The Phnom Penh Post Search

Search form

Logo of Phnom Penh Post newspaper Phnom Penh Post - លោក គុណ ញឹម ត្រូវ​បាន​តែង​តាំង​ជា​អគ្គ​នាយក​គយ និង​រដ្ឋាករ

លោក គុណ ញឹម ត្រូវ​បាន​តែង​តាំង​ជា​អគ្គ​នាយក​គយ និង​រដ្ឋាករ

លោក គុណ ញឹម ត្រូវ​បាន​តែង​តាំង​ជា​អគ្គ​នាយក​គយ និង​រដ្ឋាករ

ភ្នំពេញៈ លោក គុណ ញឹម អគ្គ​នាយក​រង​នៃ​អគ្គ​នាយកដ្ឋាន​គយ និង​រដ្ឋាករ​កម្ពុជា (GDCE) ត្រូវ​បាន​តែង​តាំង​ជំនួស លោក ប៉ែន ស៊ីម៉ន អគ្គ​នាយក​ដែល​បាន​កាន់​តំណែង​នេះ​អស់​រយៈ​ពេល​ជិត ១៦ ឆ្នាំ​មក​ហើយ​ចាប់​តាំង​ពី ឆ្នាំ​១៩៩៨។

យោង​តាម​ព្រះ​រាជក្រឹត្យ​ដែល​បាន​ឡាយ​ព្រហស្តលេខា​ដោយ​ព្រះ​មហាក្សត្រ នរោត្តម សីហមុនី ចុះ​កាល​បរិច្ឆេទ​ថ្ងៃ ទី២៩ ខែ​កញ្ញា បាន​គូស​បញ្ជាក់​ថា លោក គុណ ញឹម ដែល​បច្ចុប្បន្ន​ជា​អគ្គ​នាយក​រង GDCE ត្រូវ​បាន​តែង​តាំង​ជា​អគ្គ​នាយក​ជំនួស​លោក ប៉ែន ស៊ីម៉ន ដែល​ត្រូវ​ចូល​និវត្តន៍។

ព្រះ​រាជក្រឹត្យ​ឲ្យ​ដឹង​ថា៖ «សម្តេច​អគ្គ​មហា​សេនាបតី​តេជោ ហ៊ុន សែន នាយក​រដ្ឋ​មន្ត្រី​នៃ​ព្រះ​រាជា​ណាចក្រ​កម្ពុជា ត្រូវ​តែ​ទទួល​បន្ទុក​អនុវត្ត​តាម​ព្រះ​រាជ​ក្រឹត្យ​ចាប់​ពី​ថ្ងៃ​ឡាយ​ព្រហស្ដលេខា​នេះ​ត​ទៅ»។

លោក យឹម សុវណ្ណ មន្ដ្រី​ជាន់​ខ្ពស់​របស់​គណបក្ស​សង្គ្រោះ​ជាតិ បាន​ប្រាប់ ភ្នំពេញ ប៉ុស្ដិ៍ ថា លោក​គ្មាន​ក្ដី​សង្ឃឹម​ចំពោះ​ការ​ផ្លាស់​ប្តូរ​នេះ​អាច​កែលម្អ​ប្រាក់​ចំណូល​ពន្ធ និង​រដ្ឋាករ​ឡើយ ដោយ​លោក​បាន​លើក​ឡើង​ថា រដ្ឋាភិបាល​បាន​ខាត​បង់​ប្រាក់​ចំណូល​ជា​ច្រើន​ក្នុង​ថវិកា​ជាតិ​ដោយ​សារ​តែ​អំពើ​ពុក​រលួយ​នៅ​ក្នុង GDCE និង​អគ្គ​នាយកដ្ឋាន​ពន្ធដារ (GDT)។

លោក​ថ្លែង​ថា៖ «ការ​ផ្លាស់​ប្តូរ​នេះ​គឺ​វា​ជា​ប្រព័ន្ធ​ទៅ​ហើយ ដោយ​គ្រាន់​តែ​ធ្វើ​ការ​ផ្លាស់​ប្តូរ​មនុស្ស​ដែល​មក​ពី​គណបក្ស​ប្រជាជន​ប៉ុណ្ណោះ ដូច្នេះ​ពួក​គេ​នៅ​តែ​រក្សា​នូវ​របៀប​ធ្វើ​ការ​ដដែល​ដើម្បី​ងាយ​ស្រួល​ក្នុង​ការ​ប្រព្រឹត្ត​អំពើ​ពុក​រលួយ»។ លោក​លើក​ឡើង​ថា៖ «តើ​អង្គភាព​ប្រឆាំង​អំពើ​ពុក​រលួយ​មាន​ដែល​សួរ​មន្ដ្រី​គយ​ណា​មួយ​ឬ​មាន​ដែល​ធ្វើ​អង្កេត​អំពី​បញ្ហា​នេះ​ទេ? យើង​ជា​គណបក្ស​ប្រឆាំង​បាន​ផ្ដល់​យោបល់​ដល់​រដ្ឋាភិបាល​ជាច្រើន​ឲ្យ​ធ្វើ​ដូច​នេះ​ឬ​ដូច​នោះ ប៉ុន្តែ​មិន​ធ្វើ​អ្វី​ទាំង​អស់»។

លោក​បន្ថែម​ថា ការ​ប្រមូល​ប្រាក់​ចំណូល​របស់​កម្ពុជា​ពី​វិស័យ​ពន្ធ​មាន​តែ​ជាង ១០ ភាគរយ​នៃ​ផលិត​ផល​ក្នុង​ស្រុក​សរុប ខណៈ​បណ្ដា​ប្រទេស​ជិត​ខាង​អាច​ប្រមូល​បាន ២០ ភាគរយ​នៃ​ផលិត​ផល​ក្នុង​ស្រុក​សរុប «នេះ​មាន​ន័យ​ថា យើង​ខាត​បង់​ប្រាក់​ចំណូល​បាន​ពី​ស្ថាប័ន​ទាំង​ពីរ​នេះ ដោយ​សារ​តែ​អំពើ​ពុក​រលួយ»។

លោក គុណ ញឹម មិន​អាច​ទាក់​ទង​ដើម្បី​ធ្វើ​ការ​អត្ថាធិប្បាយ​លើ​បញ្ហា​នេះ​បាន​ទេ កាល​ពី​ថ្ងៃ​ពុធ។ លោក​បាន​ចាប់​ផ្ដើម​ធ្វើ​ការងារ​នៅ​អគ្គ​នាយដ្ឋាន​គយ និង​រដ្ឋាករ​ចាប់​តាំង​ពី ឆ្នាំ​១៩៩៩ ដោយ​ការងារ​ដែល​លោក​ទទួល​ខុស​ត្រូវ​ភាគ​ច្រើន​គ្រប​ដណ្ដប់​លើ​ការ​កែ​ទម្រង់​ផ្សេងៗ និង​ការ​ធ្វើ​ទំនើប​កម្ម​រដ្ឋបាល​គយ​កម្ពុជា​ដូច​ជា ការ​ជួយ​សម្រួល​ពាណិជ្ជកម្ម ស្វ័យ​ប្រវត្តិ​កម្ម​គយ​ដែល​លោក​គឺជា​ប្រធាន​គម្រោង ទទួល​បន្ទុក​ច្រក​ចេញ​ចូល​ថ្នាក់​ជាតិ​តែ​មួយ និង​ការ​ចូល​រួម​ក្នុង​គយ​អន្តរជាតិ​ជាដើម៕

អត្ថបទគួរចាប់អារម្មណ៍