.jpg)
កាលពីថ្ងៃទី ២ ខែមិថុនា រោងចក្រសម្លៀកបំពាក់ ស្បែកជើង និងទំនិញធ្វើដំណើររបស់ប្រទេសកម្ពុជា ប្រហែល ២៥០ ត្រូវផ្អាកប្រតិបត្តិការទាំងស្រុង រួមទាំងកម្មករជាង ១៣០ ០០០ នាក់។ ហុង មិនា
ភ្នំពេញៈ អគ្គលេខាធិការសមាគមរោងចក្រកាត់ដេរនៅកម្ពុជា (GMAC) កាលពីថ្ងៃអាទិត្យបានបដិសេធព័ត៌មានដែលអះអាងថា គណៈកម្មការអឺរ៉ុប បានច្រានចោលការស្នើសុំការពន្យារពេល ១២ ខែជុំវិញការដកផែនការអនុគ្រោះពន្ធពាណិជ្ជកម្មអ្វីៗគ្រប់យ៉ាងលើកលែងតែអាវុធ (EBA) លើឧស្សាហកម្មសម្លៀកបំពាក់ ស្បែកជើង និងទំនិញធ្វើដំណើរ។
កាសែត Nikkei Asian Review របស់ប្រទេសជប៉ុនបានរាយការណ៍កាលពីថ្ងៃសៅរ៍ថា ឧស្សាហកម្មសម្លៀកបំពាក់របស់ប្រទេសកម្ពុជា ដែលរងផលប៉ះពាល់រួចហើយដោយការរីករាលដាលវីរុសកូរ៉ូណានឹងរងផលប៉ះពាល់ជាលើកទី ២ បន្ទាប់ពីសហភាពអឺរ៉ុបបានផ្ដល់សញ្ញាថា ខ្លួននឹងមិនព្យួរការសម្រេចចិត្តរបស់ខ្លួនក្នុងការទប់ស្កាត់សិទ្ធិពាណិជ្ជកម្មសម្រាប់វិស័យសំខាន់ៗនោះទេ។
នៅក្នុងអ៊ីមែលមួយផ្ញើទៅកាសែត Nikkei Asian Review គណៈកម្មការអឺរ៉ុប បានឲ្យដឹងថា ដំណើរផ្លូវរបស់ប្រទេសកម្ពុជាក្នុងការរក្សាឋានៈ EBA ពេញលេញរបស់ខ្លួនគឺតាមរយៈការបង្ហាញ «ការរីកចម្រើនសំខាន់ៗ» នៅក្នុងការកែលម្អសិទ្ធិនយោបាយ និងស៊ីវិល។
បើបញ្ហានោះកើតឡើង «គណៈកម្មការនេះអាចពិនិត្យសេចក្ដីសម្រេចចិត្តរបស់ខ្លួនឡើងវិញ និងធ្វើឲ្យមានឡើងវិញនូវការអនុគ្រោះពន្ធពាណិជ្ជកម្ម ស្ថិតក្រោមកិច្ចព្រមព្រៀង EBA»។
កាសែតនេះបានឲ្យដឹងថា ការបារម្ភដ៏សំខាន់របស់ EU រួមបញ្ចូលទាំងការធ្វើឲ្យដូចដើមឡើងវិញនៃគណបក្សប្រឆាំងដែលបានហាមឃាត់ការធ្វើនយោបាយនាពេលនេះ និងការទម្លាក់ការចោទប្រកាន់ក្បត់ជាតិប្រឆាំងនឹងមេដឹកនាំរបស់គណបក្សមួយនេះ។
លោក ខេន លូ អគ្គលេខាធិការ GMAC បានបញ្ជាក់ថា លោកមិនបានទទួលពេញលេញនូវរបាយការណ៍ដែលត្រូវបានរាយការណ៍ដោយកាសែត Nikkei Asian Review ដោយបាននិយាយថា ដោយសារតែអត្ថបទដែលបានសរសេរដោយកាសែត Nikkie មិនបានបញ្ជាក់ប្រភពច្បាស់លាស់គឺដោយគ្រាន់តែដកស្រង់សម្ដីប្រភពអនាមិកតែប៉ុណ្ណោះ ដែលមិនបានតំណាងឲ្យការសន្និដ្ឋានដោយ គណៈកម្មការអឺរ៉ុបនោះទេ។
