.jpg)
ភ្នំពេញ: កម្ពុជាបានបង្ហាញពីសមិទ្ធផលធំៗដែលសម្រេចបានកាលពីឆ្នាំ ២០១៩ ខណៈការរាតត្បាតរបស់ជំងឺកូវីដ១៩ កំពុងជះឥទ្ធិពលអវិជ្ជមានដល់កំណើនសេដ្ឋកិច្ចរបស់ខ្លួននៅក្នុងឆ្នាំ ២០២០ នេះ។
បើទោះជាពិធីបុណ្យចូលឆ្នាំខ្មែរត្រូវបានប្រកាសពន្យារដើម្បីជាវិធានការទប់ស្កាត់ការឆ្លងជំងឺកូវីដ១៩ លោកនាយករដ្ឋមន្ត្រី ហ៊ុន សែន ក្នុងសារដែលបានផ្ញើជូនជនរួមជាតិខ្មែរនៅក្នុងឱកាសពិធីបុណ្យចូលឆ្នាំថ្មីនេះក៏បានរៀបរាប់ពីកំណើនសេដ្ឋកិច្ចដ៏រឹងមាំរបស់កម្ពុជាដែលសម្រេចបានរង្វង់ ៧ ភាគរយកាលពីឆ្នាំ ២០១៩។ លោកបានឲ្យដឹងថា កំណើនដ៏រឹងមាំនេះបានឆ្លុះបញ្ចាំងពីការរីកចម្រើនក្នុងវិស័យឧស្សាហកម្ម កម្មន្តសាល សំណង់ កសិកម្ម និងសេវាកម្ម ព្រមទាំងវិស័យទេសចរណ៍ផងដែរ។
លោកថ្លែងថា៖ «កម្ពុជាកំពុងតែផ្លាស់ប្តូររចនាសម្ព័ន្ធសេដ្ឋកិច្ចពីប្រទេសដែលពឹងផ្អែកលើវិស័យកសិកម្មទៅជាប្រទេសដែលពឹងផ្អែកលើវិស័យឧស្សាហកម្ម និងសេវាកម្ម»។ លោកបន្តថា៖ «កម្ពុជាបានអនុវត្តគោលនយោបាយម៉ាក្រូសេដ្ឋកិច្ចប្រកបដោយការប្រុងប្រយ័ត្ន និងធ្វើឲ្យសេដ្ឋកិច្ចមានស្ថិរភាពដោយជំរុញ និងលើកកម្ពស់ការធ្វើពិពិធកម្មសេដ្ឋកិច្ច ភាពប្រកួតប្រជែង ព្រមទាំងជំរុញការផលិត និងការប្រើប្រាស់ផលិតផលក្នុងស្រុក»។
ទោះបីជាបែបនេះក្តីធនាគារអភិវឌ្ឍន៍អាស៊ីកាលពីពេលថ្មីៗនេះបានព្យាករថា កំណើនសេដ្ឋកិច្ចកម្ពុជានឹងធ្លាក់មកនៅត្រឹម ២,៣ ភាគរយនៅឆ្នាំ ២០២០ នេះបន្ទាប់ពីកំណើនដ៏រឹងមាំក្នុងរង្វង់ ៧ ភាគរយនារយៈពេល ២ ទសវត្សរ៍ចុងក្រោយនេះ ខណៈធនាគារពិភពលោកបានព្យាករថា សេដ្ឋកិច្ចកម្ពុជានឹងមានកំណើន ២,៥ ភាគរយនៅឆ្នាំនេះ ប៉ុន្តែនឹងស្ទុះងើបឡើងវិញដល់ ៥,៩ ភាគរយនៅឆ្នាំ ២០២១។
លោកបានឲ្យដឹងថា កាលពីឆ្នាំមុនរដ្ឋាភិបាលសម្រេចបានសមិទ្ធផលធំៗជាច្រើននៅក្នុងវិស័យពាណិជ្ជកម្ម ថាមពល និងហេដ្ឋាសម្ព័ន្ធផ្លូវថ្នល់ដែលឆ្លុះបញ្ចាំងឲ្យឃើញពីកំណើនសេដ្ឋកិច្ចរឹងមាំរបស់កម្ពុជា។
លោកបន្តថា ចំណែកវិស័យសំណង់កំពុងរីកលូតលាស់យ៉ាងខ្លាំងដោយគិតមកដល់ពេលនេះនៅកម្ពុជាមានអគារកម្ពស់ចាប់ពី ៥ ទៅ ៤០ ជាន់ឡើងចំនួន ១ ៧០០ អគារ។
ដោយឡែកចំណូលពីវិស័យទេសចរណ៍អន្តរជាតិសម្រេចបាន ៤៩១៩ លានដុល្លារកាលពីឆ្នាំមុនកើនជាង ១២ ភាគរយបើធៀបឆ្នាំ ២០១៨។ ភ្ញៀវទេសចរអន្តរជាតិមកកម្ពុជាមានចំនួន ៦,៦១ លាននាក់។
លោកលើកឡើងទៀតថាថ្មីៗនេះរដ្ឋាភិបាលក៏បានដាក់ឲ្យដំណើរការផ្លូវជាតិ និងបើកការដ្ឋានស្ថាបនាផ្លូវ និងផ្លូវល្បឿនលឿនដែលមានប្រវែង ១៩០ គីឡូម៉ែត្រពីភ្នំពេញទៅក្រុងព្រះសីហនុផងដែរ។
បើតាមលោកនាយករដ្ឋមន្ត្រីកាលពីឆ្នាំមុនការធ្វើពាណិជ្ជកម្មអន្តរជាតិសម្រេចបាន ៣៤,៥៩ ពាន់លានដុល្លារក្នុងនោះការនាំចេញទំនិញសម្រេចបាន ១៤,៩១ ពាន់លានដុល្លារ។
លោក ស៊ាង ថៃ អ្នកនាំពាក្យក្រសួងពាណិជ្ជកម្មបានប្រាប់ភ្នំពេញប៉ុស្តិ៍ថា ទោះបីកម្ពុជាកំពុងប្រឈមនឹងការរាតត្បាតនៃវីរុសកូរ៉ូណាក៏ដោយ ក៏រដ្ឋាភិបាលនៅតែបន្តខំប្រឹងប្រែងដើម្បីបង្កើនការសម្របសម្រួលធ្វើពាណិជ្ជកម្មជាមួយអន្តរជាតិឲ្យបានកាន់តែខ្លាំងបន្ថែមទៀតតាមរយៈការចរចាកិច្ចព្រមព្រៀងពាណិជ្ជកម្មសេរីជាមួយបណ្តាប្រទេសជាច្រើន។
លោកថ្លែងថា៖ «ក្រុមការងាររបស់ក្រសួងកំពុងធ្វើការចរចាលើកិច្ចព្រមព្រៀងពាណិជ្ជកម្មសេរីជាមួយប្រទេសចិន កូរ៉េនិងរុស្ស៊ី ខណៈក្រុមការងារនេះកំពុងសិក្សាកិច្ចព្រមព្រៀងនេះជាមួយឥណ្ឌា អង់គ្លេស និងជប៉ុនផងដែរ»៕
