ភ្នំពេញៈ លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាជាតិភ័ស្តុភារកម្មបានស្នើឲ្យស្ថាប័នពាក់ព័ន្ធនានាជួយសម្រួលដល់ក្រុមហ៊ុនរបស់សិង្ហបុរី YCH ដើម្បីអនុញ្ញាតឲ្យក្រុមហ៊ុនមួយនេះពន្លឿនការសិក្សារបស់ខ្លួនទៅលើគម្រោងអភិវឌ្ឍន៍មជ្ឈមណ្ឌលភ័ស្តុភារកម្មភ្នំពេញ (Phnom Penh Logistics Centre-PPLC) សម្រេចទៅតាមផែនការ។
ការលើកឡើងនេះបានធ្វើឡើងនៅក្នុងកិច្ចប្រជុំក្រុមប្រឹក្សាជាតិភ័ស្តុភារកម្មលើកទី ២ នៅទីស្តីការក្រសួងសេដ្ឋកិច្ច និងហិរញ្ញវត្ថុកាលពីថ្ងៃពុធសប្តាហ៍មុន ដោយលោក អូន ព័ន្ធមុនីរ័ត្ន បានណែនាំឲ្យស្ថាប័នទទួលបន្ទុកការងារនេះត្រូវសិក្សាពីតម្រូវការចាំបាច់របស់ក្រុមហ៊ុន YCH ថា តើក្រុមហ៊ុននេះមានតម្រូវការអ្វីខ្លះដើម្បីអភិវឌ្ឍមជ្ឈមណ្ឌលនេះ ហើយរាជរដ្ឋាភិបាលមានលទ្ធភាពដោះស្រាយបានប៉ុនណា ដើម្បីជួយជំរុញឲ្យគម្រោងនេះកាន់តែមានវឌ្ឍនភាពឆ្ពោះទៅមុខ។
លោកថ្លែងថា៖ «ការជ្រើសរើសគំរូអាជីវកម្មបែបណានោះនឹងធ្វើឡើងបន្ទាប់ពីការសិក្សាពីសមិទ្ធិលទ្ធភាព (Feasibility Study) ព្រោះលទ្ធផលការសិក្សានេះគឺជាគន្លឹះ និងជាទឡ្ហីករណ៍ដ៏សំខាន់ក្នុងការជ្រើសរើសប្រភេទគំរូអាជីវកម្មនៃគម្រោងនេះ»។
បើយោងតាមលោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន កិច្ចព្រមព្រៀងក្របខ័ណ្ឌរវាងក្រសួងសាធារណការ និងដឹកជញ្ជូនជាមួយនឹងក្រុមហ៊ុន YCH ក្នុងការអភិវឌ្ឍមជ្ឈមណ្ឌលភ័ស្តុភារកម្មភ្នំពេញ ត្រូវបានរៀបចំជាសេចក្ដីព្រាងរួចហើយ ដែលនឹងត្រូវកែសម្រួលឡើងវិញ បន្ទាប់ពីទទួលបានធាតុចូលបន្ថែមទៀតពីអង្គប្រជុំ ដើម្បីធ្វើយ៉ាងណាឲ្យកិច្ចព្រមព្រៀងមួយនេះមានខ្លឹមសារ និងវិសាលភាពឆ្លើយតបទៅនឹងកម្មវត្ថុនៃកិច្ចព្រមព្រៀងព្រមទាំងផ្ដល់ប្រយោជន៍ដល់ប្រទេសកម្ពុជា។
សម្រាប់ទីតាំងរបស់គម្រោងអភិវឌ្ឍន៍មជ្ឈមណ្ឌលភ័ស្តុភារកម្មភ្នំពេញនេះគឺស្ថិតនៅចំតំបន់យុទ្ធសាស្ដ្រ ដោយនៅចន្លោះកំពង់ផែស្វយ័តក្រុងព្រះសីហនុ និងខ្សែរថភ្លើងពីប៉ោយប៉ែត។ លើសពីនោះទៅទៀតវាស្ថិតនៅជិតផ្លូវជាតិលេខ ៣ និងលេខ ៤ ព្រមទាំងតំបន់សេដ្ឋកិច្ចពិសេសភ្នំពេញផងដែរ។
ភាពទន់ខ្សោយនៃហេដ្ឋារចនាសម្ព័ន្ធភ័ស្ដុភារ គឺជាឧបសគ្គមួយដែលរារាំងដល់ការធ្វើពាណិជ្ជកម្មនៅកម្ពុជា។ របាយការណ៍ធនាគារពិភពលោក WB ឆ្នាំ ២០១៤ បង្ហាញថា តម្លៃនាំចេញរបស់កម្ពុជាមានចំនួន ៣០ ភាគរយខ្ពស់ជាងបណ្ដាប្រទេសជិតខាង។
កាលពីឆ្នាំ ២០១៦ ទីភ្នាក់ងារកិច្ចសហប្រតិបត្តិការអន្តរជាតិជប៉ុនបានប៉ាន់ប្រមាណថា កម្ពុជាគិតកម្រៃពីក្រុមហ៊ុននាំចេញចំនួន ៥៤០ ដុល្លារក្នុងមួយ TEU បើធៀបនឹងប្រទេសថៃដែលមានត្រឹម ២០០ ដុល្លារ និងប្រទេសវៀតណាម ២៥០ ដុល្លារ៕ LA