ភ្នំពេញៈ លោកនាយករដ្ឋមន្ដ្រី ហ៊ុន សែន កាលពីថ្ងៃអង្គារបានជំរុញឲ្យក្រសួង អប់រំ យុវជន និងកីឡា បង្កើនល្បឿនដំណើរការនៃការបើកប្រាក់បៀវត្សរ៍គ្រូបង្រៀនតាមរយៈធនាគារនៅក្នុងឆ្នាំនេះ។ វិធានការនេះជាជំហានមួយដើម្បីប្រឆាំងនឹងការកាត់ប្រាក់ខែដែលមិនសមហេតុផល។
លោកនាយករដ្ឋមន្ដ្រីបានអំពាវនាវក្នុងអំឡុងពេលការចែកសញ្ញាបត្រនៅវិទ្យាស្ថានជាតិអប់រំកាលពីម្សិលមិញ ដោយលើកឡើងថា ការណ៍នេះនឹងជួយក្នុងការកាត់បន្ថយការលំបាកមួយចំនួននៅក្នុងការដឹកជញ្ជូនប្រាក់ទូទាំងប្រទេសនិងការកាត់ប្រាក់ខែក្រៅផ្លូវការ។
លោកបន្តថា៖ «នៅក្នុងវិស័យគ្រូបង្រៀនត្រូវតែទទួលបានប្រាក់ខែតាមរយៈធនាគារនៅឆ្នាំនេះ។ បើកលុយតាមធនាគារនៅពេលដែលលុយទៅដល់។ កុំឲ្យវាពិបាកដឹកជញ្ជូនលុយ ហើយនិងពិបាកកាត់កងថែមទៀត [ចំណាយក្រៅផ្លូវការ]»។
លោកបន្ថែមថា៖ «ប៉ុន្តែយើងចាំបាច់ត្រូវដំណើរការជាជំហានៗ តាមរយៈការកែទម្រង់រដ្ឋាភិបាល»។
លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យបានយល់ស្របនឹងគំនិតផ្ដួចផ្ដើមនេះ៖ «សមាគមរបស់ខ្ញុំបានស្នើទៅរដ្ឋាភិបាលតាំងពីឆ្នាំ ២០១២។ ពេលនេះ បើពួកគេអាចធ្វើដូចនោះបាន យើងពិតជាមានការកោតសរសើរ»។
លោកបន្តថា៖ «ប៉ុន្តែរដ្ឋាភិបាលត្រូវតែធានាឲ្យប្រាកដថា នៅពេលណាទើបប្រាក់លែងបើកយឺត។ ខ្ញុំស្នើឲ្យរដ្ឋាភិបាលចុះហត្ថលេខាលើកិច្ចសន្យាជាមួយធនាគារ ទោះបីជារដ្ឋាភិបាលមិនបានដាក់ប្រាក់នៅក្នុងធនាគារក៏ដោយ ក៏ពួកគេគួរតែអនុញ្ញាតឲ្យធនាគារបើកប្រាក់ខែឲ្យគ្រូបង្រៀនជាមុន នេះនឹងជាការជួយបានដ៏ធំ និងជាជំហានមួយក្នុងការលើកទឹកចិត្តនិងពង្រឹងវិស័យអប់រំ»។
លោកបានលើកឡើងថា កន្លងមកក្រសួង សង្គមកិច្ច អតីតយុទ្ធជន និងយុវនីតិសម្បទាបានធ្វើរួចហើយចំពោះនិវត្តជន ប៉ុន្តែការបើកនៅតែមានភាពយឺតយ៉ាវនៅឡើយ។
លោក ហ៊ុន សែន កាលពីម្សិលមិញក៏បានធ្វើការជំរុញឲ្យក្រសួង សេដ្ឋកិច្ច និងហិរញ្ញវត្ថុ និងរតនាគារជាតិពន្លឿនការបើកប្រាក់ខែដល់មន្ដ្រីរាជការឲ្យទាន់ពេលនៅក្នុងខែ។