លោកថ្លែងថា៖ «យើងទើបតែបានអំពាវនាវដល់គណៈកម្មការអឺរ៉ុប (EC) ហើយរហូតមកដល់ពេលនេះ យើងមិនបានទទួលការឆ្លើយតបណាមួយពី EC នោះទេ។ ការអំពាវនាវរបស់យើងត្រូវបានពឹងផ្អែកលើមូលហេតុសេដ្ឋកិច្ច និងសង្គម និងផលប៉ះពាល់។ មិនបានពឹងផ្អែកលើកត្តាផ្សេងទៀតនោះទេ»។
លោកស្រី Carmen Moreno ឯកអគ្គរាជទូតសហភាពអឺរ៉ុបប្រចាំប្រទេសកម្ពុជា មិនបានឆ្លើយតបភ្នំពេញប៉ុស្ដិ៍ តាមរយៈអ៊ីមែលកាលពីថ្ងៃអាទិត្យនោះទេ។
យោងតាមសេចក្ដីប្រកាសព័ត៌មានរួមមួយរវាងសមាគមរោងចក្រកាត់ដេរកម្ពុជា (GMAC) សមាគមស្បែកជើងកម្ពុជា (CFA) និងសភាពាណិជ្ជកម្មអឺរ៉ុបនៅកម្ពុជា (EuroCham) ដែលបានផ្ញើទៅ EC កាលពីថ្ងៃទី ២ ខែមិថុនា រោងចក្រសម្លៀកបំពាក់ ស្បែកជើង និងទំនិញធ្វើដំណើររបស់ប្រទេសកម្ពុជាប្រហែល ២៥០ ត្រូវផ្អាកប្រតិបត្តិការទាំងស្រុង និងកម្មករជាង ១៣០ ០០០ នាក់នៅក្នុងវិស័យនេះ។
លិខិតនេះបន្តថា នៅត្រីមាសទី ១ ឆ្នាំ ២០២០ ចំនួនអ្នកទិញបានលុបចោលការបញ្ជាទិញ បន្ទាប់ពីការបញ្ជាទិញទាំងនោះត្រូវបានបញ្ចប់ ឬខណៈដែលកំពុងផលិត។ វាត្រូវបានប៉ាន់ប្រមាណថា នៅត្រីមាសទី ២ ឆ្នាំ ២០២០ ទំនងជានឹងធ្លាក់ចុះមកនៅត្រឹម ៥០ និង ៦០ ភាគរយធៀបនឹងឆ្នាំ ២០១៩។
EU គឺជាដៃគូពាណិជ្ជកម្មឈានមុខគេរបស់កម្ពុជាដែលស្រូបយក ៤៥ ភាគរយនៃការនាំចេញសរុបកាលពីឆ្នាំ ២០១៨។ ការនាំចេញទៅទីផ្សារចាយប្រាក់អឺរ៉ូរបស់ EU សម្រេចបាន ៤,៩ ពាន់លានអឺរ៉ូកាលពីឆ្នាំ ២០១៨ ដែលកើនឡើងជិត ២ ដង ២,៥ ពាន់លានអឺរ៉ូដែលបានកត់ត្រាកាលពីឆ្នាំ ២០១៣។ ៩៥,៧ ភាគរយនៃការនាំចេញទាំងនេះបានចូលទៅទីផ្សារ EU ស្ថិតក្រោមការអនុគ្រោះពន្ធពាណិជ្ជកម្ម EBA។ ជារួម ប្រទេសកម្ពុជាគឺជាប្រទេសប្រើប្រាស់ការអនុគ្រោះពន្ធពាណិជ្ជកម្ម EBA ឈានមុខគេទី ២ បន្ទាប់ពីប្រទេសបង់ក្លាដែស។
កាលពីខែកុម្ភៈគណៈកម្មការអឺរ៉ុបបានប្រកាសការដក ១ ផ្នែកនៃផែនការអ្វីៗគ្រប់យ៉ាងលើកលែងតែអាវុធ (EBA) នឹងប៉ះពាល់ ១ ភាគ ៥ ឬ ១ ពាន់លានអឺរ៉ូ (ជាង ១,០៨ ពាន់លានដុល្លារ) នៃការនាំចេញប្រចាំឆ្នាំរបស់ប្រទេសកម្ពុជាទៅប្លុកនៃប្រទេសអ្នកមានដែលមាន ២៧ ប្រទេសចាយប្រាក់អឺរ៉ូនេះ៕LA
វីដេអូ៖
