.jpg)
លោក គុណ ញឹម ឡើងថ្លែងសុន្ទរកថាក្នុងវេទិកាស្តីពីគយកម្ពុជាកាលពីម្សិលមិញ។ រូបថត ហ៊ឹន ពិសី
ភ្នំពេញៈ ប្រធានសភាពាណិជ្ជកម្មកម្ពុជាមានសុទិដ្ឋិនិយមថា សេដ្ឋកិច្ចប្រទេស កម្ពុជា នឹងមានភាពល្អប្រសើរលើគ្រប់វិស័យនៅពេលកិច្ចព្រមព្រៀងពាណិជ្ជកម្មសេរីកម្ពុជា-ចិន (FTA) សម្រេចបានជាផ្លូវការដោយអះអាងថា ចំនួនរោងចក្រថ្មីនឹងកើនឡើងជាបន្តបន្ទាប់។
ក្នុងឱកាសចូលរួម «វេទិកាស្តីពីគយកម្ពុជាលើកទី ១» ដែលរៀបចំឡើងដោយសភាពាណិជ្ជកម្មកម្ពុជាសហការជាមួយអគ្គនាយកដ្ឋានគយ និងរដ្ឋាករកម្ពុជា កាលពីថ្ងៃអង្គារលោក គិត ម៉េង ប្រធានសភាពាណិជ្ជកម្មកម្ពុជាបាននិយាយថា ខណៈបច្ចុប្បន្នមានមនុស្សជាច្រើនកំពុងនិយាយពីក្តីបារម្ភចំពោះការបាត់បង់ភាពអនុគ្រោះពន្ធ EBA ពីសហភាពអឺរ៉ុបនោះអ្វីៗនឹងមានភាពល្អប្រសើរឡើងវិញនៅពេលដែលកម្ពុជាអាចឈានទៅសម្រេចកិច្ចព្រមព្រៀងពាណិជ្ជកម្មសេរីជាមួយចិន។
លោកថ្លែងថា៖ «បច្ចុប្បន្នកម្ពុជាកំពុងតែចរចាជាមួយមិត្តចិន ដើម្បីធ្វើ FTA។ បើសិនកម្ពុជាមានកិច្ចព្រមព្រៀង FTA ជាមួយមិត្តចិន ខ្ញុំជឿថារាល់ដងដែលយើងតែងនិយាយពី EBA នោះយើងនឹងឈប់និយាយ ព្រោះពេលដែលយើងមាន FTA ជាមួយចិន ខ្ញុំជឿថាចំនួនរោងចក្រថ្មីៗនៅកម្ពុជានឹងកើនឱកាសការងារក៏មានច្រើនដែរ»។
លោកបន្តថា នៅពេលកម្ពុជាមានកិច្ចព្រមព្រៀង FTA ជាមួយប្រទេសចិន វិស័យអចលនទ្រព្យនៅកម្ពុជាក៏នឹងមានសម្ទុះខ្លាំងផងដែរ។ លោកថ្លែងថា៖ «អ្នកដែលមានដី ឬមានបំណងចង់លក់ដី កុំទាន់អាលលក់ យកទុកសិនទៅ ដើម្បីចៀសវាងការស្តាយក្រោយ»។
សេចក្តីប្រកាសព័ត៌មានក្រសួងសេដ្ឋកិច្ច និងហិរញ្ញវត្ថុស្តីពី «លទ្ធផលនៃការចរចាកិច្ចព្រមព្រៀងពាណិជ្ជកម្មសេរីកម្ពុជា ចិន និងគោលការណ៍សម្រាប់ការចរចាបន្ត» កាលពីថ្ងៃទី ១៣ ខែ កុម្ភៈ ឆ្នាំ ២០២០ បានឲ្យដឹងថា បច្ចុប្បន្នការចរចាលើកិច្ចព្រមព្រៀងពាណិជ្ជកម្មសេរីរវាងកម្ពុជា ចិន បានបញ្ចប់ជុំទី ១ រួចហើយដោយកិច្ចប្រជុំនឹងមានជាបន្តបន្ទាប់ទៀតនៅពេលខាងមុខសំដៅធ្វើយ៉ាងណាឲ្យអាចបញ្ចប់នៅត្រឹមពាក់កណ្តាលឆ្នាំ ២០២០ និងគ្រោងចុះហត្ថលេខានៅដំណាច់ឆ្នាំនេះតែម្តង។
