.jpg)
កម្មករចិន កំពុងលើកបាវសណ្តែកសៀងនៅកំពង់ផែក្នុងទីក្រុងណានតុង ខេត្តជាំងស៊ូ ប្រទេសចិន។ រូបថត AFP
ក្រុងវ៉ាស៊ីនតោនៈ លោកប្រធានាធិបតីអាមេរិក ដូណាល់ ត្រាំ បានប្រកាសកាលពីថ្ងៃអង្គារថា មន្ត្រីពាណិជ្ជកម្មជាន់ខ្ពស់របស់អាមេរិក នឹងធ្វើដំណើរទៅប្រទេសចិនក្នុងពេលឆាប់ៗនេះ ដោយសាររដ្ឋាភិបាលក្រុងវ៉ាស៊ីនតោន និងក្រុងប៉េកាំង ព្យាយាមដោះស្រាយជម្លោះពាណិជ្ជកម្ម ដែលបានធ្វើឲ្យទីផ្សារចលាចល និងធ្វើឲ្យក្រុមហ៊ុននាំចេញព្រួយបារម្ភ។
ប្រធានាធិបតីរូបនេះបានប្រាប់ក្រុមអ្នកយកព័ត៌មានថា លោក Steven Mnuchin រដ្ឋមន្ត្រីក្រសួងហិរញ្ញវត្ថុអាមេរិក លោក Robert Lighthizer តំណាងពាណិជ្ជកម្មអាមេរិក និងមន្ត្រីជាច្រើនរូបផ្សេងទៀត នឹងធ្វើដំណើរទៅប្រទេសចិនតាមសំណើរជាបន្ទាន់របស់រដ្ឋាភិបាលក្រុងប៉េកាំង។
លោកមានប្រសាសន៍ថា៖ «លោក Steve Mnuchin រដ្ឋមន្ត្រីក្រសួងហិរញ្ញវត្ថុ នឹងធ្វើដំណើរទៅប្រទេសចិនក្នុងរយៈពេលប៉ុន្មានថ្ងៃខាងមុខនេះ ដើម្បីចរចាពាណិជ្ជកម្ម»។ លោកបានបន្តឲ្យដឹងទៀតថា៖ «ខ្ញុំគិតថា ប្រទេសចិនមានភាពច្បាស់លាស់ខ្លាំង ហើយយើងក៏ច្បាស់លាស់ផងដែរ»។
លោកមានប្រសាសន៍បន្តថា៖ «ដូច្នេះយើងនឹងមានប្រតិភូមួយក្រុម តាមសំណើររបស់ពួកគេ ធ្វើដំណើរទៅកាន់ប្រទេសចិន។ ពួកគេបានមកទីនេះនាពេលថ្មីៗនេះ ហើយយើងនឹងទៅទីនោះវិញ។ ហើយនោះគឺជាដំណឹងល្អ»។
លោកបានបន្តឲ្យដឹងថា ភាគីទាំងពីរ មាន «ឱកាសល្អខ្លាំង» នៃការឈានដល់កិច្ចព្រមព្រៀងមួយ។ លោក ត្រាំ បានអនុញ្ញាតឲ្យមានការហូតពន្ធលើការនាំចេញរបស់ប្រទេសចិនក្នុងតម្លៃប្រមា ៥០ ពាន់លានដុល្លារ ដើម្បីឆ្លើយតបនឹងការលួចកម្មសិទ្ធិបញ្ញារបស់អាមេរិក ដែលប្រទេសចិនបានរងការចោទប្រកាន់។
រដ្ឋាភិបាលក្រុងប៉េកាំងបានឆ្លើយតបវិញតាមរយៈការហូតពន្ធភ្លាមៗលើការនាំចេញកសិផលសំខាន់ៗរបស់អាមេរិក ពោលគឺជាជាវិធានការដែលមានគោលបំណងកំណត់ទិសដៅលើរដ្ឋដែលជាមូលដ្ឋានគាំទ្រសម្លេងឆ្នោតរបស់ប្រធានាធិបតីអាមេរិករូបនេះ ហើយអាចអនុវត្តដូចគ្នានេះដែរចំពោះឧស្សាហកម្មសណ្តែកសៀងដែលមានភាពរសើបរបស់អាមេរិក៕ AFP/BP
