ភ្នំពេញៈ ខណៈប្រទេសកម្ពុជារំពឹងថានឹងរក្សាកំណើនសេដ្ឋកិច្ចខ្ពស់ក្នុងអត្រា ៧ ភាគរយ វាបានផ្តល់នូវលក្ខខណ្ឌអំណោយផលសម្រាប់វិស័យធនាគារ និងហិរញ្ញវត្ថុក្នុងការទទួលបានកំណើនរឹងមាំផងដែរ។
ទិន្នន័យពីធនាគារជាតិនៃកម្ពុជាបានបង្ហាញថា ទ្រព្យសកម្មសរុបក្នុងវិស័យធនាគារ និងគ្រឹះស្ថានមីក្រូហិរញ្ញវត្ថុបានកើនឡើង ១៩,២ ភាគរយ ដល់ ៤៤,៨ ពាន់លានដុល្លារ គិតត្រឹមត្រីមាសទី ២ ឆ្នាំនេះ។
ឥណទានក្នុងវិស័យនេះបានកើនឡើង ២២,៤ ភាគរយ ដល់ ២៧,៧ ពាន់លានដុល្លារ គិតត្រឹមត្រីមាសទី ២ ឆ្នាំនេះ។ ប្រាក់កម្ចីសរុបសម្រាប់វិស័យធនាគារមានចំនួន ២១,៥ ពាន់លានដុល្លារ ខណៈប្រាក់កម្ចីនៅស្ថាប័នគ្រិះស្ថានមីក្រូហិរញ្ញវត្ថុមានចំនួន ៦,២ ពាន់លានដុល្លារ គិតត្រឹមត្រីមាសទី ២ ឆ្នាំនេះ។
លោក Shin Chang Moo ប្រធានធនាគារ PPCBank បានជួបពិភាក្សាជាមួយកាសែតភ្នំពេញប៉ុស្តិ៍អំពីដំណើរវិវឌ្ឍន៍ទៅនៃសេដ្ឋកិច្ច និងវិស័យធនាគារនៅឆ្នាំនេះ។
តើលោកមើលឃើញអំពីដំណើរវិវឌ្ឍន៍នៃសេដ្ឋកិច្ចរបស់កម្ពុជាយ៉ាងដូចម្តេចដែរសម្រាប់ឆ្នាំនេះ? ហើយវិស័យធនាគារវិញយ៉ាងដូចម្តេចដែរ?
រហូតមកដល់ពេលនេះក្នុងឆ្នាំ ២០១៩ ការសង្កេតរបស់យើងលើសេដ្ឋកិច្ចកម្ពុជានៅតែមានភាពវិជ្ជមានហើយការព្យាករកំណើនមានជាង ៧ ភាគរយ។ លំហូរទុនវិនិយោគពីក្រៅប្រទេស (FDI) មកសេដ្ឋកិច្ចកម្ពុជានៅតែរឹងមាំ។ លើសពីនេះទៀតកំណើន FDI ជាបណ្តើរៗពីកូរ៉េ និងជប៉ុនផ្តល់នូវទស្សនវិស័យវិជ្ជមានទៅលើកំណើនរយៈពេលវែង។ កំណើននៃការប្រើប្រាស់ក្នុងស្រុក និងការវិនិយោគពីវិស័យឯកជនក៏ជាកត្តាជំរុញកំណើនសេដ្ឋកិច្ចផងដែរ។
ជាទូទៅវិស័យធនាគារហាក់ដូចជាទទួលបានការរីកចម្រើនឥតឈប់ឈរ ទាំងប្រាក់កម្ចី និងប្រាក់បញ្ញើដោយសារកំណើនសេដ្ឋកិច្ចប្រកបដោយនិរន្តរភាព និងការកើនឡើងនៃក្រុមវណ្ណៈកណ្តាល។
យោងតាមការស្ទង់មតិនាពេលថ្មីៗនេះបានបង្ហាញថា ប្រជាជនក្នុងវណ្ណៈកណ្តាល (មានប្រាក់ចំណូលគ្រួសារជាង ៤០០ ដុល្លារក្នុង ១ ខែ) បានកើនឡើងដល់ចំណែក ៥៥ ភាគរយនៅឆ្នាំនេះពី ៣៥ ភាគរយកាលពីឆ្នាំ ២០១៦។ តម្រូវការហិរញ្ញប្បទានពីក្រុមវណ្ណៈកណ្តាលទាំងនោះរួមជាមួយក្រុមហ៊ុនសាជីវកម្មកំពុងតែទទួលបានភាពខ្លាំងទៅលើតម្រូវការលំនៅឋាន ទំនិញប្រើប្រាស់ប្រចាំថ្ងៃ និងតម្រូវការសម្រាប់ការវិនិយោគ។