លោក ហង់ ជួនណារ៉ុន រដ្ឋមន្ដ្រីក្រសួង អប់រំ យុវជន និងកីឡា បានប្រាប់ ភ្នំពេញ ប៉ុស្ដិ៍ កាលពីថ្ងៃអង្គារថា ក្រសួងបានអនុវត្តរួចហើយនៅទីក្រុង ភ្នំពេញ និងខេត្ត កណ្ដាល ហើយខ្លួននឹងពង្រីកបន្ថែមទៀតក្នុងពេលឆាប់ៗនេះ។
លោកលើកឡើងថា៖ «យើងបានចាប់ផ្ដើមសេវាទូទាំងប្រទេសនៅខែនេះ។ ដូច្នេះប្រាក់ខែមន្ដ្រីរបស់យើងនឹងលែងមានការយឺតយ៉ាវទៀតហើយ។ ពួកគេនឹងទទួលបានប្រាក់ខែរបស់ខ្លួននៅក្នុងខែតែម្តង»។
លោកបន្ថែមថា៖ «ខ្ញុំមានជំនឿយ៉ាងខ្លាំងថា បញ្ហានេះនឹងជាការលើកទឹកចិត្តមួយក្នុងការពង្រឹងប្រសិទ្ធភាពការងាររបស់មន្រ្តីរបស់ខ្ញុំ»។ លោកបញ្ជាក់ថា បច្ចុប្បន្នក្រសួង អប់រំ យុវជននិង កីឡា មានបុគ្គលិកប្រហែល ១១២ ០០០ នាក់។
លោក រ៉ុង ឈុន និយាយថា ជាធម្មតាប្រាក់ខែរបស់គ្រូបង្រៀនតែងតែកាត់យកដោយគ្មានមូលហេតុ។ លោកបន្តថា៖ «វិធានការនេះនឹងចៀសវាងការធ្វើរបៀបនេះបាន»។
លោក ហង់ ជួនណារ៉ុន បញ្ជាក់ថា មិនមានការកាត់ប្រាក់ខែពីមន្ដ្រី និងគ្រូបង្រៀនរបស់លោកទេ។
ក្រសួង សេដ្ឋកិច្ច និងហិរញ្ញវត្ថុ បានចុះអនុស្សរណៈស្តីពីការព្រមព្រៀងផ្តល់សេវានេះ កាលពីដើមខែ ធ្នូ ឆ្នាំមុន និងប្រតិបត្តិករបីរួមមានធនាគារ អេស៊ីលីដា ធនាគារ កាណាឌីយ៉ា និងក្រុមហ៊ុនសេវាកម្មផ្ទេរប្រាក់ វីង។ ក្នុងការផ្តល់សេវានេះដល់មន្រ្តីរាជការ ៤ សែននាក់នៅតាមក្រសួង មន្ទីរនានាទូទាំងប្រទេសនឹងអាចបើកប្រាក់បៀវត្សរ៍តាមរយៈប្រព័ន្ធធនាគារចាប់ពីខែ មករា ឆ្នាំ ២០១៤ តទៅ។
លោក អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា បានពន្យល់ពីដំណើរការសេវាកម្មនេះកាលពីមុនថា៖ «រតនាគារជាតិនឹងដាក់ប្រាក់នៅតាមធនាគារទាំងពីរនិងក្រុមហ៊ុនមួយហើយប្រតិបត្តិករមានតួនាទីក្នុងការបម្រើសេវាបើកប្រាក់បៀវត្សរ៍ដល់មន្ត្រីរាជការនៅទូទាំងប្រទេសទៅតាមដំណាក់កាល។ អនុស្សរណៈនេះជាការបើកទ្វារដល់ធនាគារអ្នកផ្តល់សេវា»។
លោកបានឲ្យដឹងថា មន្ត្រីរាជការអាចជ្រើសរើសប្រតិបត្តិករណាមួយក្នុងចំណោមប្រតិបត្តិករ ទាំងបីក្នុងការដកប្រាក់បៀវត្សរ៍របស់ពួកគាត់ជារៀងរាល់ខែ៕ PB
