.jpg)
នាយករដ្ឋមន្ត្រី ហ៊ុន សែន ថ្លែងក្នុងវេទិកា WEF ម្សិលមិញ។ ហ្វេសប៊ុក
ហាណូយៈ ខណៈបច្ចុប្បន្នកម្ពុជាពឹងផ្អែកលើឧស្សាហកម្មប្រើប្រាស់កម្លាំងពលកម្មច្រើន លោកនាយករដ្ឋមន្ដ្រី ហ៊ុន សែន បានប្រកាសថា ប្រទេសនេះមានសក្ដានុពលខ្ពស់ក្នុងតំបន់សម្រាប់ការអភិវឌ្ឍឧស្សាហកម្មទី៤។
ក្នុងសុន្ទរកថាដែលថ្លែងក្នុងវេទិកាសេដ្ឋកិច្ចពិភពលោក (WEF) លើកទី ២៧ ស្ដីពីអាស៊ាននៅទីក្រុង ហាណូយ ប្រទេស វៀតណាម លើប្រធានបទសហគ្រិនភាព និងបដិវត្តន៍ឧស្សាហកម្មទី ៤ សម្រាប់អាស៊ាន លោកនាយករដ្ឋមន្ដ្រីឲ្យដឹងថាកម្ពុជាកំពុងលើកកម្ពស់ការអភិវឌ្ឍសហគ្រិនភាព និងសហគ្រាសធុនតូច និងមធ្យម ដោយមានគោលបំណងក្នុងការបង្កើតការងារដែលជាប់ពាក់ព័ន្ធ។
លោកថ្លែងថា៖ «កម្ពុជាគឺជាប្រទេសមានសក្ដានុពលខ្ពស់ ក្នុងការចាប់យកឱកាសកំណើនពីបដិវត្តន៍ឧស្សាហកម្មទី៤នេះ»។
លោកបន្ថែមថា ការតម្រង់ទិសដៅជាថ្មីសម្រាប់ការអភិវឌ្ឍនៅក្នុងតំបន់នេះ នឹងត្រូវផ្ដោតលើកម្មវិធីលើកកម្ពស់សមត្ថភាពតាមរយៈកម្មវិធីឌីជីថល។
លោកលើកឡើងថា៖ «ការត្រៀមខ្លួនទទួលយកនូវសេដ្ឋកិច្ចឌីជីថល និងការឆ្លើយតបនឹងបដិវត្តន៍ឧស្សាហកម្មទី ៤ បានក្លាយជាទិសដៅរបស់រដ្ឋាភិបាលនៅក្នុងអាណត្តិនេះ។ យើងនឹងផ្ដោតលើការពង្រឹង និងការពង្រីកមូលដ្ឋានសេដ្ឋកិច្ចឌីជីថល ទាំងធនធានមនុស្ស និងជំនាញស្របជាមួយនឹងបរិបទថ្មីនេះ»។
អ្នកជំនាញបានឲ្យដឹងកាលពីសប្ដាហ៍មុននៅក្នុងសិក្ខាសាលាស្ដីពីឧស្សាហកម្មទី៤នៅក្នុងប្រទេសកម្ពុជាថា កម្ពុជា ត្រូវរៀបចំខ្លួនដើម្បីទទួលយកបដិវត្តន៍ឧស្សាហកម្មជំនាន់ក្រោយដើម្បីជំនួសវិស័យរោងចក្រ។
លោក ង៉ែត ជូ អ្នកប្រឹក្សាជាន់ខ្ពស់នៃក្រុមហ៊ុន Emerging Markets Consulting (EMC) បានយល់ស្របថា កម្ពុជាមានសក្ដានុពលសម្រាប់បដិវត្តន៍ឧស្សាហកម្មទី៤នេះ។
ប៉ុន្តែលោកលើកឡើងថា ដើម្បីឈានទៅដល់បដិវត្តន៍នេះ រដ្ឋាភិបាលត្រូវតែត្រៀមខ្លួនឲ្យហើយ ដើម្បីគ្រប់គ្រងផលវិបាកទាក់ទងនឹងជំនាញ និងកម្លាំងពលកម្ម។
លោកថ្លែងថា៖«វាជាយន្តការនៃការប្រើប្រាស់បច្ចេកវិទ្យា ជំនួសកម្លាំងពលកម្ម ដើម្បីកាត់បន្ថយការចំណាយលើការផលិត ប៉ុន្តែយើងត្រូវតែពិនិត្យថា តើសមត្ថភាពធនធានមនុស្សរបស់យើងដូចម្ដេច?»។
លោកបានបន្តថា៖ «ដើម្បីទាក់ទាញវិនិយោគិនឲ្យមកវិនិយោគលើប្រព័ន្ធបច្ចេកវិទ្យារដ្ឋាភិបាលត្រូវមានគោលនយោបាយរឹងមាំដើម្បីធ្វើឲ្យមានតុល្យភាព ដល់ជំនាញសមត្ថភាពគេចផុតពីភាពគ្មានការងារធ្វើ»។ ខណៈឧស្សាហកម្មទី ៤ ឬបដិវត្តន៍ឧស្សាហកម្មទី ៤ បើកចំហឱកាសសម្រាប់បណ្ដាប្រទេសមួយចំនួនវាក៏ផ្ដល់បញ្ហាប្រឈមដល់ប្រទេសខ្លះផងដែរដូចជាកម្ពុជា ខណៈប្រជាជននៅតែពឹងផ្អែកខ្លាំងលើកសិកម្ម សម្រាប់ជីវភាពរស់នៅរបស់ពួកគេ។
ការសិក្សាមួយដោយក្រសួងកសិកម្មកាលពីខែមិថុនា ឆ្នាំ ២០១៧ បានរកឃើញថា ប្រជាជនប្រហែលជា ៤០ ភាគរយ ធ្វើការងារនៅក្នុងវិស័យកសិកម្ម។ នេះបើតាមសេចក្ដីរាយការណ៍របស់ Asean Post។
ស្ថិតិនេះចង្អុលបង្ហាញទៅនឹងសេណារីយោដែលប្រជាជនកម្ពុជាជាច្រើន អាចបាត់បង់ការងារនៅពេលខាងមុខ ដោយសារប្រទេសនេះចាប់ផ្ដើមដាក់បញ្ចូលស្វ័យប្រវត្តិកម្ម នៅក្នុងវិស័យកសិកម្មរបស់ខ្លួនឆ្ពោះទៅរកការទទួលយកបដិវត្តន៍ឧស្សាហកម្មទី៤។
លោកនាយករដ្ឋមន្ដ្រី ក៏បានទទួលស្គាល់ផងដែរថា ការផ្លាស់ប្តូរទៅរកបដិវត្តន៍ឧស្សាហកម្មទី ៤ នឹងបណ្ដាលឲ្យមានការបារម្ភ និងបង្កឲ្យបញ្ហាប្រឈមសម្រាប់ប្រទេសនេះ ដូចជាការបាត់បង់ការងារ ខណៈវាត្រូវការការអប់រំកម្រិតកាន់តែខ្ពស់ និងជំនាញបច្ចេកវិទ្យា៕LA