ជាមួយគ្នានេះដែរធនាគារ PPCBank របស់យើងគឺរក្សាបាននូវកំណើនដ៏រឹងមាំចាប់តាំងពីឆ្នាំ ២០១៦ នៅពេលដែលម្ចាស់ភាគហ៊ុនថ្មីបានចូលមកកាន់កាប់ រហូតដល់ឆ្នាំ ២០១៩ នេះ។ ចំនួនឥណទានធនាគារសរុបត្រូវបានគេរំពឹងថា នឹងកើនឡើងជាង ២០ ភាគរយសម្រាប់ឆ្នាំនេះបើធៀបនឹងឆ្នាំមុន ប៉ុន្តែភាគច្រើនគឺកំណើនខ្លាំងជាងមុនដែលកំណើនភាគច្រើនទៅក្នុងសហគ្រាសធុនតូច និងមធ្យម។
បច្ចុប្បន្ននេះប្រទេសកម្ពុជាកំពុងប្រឈមនឹងសម្ពាធលើការដកការអនុគ្រោះពាណិជ្ជកម្មពីសហភាពអឺរ៉ុបដែលកំពុងគំរាមកំហែង តើបញ្ហានេះអាចជាការរំខាន ឬប៉ះពាល់ដល់សកម្មភាពប្រតិបត្តិការវិស័យធនាគារទាំងមូលទេ?
ដោយសារសហភាពអឺរ៉ុបគឺជាទីផ្សារនាំចេញធំបំផុតរបស់កម្ពុជា ដូច្នេះការដក EBA ប្រសិនបើវាកើតឡើង ពិតណាស់វានឹងផ្តល់ផលប៉ះពាល់ជាអវិជ្ជមានដល់សេដ្ឋកិច្ច។ លំហូរវិនិយោគយ៉ាងគំហុកពីប្រទេសចិនក៏អាចធ្វើឲ្យប៉ះពាល់ដល់កំណើនសេដ្ឋកិច្ចផងដែរ។ ទោះយ៉ាងណា ហានិភ័យទាំងនោះធ្លាប់កើតមានរួចហើយនៅក្នុងវិស័យធនាគារដែលទាំងវិស័យឯកជន និងសាធារណៈត្រូវរៀបចំខ្លួនបង្ការចំពោះហានិភ័យនោះ។
សម្រាប់ធនាគារ PPCBank ក៏បានរៀបចំផែនការផ្អែកលើសេណារីយ៉ូផ្សេងៗ និងប្រភពផ្តល់មូលនិធិ និងការបង្ការផ្សេង។ បើតាមការពិតទៅផលប៉ះពាល់នៃហានិភ័យទាំងនោះនឹងមិនកើតឡើងភ្លាមៗ និងដោយផ្ទាល់ចំពោះវិស័យធនាគារទេ ដែលអាចធ្វើឲ្យទាំងវិស័យឯកជន និងសាធារណៈចាត់វិធានការទប់ទល់ជាមុន។
ជាទស្សនៈវែងឆ្ងាយ និងជាមូលដ្ឋានរបស់យើងគឺយើងអាចចាត់ទុកថាវាជាឱកាសដ៏ល្អមួយក្នុងការកម្រិតសមត្ថភាពប្រកួតប្រជែងសកលរបស់ជាតិ។ យ៉ាងណាមិញការនាំចេញរបស់កម្ពុជាមិនអាចពឹងផ្អែកតែទៅលើ EBA ជារៀងរហូតនោះទេ ដោយសារវានឹងត្រូវដកវិញនាពេលអនាគត។
ដូចដែលខ្ញុំបានសង្កេតឃើញមួយរយៈកន្លងមកការជំរុញកែលម្អ និងអភិវឌ្ឍហេដ្ឋារចនាសម្ព័ន្ធរូបវន្តត្រូវបានផ្តួចផ្តើមឡើងដោយរដ្ឋាភិបាលដូចជា ផ្លូវថ្នល់ ផ្លូវដែក ការបង្កើនការផ្គត់ផ្គង់ថាមពលជាដើម។ល។
តើធនាគាររបស់អ្នក មានផែនការពង្រីកសម្រាប់ឆ្នាំក្រោយទេ? ហេតុអ្វីបានជាអ្នកសម្រេចចិត្តធ្វើដូច្នេះ ខណៈពេលភាពតានតឹងផ្នែកសេដ្ឋកិច្ចនៅតែមាន?
