្បី​និរន្តរភាព​នៃ​ការ​រីកចម្រើន​ក្នុង​វិស័យ​កសិកម្ម​ជា រយៈពេល​វែង​លោក​ចង់​ឃើញ​កម្ពុជា​មាន​រោងចក្រ​ផលិត​ជី​កសិកម្ម​ក្នុង ស្រុក​ដើម្បី​ផ្តល់​តម្លៃ​ទាប​ដល់​កសិករ ឬ គួរ​តែ​មាន​ការ​ជំរុញ​ឲ្យ​កសិករ​ផលិត​ជី​ធម្មជាតិ​សម្រាប់​ប្រើប្រាស់ ដោយ​ខ្លួន​ឯង​។ លោក​និយាយ​ថា​៖ «​ជី​កសិកម្ម​បែប​គីមី​ជា​ផ្នែក មួយ​ជួយ​បង្កើន​ទិន្នផល ប៉ុន្តែ​កសិករ​ក៏​នឹង​ត្រូវ​ចំណាយ​ប្រាក់​ច្រើន​ផង​ដែរ​។ ការ​ប្រើប្រាស់​ជី​កសិកម្ម​ធម្មជាតិ​នឹង​ជួយ​ពួកគេ​ឲ្យ​ទទួល​បាន ប្រាក់​ចំណេញ​កាន់​តែ​ច្រើន ហើយ​ទន្ទឹម​នឹង​នោះ​ក៏​ជួយ​រក្សា​គុណភាព​ដី​ដែរ​»​។

ក្នុង​ឆ្នាំ​២០១៣ ក្រសួង​កសិកម្ម រុក្ខាប្រមាញ់ និង​នេសាទ បាន​ផ្តល់​លិខិត​អនុញ្ញាត​ឲ្យ​នាំ​ចូល​ជី​កសិកម្ម​៣៣៨​មុខ​ស្មើ​នឹង​៤៣៤ ៣២៣​តោន​សម្រាប់​ការ​ប្រើប្រាស់​ក្នុង​ស្រុក​។

ក្រុម​ប្រឹក្សា​អភិវឌ្ឍន៍​កម្ពុជា​កាលពី​ឆ្នាំ​២០១១ បាន​អនុម័ត​ការ​វិនិយោគ​របស់​ក្រុមហ៊ុន Nitrogen Chemicals ដែល​មាន​ទំហំ​ទឹកប្រាក់​២,២​ពាន់​លាន​ដុល្លារ​។

ប្រធាន​គ្រប់គ្រង​នៃ ក្រុមហ៊ុន​នេះ​ឲ្យ​ដឹង​ក្នុង​បទសម្ភាស​ជាមួយ​ភ្នំពេញ​ប៉ុស្តិ៍​នា​ពេល នោះ​ថា ក្រុមហ៊ុន​គ្រោង​នឹង​សម្ពោធ​រោងចក្រ​ផលិត​ជី អ៊ុយរេ របស់​ខ្លួន​នៅ​ឆ្នាំ​២០១៦ ដែល​នឹង​អាច​ចែកចាយ​ក្នុង​ទីផ្សារ ក៏​ដូចជា​នាំ​ចេញ​ទៅ​ក្រៅ​ប្រទេស​។

កាលពី​ខែ​ធ្នូ ឆ្នាំ​មុន រោងចក្រ​វៀតណាម​មួយ​មាន​ឈ្មោះ​ថា Five Star International បាន​បើក​ដំណើរការ​នៅ​កម្ពុជា​ដែល​មាន​សមត្ថភាព​ផលិត​ជី​គីមី​បាន​ចំនួន ៣៥០ ០០០ តោន​ក្នុង​មួយ​ឆ្នាំៗ​៕PB

អត្ថបទគួរចាប់អារម្មណ៍