The Phnom Penh Post Search

Search form




Logo of Phnom Penh Post newspaper Phnom Penh Post - លោក ហ៊ុន សែន គាំទ្រ​ការ​បង្កើត​ធនាគារ​អភិវឌ្ឍន៍​ថ្មី​របស់ BRICS

លោក ហ៊ុន សែន គាំទ្រ​ការ​បង្កើត​ធនាគារ​អភិវឌ្ឍន៍​ថ្មី​របស់ BRICS

លោក ហ៊ុន សែន គាំទ្រ​ការ​បង្កើត​ធនាគារ​អភិវឌ្ឍន៍​ថ្មី​របស់ BRICS

ភ្នំពេញៈ លោក​នាយ​ករដ្ឋ​មន្ដ្រី​ហ៊ុន សែន​ កាល​ពី​ថ្ងៃ​ចន្ទ​បង្ហាញ​ការ​គាំទ្រ​ជាមួយ​នឹង​ការ​បង្កើត​ធនាគារ​អភិវឌ្ឍន៍​ថ្មី (NDB) ដែល​បង្កើត​ឡើង​ដោយ​ប្រទេស​ ប្រេស៊ីល រុស្ស៊ី ​ឥណ្ឌា ​ចិន ​និង​ប្រទេស​អាហ្វ្រិក​ខាង​ត្បូង​ ឬ​ហៅ​កាត់​ថា ​BRICS។

ប្រទេស​ទាំង​នេះ​បាន​ឯកភាព​គ្នា​បង្កើត​ធនាគារ​ថ្មី​នេះ​ឡើង​ក្នុង​ជំនួប​កំពូល​ BRICS​ លើក​ទី​ ៦​នៅ​ប្រទេស​ ប្រេស៊ីល ​​កាល​ពី​ថ្ងៃ​ទី​១៥ ​កក្កដា។

ធនាគារ​ថ្មី​នេះ​នឹង​ជួយ​កាត់​បន្ថយ​ការ​ពឹង​ផ្អែក​របស់​ប្រទេស​ក្រីក្រ ​និង​ប្រទេស​ដែល​មាន​ការ​អភិវឌ្ឍ​តិច​តួច​ទៅ​លើ​ធនាគារ​ពិភព​លោក​ និង​មូល​និធិ​រូបិយវត្ថុ​អន្តរ​ជាតិ​(IMF) ដែល​មាន​មូលដ្ឋាន​នៅ​វ៉ាស៊ីនតោន សហរដ្ឋ​អាមេរិក។

ធនាគារ ​NDB​ នេះ​នឹង​មាន​ដើម​ទុន​ ៥០ ពាន់​លាន​ដុល្លារ​អាមេរិក​ជាមួយ​ការ​រួម​វិភាគ​ទាន​របស់​ប្រទេស​នីមួយៗ​ចំនួន ១០ ពាន់​លាន​ដុល្លារ​ ខណៈ​ទុន​បម្រុង​នឹង​មាន​ចំនួន ១០០ ពាន់​លាន​ដុល្លារ។ ​យោង​តាម​ទី​ភ្នាក់ងារ​ព័ត៌មាន AFP ក្នុង​ចំណោម​មូល​និធិ​នេះ​ ប្រទេស​ចិន​នឹង​ធ្វើ​វិភាគ​ទាន​ធំ​ជាង​គេ​ចំនួន ៤១ ពាន់​លាន​ដុល្លារ បន្ទាប់​មក​ចំនួន ១៨ ពាន់​លាន​ដុល្លារ​បាន​មក​ពី​ប្រទេស​ ប្រេស៊ីល ឥណ្ឌា​ រុស្ស៊ី​​ ហើយ​ទឹក​ប្រាក់ ៥ ពាន់​លាន​ដុល្លារ​អាមេរិក​បាន​មក​ពី​​ប្រទេស​អាហ្វ្រិក​ខាង​ត្បូង។