នៅពេលដែលទីផ្សារទាំងអស់ទាំងនៅរាជធានីភ្នំពេញ និងទីប្រជុំជនផ្សេងៗមានការរីកចម្រើនលឿន យើងនឹងបន្តបង្កើនបណ្តាញរបស់យើងទាំងផ្នែកឌីជីថល និងរូបវន្ត។ យើងបានបើកសាខាចំនួន ៣ នៅឆ្នាំនេះហើយគ្រោងនឹងបើកបន្ថែមទៀតនៅឆ្នាំក្រោយ។ នៅខែមីនាឆ្នាំ ២០១៩ យើងបានបើកសាខាមួយនៅខណ្ឌសែនសុខដែលជាតំបន់កំពុងរីកលូតលាស់យ៉ាងឆាប់រហ័ស ហើយនៅពេលយើងបើកសាខានៅទីនោះ យើងមានការភ្ញាក់ផ្អើលយ៉ាងខ្លាំងពីរបៀបដែលអតិថិជនរបស់យើងបានកើនឡើងយ៉ាងលឿននៅទីនោះ។
នៅថ្ងៃទី ២៣ ខែធ្នូនេះយើងបើកសាខានៅតាមផ្លូវម៉ៅសេទុងដែលសាខានេះមាន Gold Club ជាកន្លែងវីអាយភីសម្រាប់ផ្នែកធនាគារឯកជន និងមានការរិយាល័យសម្រាប់ភាសាចិនដែលនឹងបម្រើអតិថិជននិយាយភាសាចិនកុកងឺ។ ដូចនៅសាខា ៣ ផ្សេងទៀតដែរ សាខាម៉ៅសេទុងក៏នឹងមានហាងកាហ្វេនៅខាងក្នុងសាខាផងដែរ។
នៅថ្ងៃសុក្រទី ២៧ ខែធ្នូនេះ យើងនឹងបើកសាខានៅផ្សារហេងលី។ ចំណុចពិសេសនៃសាខានោះគឺជាមជ្ឈមណ្ឌលសហគ្រាសធុនតូច និងមធ្យមដំបូងគេរបស់យើង។ យើងកំពុងបើកមជ្ឈមណ្ឌលនេះជាមួយម្ចាស់សហគ្រាសធុនតូចនិងមធ្យម។
គោលដៅរបស់យើង គឺដើម្បីបង្កើតកន្លែងមួយដែលមានច្រកចេញចូលតែមួយដែលម្ចាស់សហគ្រាសធុនតូច និងមធ្យមមិនត្រឹមតែអាចបំពេញតម្រូវការហិរញ្ញវត្ថុរបស់ពួកគេប៉ុណ្ណោះទេ ប៉ុន្តែថែមទាំងទទួលបានការប្រឹក្សាយោបល់អំពីការយកពន្ធ ការចុះបញ្ជីពាណិជ្ជកម្ម និងសេវាផ្សេងៗផង។
សម្រាប់បណ្តាញឌីជីថល កម្មវិធីទូរស័ព្ទចល័ត និងសេវាកម្មធនាគារតាមអ៊ីនធឺណិតរបស់យើងក៏នឹងត្រូវបានធ្វើឲ្យកាន់តែប្រសើរឡើងផងដែរ ដែលនឹងផ្តល់នូវសេវាកម្មរហ័សទាន់ចិត្ត និងមានភាពចម្រុះបម្រើជូនដល់អតិថិជនរបស់យើងតាមរយៈប្រតិបត្តិការឌីជីថល និងនៅតាមសាខានានា៕