The Phnom Penh Post Search

Search form

Logo of Phnom Penh Post newspaper Phnom Penh Post - លោកសូរ​ ឃុន ​អតីត​រដ្ឋមន្ត្រី​ ប្រៃសណីយ៍​ទទួល​មរណភាព

លោកសូរ​ ឃុន ​អតីត​រដ្ឋមន្ត្រី​ ប្រៃសណីយ៍​ទទួល​មរណភាព

លោក ​សូរ ​ឃុន ​ អតីត​​រដ្ឋ​មន្ដ្រី​ក្រសួង​ប្រៃស​ណី​យ៍ ​និង​ទូរ​គម​នាគ​មន៍។
លោក ​សូរ ​ឃុន ​ អតីត​​រដ្ឋ​មន្ដ្រី​ក្រសួង​ប្រៃស​ណី​យ៍ ​និង​ទូរ​គម​នាគ​មន៍។

លោកសូរ​ ឃុន ​អតីត​រដ្ឋមន្ត្រី​ ប្រៃសណីយ៍​ទទួល​មរណភាព

ភ្នំពេញៈ ​លោក ​សូរ ​ឃុន ​ អតីត​​រដ្ឋ​មន្ដ្រី​ក្រសួង​ប្រៃស​ណី​យ៍ ​និង​ទូរ​គម​នាគ​មន៍ ​និង​ជា​តំណាង​រាស្ដ្រ​ខេត្ត​តា​កែវ​របស់​គណ​បក្ស​ប្រជាជន​កម្ពុជា​ទទួល​មរណ​ភាព​ហើយ​កាល​ពី​ម្សិលមិញ​ ក្នុង​អាយុ​៧១ឆ្នាំ​ ដោយ​សារ​តែ​រោគាពាធ​។

មរណភាព​របស់​លោក​ សូរ ​ឃុន ​គឺ​ប៉ុន្មាន​ថ្ងៃ​បន្ទាប់​ពី​អតីត​នាយក​រដ្ឋមន្ដ្រី​កម្ពុជា ​និង​ជា​តំណាង​រាស្ដ្រ​ខេត្ត​កំពង់​ស្ពឺ​នៃ គ​ណ​បក្ស​សង្គ្រោះ​ជាតិ​ត្រូវ​បាន​បញ្ជូន​ទៅព្យាបាល​នៅ​ប្រទេស​សិង្ហ​បុរី​កាល​ថ្ងៃ​អាទិត្យ​ដោយ​ជម្ងឺ​ដាច់​សរសៃ​ឈាម​ខួរក្បាល​។

លោក ​សូរ ​ឃុន ​បាន​ធ្វើ​ជា​រដ្ឋ​មន្ដ្រី​ក្រសួង​ប្រៃស​ណីយ៍ ​និង​​ទូរ​គមនាគមន៍​​ជិត​ ២០ ​ឆ្នាំ ​ចាប់​ពី​ឆ្នាំ​១៩៩៣​ រហូត​ដល់​ខែ​ កញ្ញា ​ឆ្នាំ​​ ២០១៣ ​ដែល​ក្រោយ​មក​ត្រូវ​បាន​ដាក់​ជំនួស​ដោយ​លោក ​ប្រាក់ ​សុខុន ​អតីត​រដ្ឋលេខាធិកា​នៅ​ទីស្ដី​ការ​គណៈ​រដ្ឋ​មន្ដ្រី​។

លោក​ ខៀវ ​កាញារីទ្ធ ​រដ្ឋ​មន្ដ្រី​ក្រសួង​ព័ត៌​មាន​បាន​ប្រាប់​ភ្នំ​ពេញ​ប៉ុស្ដិ៍​ថា ​លោក ​សូរ ឃុន​បាន​​ធ្លាក់​ខ្លួន​ឈឺ​អស់​រយៈ​ពេល​ជិត​មួយ​ឆ្នាំ​មក​ហើយ ​ហើយ​លោក​បាន​ទទួល​មរណភាព​នៅ​ម៉ោង ​១១:១១​ នាទី​ព្រឹក​នៅ​ព្រឹក​នេះ ​(ម្សិលមិញ)​។

លោក​បាន​សរសេរ​មក​កាន់​ភ្នំពេញប៉ុស្ដិ៍​ថា​៖​ «ខ្ញុំ​សុំ​បញ្ជាក់​អំពី​ដំណឹង​មរណភាព​ [របស់​លោក​សូរ​ ឃុន]​។ ​លោក​មាន​ជំងឺ​ជិត​មួយ​ឆ្នាំ​មក​ហើយ»​។

លោក​បន្ត​ថា៖ ​«ប៉ុន្តែ​ជា​អកុសល​ខ្ញុំ​មិន​មាន​ប្រវត្តិរូប​របស់​លោក​ទេ»​។

លោក​ ភូ​ លី​វូដ ​ទី​ប្រឹក្សា​រដ្ឋា​ភិបាល ​និង​ជា​អតីត​ប្រធាន​បច្ចេក​វិទ្យា​គមនាគមន៍​ព័ត៌មាន​វិទ្យា​ជាតិ ​(NiDA) ​បាន​សម្ដែង​ការ​សោក​ស្ដាយ​យ៉ាង​ខ្លាំង​ចំពោះ​មរណភាព​របស់​លោក​សូរ ឃុន​។ ​

លោក​បាន​ថ្លែង​ថា៖​ «​យើង​បាន​បាត់​បង់​បុគ្គល​ល្អ​មួយ​រូប​ដែល​បាន​ព្យាយាម​អភិវឌ្ឍ​វិស័យ​ព័ត៌មានវិទ្យា​ និង​ទូរគមនាគមន៍​ (ICT​) នៅ​ក្នុង​ប្រទេស​កម្ពុជា​ចាប់​ពី​បាត​ដៃ​ទទេ​ក្រោយ​ឆ្នាំ​ ១៩៧៩​»​។

យោង​តាម​ទិន្នន័យ​បាន​ពី​ក្រសួង​ប្រៃសណីយ៍ ​និង​ទូរគមនាគមន៍ ​ចំនួន​ស៊ីម​កាត​ដែល​បាន​ប្រើ​ប្រាស់នៅ​ក្នុង​ប្រទេស​កម្ពុជា​បាន​កើន​ឡើង​ដល់​ជាង​ ២០ ​លាន​កាល​ពី​ឆ្នាំ ​២០១៣ ក្នុង​នោះ​ ២០,២ ​លាន​ជា​ស៊ីម​ប្រើ​​ទូរស័ព្ទ​ចល័ត​ដែល​កើន​ឡើង​ពី​ ១៩,១​ លាន​ ខណៈ​អ្នក​ប្រើ​ប្រាស់​ទូរស័ព្ទ​មាន​ខ្សែ​បាន​ថយ​ចុះ​២៨​ភាគ​រយ​ពី ​៥៨៤ ​៤៧៥ ​មក​នៅ​ត្រឹម​​ ៤២០ ​៩៤២​ នាក់​។​អ្នក​ប្រើ​ប្រាស់​អ៊ីនធឺណិត​ទាំង​មាន​ខ្សែ​ និង​ទូរស័ព្ទ​ចល័ត​បាន​កើន​ឡើង​ពី​២,៧​លាន​ដល់​៣,​៨​លាន​នាក់៕

អត្ថបទគួរចាប់អារម្មណ៍