ភ្នំពេញៈ លោកនាយករដ្ឋមន្ត្រី ហ៊ុន សែន ថ្លែងថា រដ្ឋសមាជិក និងដៃគូអភិវឌ្ឍន៍គួរតែពិចារណាឲ្យបានដិតដល់មុននឹងដាក់វិធានការព្យួរ ឬដកចេញនូវភាពអនុគ្រោះពីប្រទេសអភិវឌ្ឍន៍តិចតួច ដោយអះអាងថា ការបន្ត និងបង្កើនការផ្តល់ភាពអនុគ្រោះនានា តាមរយៈប្រព័ន្ធពាណិជ្ជកម្មពហុភាគី ឬឯកតោភាគីមានសារៈសំខាន់សម្រាប់ប្រទេសអភិវឌ្ឍន៍តិចតួចក្នុងការសម្រេចគោលដៅអភិវឌ្ឍន៍របស់ខ្លួន។
ថ្លែងនៅក្នុងពិធីបើកកិច្ចប្រជុំត្រួតពិនិត្យឡើងវិញជាសកលលើជំនួយសម្រាប់ពាណិជ្ជកម្មឆ្នាំ ២០១៩ របស់អង្គការពាណិជ្ជកម្មពិភពលោក (WTO) នៅក្នុងទីក្រុងហ្ស៊ឺណែវ ប្រទេស ស្វ៊ីស កាលពីម្សិលមិញ លោកនាយករដ្ឋមន្ត្រី ហ៊ុន សែន បានលើកឡើងថា បន្ទាប់ពីបានចូលជាសមាជិកអង្គការពាណិជ្ជកម្មពិភពលោកនៅក្នុងឆ្នាំ ២០០៤ កម្ពុជាសម្រេចបាននូវសមិទ្ធផលជាច្រើន ព្រមទាំងសម្រេចបាននូវកំណើនសេដ្ឋកិច្ចជាមធ្យមប្រចាំឆ្នាំក្នុងរង្វង់អត្រា ៧,៧ ភាគរយ ប្រកបដោយបរិយាប័ន្ន និងសមធម៌ នៅក្នុងរយៈពេល ២ ទសវត្សរ៍ចុងក្រោយនេះ។
លោកបន្តថា កម្ពុជាក៏បានប្រែក្លាយពីប្រទេសមានចំណូលទាប ទៅជាប្រទេសមានចំណូលមធ្យមកម្រិតទាបជាផ្លូវការក្នុងឆ្នាំ ២០១៥ និងក្លាយខ្លួនទៅជាប្រទេសដែលមានប្រាក់ចំណូលមធ្យមកម្រិតខ្ពស់នៅក្នុងឆ្នាំ ២០៣០ និងជាប្រទេសមានប្រាក់ចំណូលខ្ពស់ក្នុងឆ្នាំ ២០៥០។
លោក ហ៊ុន សែន ថ្លែងថា៖ «ដើម្បីអាចសម្រេចបាននូវចក្ខុវិស័យនេះ ការផ្តល់នូវភាពអនុគ្រោះពីរដ្ឋជាសមាជិក និងដៃគូអភិវឌ្ឍន៍ទាំងអស់គឺជារឿងសំខាន់ក្នុងការបន្ត និងបង្កើនការផ្តល់ភាពអនុគ្រោះនានា តាមរយៈប្រព័ន្ធពាណិជ្ជកម្មពហុភាគី ឬឯកតោភាគី»។
លោកបន្ថែមថា៖ «ហើយសូមធ្វើការពិចារណាឲ្យបានដិតដល់មុននឹងដាក់វិធានការព្យួរ ឬដកចេញនូវភាពអនុគ្រោះពីប្រទេសអភិវឌ្ឍន៍តិចតួច ព្រោះការព្យួរ ឬការដកនេះ នឹងធ្វើឲ្យប្រទេសទាំងនោះ មិនអាចជួយពិភពលោក ឲ្យសម្រេចបាននូវគោលដៅអភិវឌ្ឍន៍ប្រកបដោយចីរភាព និងមិនអាចជួយពួកគេឲ្យចាកចេញពីឋានៈជាប្រទេសអភិវឌ្ឍន៍តិចតួចបានឡើយ»។
លោកបន្តថា ចលនានេះ គឺជាដំណើរផ្ទុយទាំងស្រុងទៅនឹងគោលការណ៍របស់អង្គការសហប្រជាជាតិ និងអង្គការពាណិជ្ជកម្មពិភពលោក។
ការលើកឡើងរបស់លោកនាយករដ្ឋមន្ត្រី នេះ គឺស្របពេលដែលកម្ពុជាកំពុងប្រឈមទៅនឹងការដកហូតប្រព័ន្ធអនុគ្រោះពន្ធ «អ្វីគ្រប់យ៉ាងលើកលែងអាវុធ EBA» ពីសហភាពអឺរ៉ុប។
កាលពីខែមករា ឆ្នាំ ២០១៩ សហភាពអឺរ៉ុបបានសម្រេចយកពន្ធលើការនាំចូលអង្កររបស់កម្ពុជា ដោយអះអាងថា បានធ្វើឲ្យខូចខាតទីផ្សារនៃរដ្ឋសមាជិករបស់ខ្លួន បន្ទាប់ពីមានបណ្តឹងពីប្រទេស អ៊ីតាលី និងអេស្ប៉ាញ។
លោក ច័ន្ទ សុផល នាយកមជ្ឈមណ្ឌលសិក្សាគោលនយោបាយ បាននិយាយថា ប្រព័ន្ធអនុគ្រោះ ពិតជាមានសារៈសំខាន់ណាស់សម្រាប់ប្រទេសកំពុងអភិវឌ្ឍន៍ ដើម្បីនាំចេញទំនិញទៅកាន់ទីផ្សារប្រទេសធំៗ និងមានសេដ្ឋកិច្ចរីកចម្រើន។ ទោះយ៉ាងណាលោកបញ្ជាក់ថា៖ «សារៈសំខាន់ប៉ុនណានោះ គឺវាអាស្រ័យទៅតាមប្រទេសនីមួយៗប៉ុណ្ណោះ»។
លោកនាយករដ្ឋមន្ត្រី ហ៊ុន សែន ក៏បានស្នើឲ្យរដ្ឋជាសមាជិក និងដៃគូអភិវឌ្ឍន៍ទាំងអស់ពិចារណាផ្តល់ការឧបត្ថម្ភគាំទ្របន្ថែមទៀតដូចជា ការពង្រឹងភាពប្រកួតប្រជែងរបស់ប្រទេសអភិវឌ្ឍន៍តិចតួច និងជួយគាំទ្រដល់កម្មវិធី និងដំណើរការការចាកចេញពីប្រទេសអភិវឌ្ឍន៍តិចតួចផងដែរ ក្នុងការកសាងសមត្ថភាពដើម្បីទាញយកប្រយោជន៍ពីប្រភពកំណើនថ្មី ជាពិសេសផ្នែកសេវាកម្ម និងការទទួលយកបដិវត្តន៍ឧស្សាហកម្មទី៤ និងដើម្បីទាញយកប្រយោជន៍ពីសេដ្ឋកិច្ច Digital៕LA