.jpg)
លោក ប៉ែន ចិន្តា អគ្គនាយកសមាគម CAFT។ រូបថត ម៉ៃ គុណមករា
ដោយសារតែការអភិវឌ្ឍយ៉ាងឆាប់រហ័សនៃបដិវត្តន៍ឧស្សាហកម្មទី ៤ និងបច្ចេកវិទ្យាឌីជីថលដែលកំពុងធ្វើឲ្យមានការផ្លាស់ប្តូរសេដ្ឋកិច្ចពិភពលោក និងក្នុងតំបន់។ នាពេលបច្ចុប្បន្ននេះមានក្រុមហ៊ុនដែលពាក់ព័ន្ធនឹងបច្ចេកវិទ្យាជាច្រើនកំពុងកើនឡើងនៅកម្ពុជា។
សប្ដាហ៍មុន សមាគមបច្ចេកវិទ្យាហិរញ្ញវត្ថុកម្ពុជា (CFA) និងសមាគមកម្ពុជានៃបច្ចេកវិទ្យាហិរញ្ញវត្ថុ និងបច្ចេកវិទ្យា (CAFT) បានច្របាច់បញ្ចូលគ្នាដើម្បីកំណត់ទិសដៅរួមមួយក្នុងការអភិវឌ្ឍវិស័យបច្ចេកវិទ្យាឌីជីថល និងនវានុវត្តន៍របស់ប្រទេសកម្ពុជាឈានឡើងមួយកម្រិតទៀត។
លោក ប៉ែន ចិន្តា អគ្គនាយកសមាគមថ្មីនេះបានផ្តល់បទសម្ភាសជាមួយលោក ម៉ៃ គុណមករា ការីនិពន្ធព័ត៌មានសេដ្ឋកិច្ចនៃកាសែតភ្នំពេញប៉ុស្ដិ៍ ដោយពិភាក្សាអំពីស្ថានភាពបច្ចេកវិទ្យាឌីជីថលនៅពេលបច្ចុប្បន្នដែលនឹងរួមចំណែកដល់ការអភិវឌ្ឍសេដ្ឋកិច្ចរបស់ប្រទេសកម្ពុជានាពេល បច្ចុប្បន្ន និងអនាគត។
តើលោកសង្កេតឃើញការអភិវឌ្ឍវិស័យបច្ចេកវិទ្យា ព័ត៌មានវិទ្យា និងទូរគមនាគមន៍ (ICT) និងនវានុវត្តន៍នៅក្នុងប្រទេសកម្ពុជាមានសម្ទុះយ៉ាងណាដែរ?
សម្រាប់បរិយាកាសនៃក្រុមហ៊ុន បង្កើតថ្មីនៅកម្ពុជាបានបង្ហាញកំណើនប្រកបដោយស្ថិរភាព ជាពិសេសនៅក្នុងឧស្សាហកម្មបច្ចេកវិទ្យាហិរញ្ញវត្ថុ ប៉ុន្តែវានៅតែកំពុងស្ថិតក្នុងដំណាក់កាលទើបនឹងចាប់ផ្ដើម។ មានការងារជាច្រើនត្រូវធ្វើ និងត្រូវដោះស្រាយ ហើយនេះជាអ្វីដែល CAFT ត្រូវបង្កើតឡើង។ យើងចង់ជួយគាំទ្រក្រុមហ៊ុនបង្កើតថ្មីតាមរយៈការផ្គុំជាសំឡេងរួមគ្នាតែមួយទៅកាន់និយតករ ការបង្កើតទំនាក់ទំនងពួកគេជាមួយគ្រឹះស្ថានហិរញ្ញវត្ថុ សហគមន៍ និងផ្ដល់ការគាំទ្រដល់ពួកគេដែលចាំបាច់ត្រូវធ្វើឲ្យរីកចម្រើនដល់គំនិត និងអាជីវកម្មរបស់ពួកគេ ដើម្បីប្រើឲ្យអស់ពីសក្ដានុពលរបស់ខ្លួនដែលមាន។
បច្ចុប្បន្នមានការកើនឡើងចំពោះការទូទាត់ដោយគ្មានសាច់ប្រាក់ តើការអភិវឌ្ឍនេះនឹងជួយជំរុញប្រជាជនដែលមិនមានគណនីធនាគារអាចទាក់ទាញពួកគាត់ឲ្យមកប្រើប្រាស់វិស័យហិរញ្ញវត្ថុដែរឬទេ?