លោក ហ៊ុន សែន កាល​ពី​ថ្ងៃ​ចន្ទ​ក្នុង​ពិធី​ចែក​សញ្ញា​បត្រ​ដល់​និស្សិត​នៅ​ទី​ក្រុង​ភ្នំពេញ​ថា ធនាគារ​នេះ​នឹង​ជួយ​ប្រទេស​ក្រីក្រ​ ឬ​ប្រទេស​មាន​ការ​អភិវឌ្ឍ​តិច​តួច​​ដូច​ជា​ប្រទេស​កម្ពុជា​មិន​ឲ្យ​ពឹង​ផ្អែក​ច្រើន​​លើ​គ្រឹះ​ស្ថាន​​ហិរញ្ញ​វត្ថុ​បរទេស​ដូចជា​ធនាគារ​ពិភព​លោក និង IMF។ ​

លោក​ថ្លែង​ថា​៖ «ក្នុង​នាម​យើង​ជា​​ប្រទេស​កំពុង​អភិវឌ្ឍន៍​ យើង​ស្វាគមន៍​​ដល់​ការ​បង្កើត​ធនាគារ BRICS​ នេះ​»។

លោក​បន្ត​ថា៖​ «​ការ​បង្កើត​ធនាគារ​នេះ​នឹង​កាត់​បន្ថយ​ភាព​ផ្ដាច់​មុខ​របស់​ស្ថាប័ន​មួយ​ចំនួន ហើយ​វា​​នឹង​បង្កើន​ល្បឿន​អភិវឌ្ឍន៍​​ប្រទេស​ក្រីក្រ​បាន​យ៉ាង​រហ័ស​ វា​គឺជា​ស្ថាន​ភាព​មួយ​ដ៏​ល្អ​ ហើយ​យើង​ត្រូវ​ការ​វា​ដោយ​សារ​តែ​យើង​គឺ​ជា​​ប្រទេស​តូច»។

លោកបញ្ជាក់​ថា៖«ធនាគារ BRICS​ ដែល​ជា​ធនា​គារ​ដ៏ធំ ​មិន​ជំនួស​តួ​នាទី​ទាំងស្រុងរ​បស់​ធនាគារ​ពិភព​លោក និង ​IMF ​នោះ​ទេ​ ប៉ុន្តែ​វា​បន្ថែម​កម្លាំង​ផ្សេង​ទៀត​​ដើ​ម្បី​ជួយ​ដល់​បណ្ដា​ប្រទេស​ក្រីក្រ​ដែល​កាត់​បន្ថយ​ការ​ពឹង​ផ្អែក​លើ​តែ​មួយ​កន្លែង»។

តាម​ទីភ្នាក់​ងារ​ព័ត៌​មាន ​AFP ​លោកស្រី Christine ​Lagarde ​ប្រធាន IMF បាន​ថ្លែង​ថា​ បុគ្គលិក​របស់​លោក​ស្រី​នឹង​មាន​ការ ​«សប្បាយ​រីករាយ» ក្នុង​ការ​សហការ​ជាមួយ​ក្រុម​ការងារ​របស់​ធនាគារ BRICS ស្ដីពី​មូលនិធិ​​បម្រុង​។

ការិ​យាល័យ​កណ្ដា​ល​របស់​ NDB ​នឹង​​មាន​ទីតាំង​នៅ​ក្នុង​ទី​ក្រុង​ស៊ាងហៃ​ ប្រទេស​ចិន ​ជា​មួយ​នឹង​ការិយាល័យ​ប្រចាំ​តំបន់​នៅ​ទី​ក្រុង ​Johannesburg ​​ប្រទេស​អាហ្វ្រិក​ខាង​ត្បូង​។​ សមាជិក​ភាព​​នៅ​ក្នុង​ធនាគារ​នេះ​នឹង​​បើក​​សម្រាប់​សមាជិក​របស់​អង្គការ​សហប្រជាជាតិ​ទាំង​អស់។ ​គ្រឹះ​ស្ថាន​ហិរញ្ញវត្ថុ​ថ្មី​មួយ​នេះ​​ត្រូវ​បាន​គេរំ​ពឹង​ថា ​នឹង​​ប្រតិ​​បត្តិ​ការ​នៅ​ដើម​ឆ្នាំ​២០១៥៕PB

អត្ថបទគួរចាប់អារម្មណ៍