បើតាមសេចក្តីប្រកាសព័ត៌មានខាងលើ កិច្ចព្រមព្រៀងពាណិជ្ជកម្មសេរី FTA នេះនឹងផ្តល់ឲ្យកម្ពុជានូវភាពកាន់តែសម្បូរបែបក្នុងការនាំចេញផលិតផលរបស់ខ្លួនទៅទីផ្សារចិនទាំងបរិមាណ និងមុខទំនិញតាមរយៈការផ្តល់នូវការអនុគ្រោះពន្ធប្រសើរជាងមុន។ បន្ថែមពីនេះកិច្ចព្រមព្រៀងនេះក៏នឹងធ្វើឲ្យប្រសើរឡើងនូវកិច្ចសម្រួលពាណិជ្ជកម្ម តាមរយៈការជួយសម្រួល និងកាត់បន្ថយបែបបទ នីតិវិធី និងវិធានការនានាដែលមិនចាំបាច់ដែលធ្វើឲ្យរាំងស្ទះដល់លំហូរពាណិជ្ជកម្មទំនិញ។
លោក ស៊ិន ចន្ធី ប្រធានសមាគមភ្នាក់ងារបញ្ជូនទំនិញកម្ពុជាបានឲ្យដឹងថា ប្រសិនបើកម្ពុជាអាចសម្រេចបានកិច្ចព្រមព្រៀងពាណិជ្ជកម្មសេរី FTA ជាមួយចិន វានឹងផ្តល់នូវផលប្រយោជន៍ជាច្រើនសម្រាប់សេដ្ឋកិច្ចកម្ពុជា ខណៈកម្ពុជាកំពុងបាត់បង់ការទទួលបានភាពអនុគ្រោះពន្ធមួយចំនួនពីសហភាពអឺរ៉ុប។
លោកថ្លែងថា៖ «ដោយសារទំហំពាណិជ្ជកម្មកម្ពុជា និងចិនមានទំហំធំស្រាប់ទៅហើយនោះ ដូច្នេះនៅពេលប្រទេសទាំង ២ នេះមានកិច្ចព្រមព្រៀង FTA ទៀតនោះខ្ញុំគិតថា គ្រប់ផ្នែកទាំងអស់នឹងមានភាពល្អប្រសើរខ្លាំង»។
ទោះយ៉ាងណាលោកបញ្ជាក់ថា នៅពេលទទួលបានកិច្ចព្រមព្រៀងនេះ កម្ពុជាក៏ត្រូវគិតគូរពីការពង្រឹងគុណភាពផលិតផលរបស់ខ្លួនផងដែរ។
លោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជាបានលើកឡើងក្នុងវេទិកាកាលពីថ្ងៃម្សិលមិញថា សេដ្ឋកិច្ចកម្ពុជាកំពុងស្ថិតក្នុងដំណាក់ការមួយដែលមានការវិវត្តទៅមុខជាលំដាប់ និងមានផ្លាស់ប្តូរយ៉ាងលឿនទាំងហេដ្ឋារចនាសម្ព័ន្ធសេដ្ឋកិច្ច និងសង្គមដែលចាំបាច់តម្រូវឲ្យមានការយកចិត្តទុកដាក់ពង្រឹងការអនុវត្តច្បាប់ ការកែលម្អបរិយាកាសវិនិយោគ ពាណិជ្ជកម្ម និងធុរកិច្ចផ្សេងៗ។
របាយការណ៍ពីធនាគារជាតិនៃកម្ពុជាបានឲ្យដឹងថា ក្នុងរយៈពេល ៩ ខែ ឆ្នាំ ២០១៩ កម្ពុជាបាននាំចូលទំនិញពីបរទេសក្នុងតម្លៃសរុប ១៦,៥ ពាន់លានដុល្លារក្នុងនោះប្រទេសចិនឈរនៅចំណាត់ថ្នាក់ទី ១ ដោយមានចំណែកទីផ្សារ ៣៩ ភាគរយ ចំណែកការនាំចេញទៅកាន់ទីផ្សារអន្តរជាតិមានតម្លៃសរុប ១០,៩ ពាន់លានដុល្លារក្នុងនោះចិនឈរនៅលេខរៀងទី ៤ ស្មើនឹងចំណែកទីផ្សារ ៧ ភាគរយ៕LA