ឧស្សាហកម្មបច្ចេកវិទ្យាហិរញ្ញវត្ថុគឺជាឧស្សាហកម្មមួយដែលរីកចម្រើនរហ័សបំផុតនៅកម្ពុជាដែលបានធ្វើឲ្យសេវា និងផលិតផលហិរញ្ញវត្ថុអាចមានលទ្ធភាពទទួលបានការប្រើប្រាស់កាន់តែច្រើន និងតម្លៃសមរម្យចំពោះប្រជាជន។ អាចទទួលបានការប្រើប្រាស់ចំពោះផលិតផល និងសេវាទាំងនេះ ឌីជីថលបាននិងកំពុងត្រួសត្រាយផ្លូវសម្រាប់ការបង្កើនការទទួលបានសេវាហិរញ្ញវត្ថុគ្រប់ៗគ្នាសម្រាប់ប្រជាជនកម្ពុជា។ ដោយមានការគាំទ្រពីធនាគារជាតិនៃកម្ពុជា (NBC) សម្រាប់គ្រឹះស្ថានផ្ដល់សេវាទូទាត់របស់យើង យើងកំពុងសម្លឹងទៅអនាគតកាន់តែល្អប្រសើរសម្រាប់ប្រជាជនកម្ពុជាដែលមិនមានគណនីធនាគារអាចទទួលបានសេវាហិរញ្ញវត្ថុតាមមធ្យោបាយដែលមិនមានលក្ខណៈធម្មតា។
បច្ចេកវិទ្យាហិរញ្ញវត្ថុពិតជាថ្មីចំពោះប្រទេសកម្ពុជា។ តើកម្ពុជាបានបង្កើតនូវបទប្បញ្ញត្តិគ្រប់គ្រាន់ហើយឬនៅ ដើម្បីគ្រប់គ្រងលើវិស័យនេះ?
វាពិតជាមានប្រសិទ្ធភាព និងមានប្រយោជន៍ខ្លាំងបំផុតចំពោះសហគមន៍បច្ចេកវិទ្យាហិរញ្ញវត្ថុ ប៉ុន្តែវានៅតែកំពុងវិវឌ្ឍជាប្រចាំ។ ខណៈដែលឧស្សាហកម្មបច្ចេកវិទ្យាហិរញ្ញវត្ថុរីកចម្រើន ការទទួលយកគឺជាសារៈសំខាន់ ដូច្នេះនឹងមានជម្រើសសម្រាប់ក្របខ័ណ្ឌការងារបទប្បញ្ញត្តិត្រូវបង្កើតឡើង ឬផ្លាស់ប្តូរ។ ឧទាហរណ៍មួយគឺ ច្បាប់ពាណិជ្ជកម្មតាមអេឡិចត្រូនិកដែលត្រូវបានអនុម័តកាលពីខែវិច្ឆិកាឆ្នាំ ២០១៩ ដែលមិនគ្រាន់តែមានប្រយោជន៍សម្រាប់ក្រុមហ៊ុនប៉ុណ្ណោះទេ ប៉ុន្តែថែមទាំងសម្រាប់អតិថិជនផងដែរ។
រដ្ឋាភិបាលគ្រោងនឹងប្រែក្លាយទៅជាសេដ្ឋកិច្ចឌីជីថលដើម្បីដើរតួជាកំណើនថ្មីមួយក្នុងរយៈពេលប៉ុន្មានឆ្នាំខាងមុខនេះ តើលោកបានមើលឃើញរដ្ឋាភិបាលបានធ្វើអ្វីខ្លះរហូតមកដល់ពេលនេះដើម្បីសម្រេចបំណងនោះ?
ប្រសិនបើយើងសម្លឹងមើលទស្សនវិស័យ និងផែនការរបស់រដ្ឋាភិបាលក្នុងការប្រែក្លាយប្រទេសកម្ពុជាត្រឹមឆ្នាំ ២០២៣ ទៅជាសេដ្ឋកិច្ចឌីជីថល ខ្ញុំគិតថា យើងកំពុងធ្វើដំណើរលើវិថីនេះហើយនាពេលបច្ចុប្បន្ននេះ។ កត្តាដ៏សំខាន់មួយលើបញ្ហានេះគឺការគាំទ្រ និងការសម្របសម្រួលតាមរយៈការយកវិធីសាស្ដ្រដំបូងរបស់រដ្ឋាភិបាលដែលអាចឲ្យប្រជាពលរដ្ឋព្រមទាំងម្ចាស់ក្រុមហ៊ុនដើរលើផ្លូវតែមួយ ដើម្បីទទួលបានសេវារបស់រដ្ឋាភិបាលដែលបានបង្ហាញឲ្យឃើញក្នុងអំឡុងការរីករាលដាលជំងឺកូវីដ១៩នេះ។
បើនិយាយពីវិស័យឯកជនក្នុងការទទួលបានទិសដៅបែបនោះត្រូវបានបំពេញបន្ថែមតាមរយៈការលេចឡើងនូវក្រុមហ៊ុនបង្កើត ថ្មីផ្នែកនវានុវត្តន៍ជាច្រើនដែលកំពុងផ្លាស់ប្តូរជីវិតប្រជាជនកម្ពុជា លើរបៀបដែលពួកគេធ្វើអាជីវកម្ម។ ហេដ្ឋារចនាសម្ព័ន្ធឌីជីថលនឹងជំរុញឲ្យមានតម្លាភាព និងសម្រួលដល់ការធ្វើអាជីវកម្មនៅកម្ពុជាដែលនឹងបន្តជំរុញកំណើន និងនវានុវត្តន៍សហគ្រាសធុនតូច និងមធ្យម ( SME) ផងដែរ។
តើសមាគមថ្មីរបស់លោកនឹងធ្វើអ្វីដើម្បីរួមចំណែកដល់ការអភិវឌ្ឍអាជីវកម្មបច្ចេកវិទ្យា ហិរញ្ញវត្ថុ និងឌីជីថលនៅកម្ពុជា?
CAFT មានក្រុមហ៊ុនបច្ចេកវិទ្យា ហិរញ្ញវត្ថុ និងថ្នាក់ដឹកនាំអាជីវកម្មឈានមុខជាច្រើននៅក្នុងប្រទេស ដើម្បីបម្រើ និងជួយសហគមន៍បច្ចេកវិទ្យាហិរញ្ញវត្ថុឲ្យកាន់តែរីកចម្រើនដល់កម្រិតខ្ពស់បំផុតមួយ។ យើងគឺជាសមាគមមួយដែលផ្ដល់តម្លៃដល់គំនិតនវានុវត្តន៍ និងគាំទ្រក្រុមហ៊ុនបង្កើតថ្មីដែលមានសក្ដានុពល និងមានឥទ្ធិពលលើការវិវត្តន៍ឌីជីថលនៅក្នុងប្រទេសកម្ពុជា។ ជាចុងក្រោយ និងសំខាន់ជាងនេះទៅទៀតគឺយើងមានសំឡេងតែមួយដើម្បីតស៊ូមតិជាមួយក្រុមនិយតករ និងត្រៀមខ្លួនក្នុងការជួយអភិវឌ្ឍន៍វិស័យឌីជីថលហិរញ្ញវត្ថុនេះនៅកម្ពុជាក្នុងការធ្វើឲ្យរីកចម្រើន សេដ្ឋកិច្ចឌីជីថលរបស់ខ្លួន៕LA
