.jpg)
ទូកុងតឺន័រផ្លែស្វាយស្រស់កម្ពុជាដឹកទៅដល់ប្រទេសចិនកាលពីថ្ងៃព្រហស្បតិ៍។ សហការី
ភ្នំពេញៈ ដោយមានការគាំទ្រពីរដ្ឋាភិបាលចិនក្នុងការបើកទីផ្សារកាន់តែធំដល់ប្រទេសកម្ពុជា ផ្លែស្វាយស្រស់កម្ពុជាជាង ១០០ តោនត្រូវបានដឹកទៅដល់ទីផ្សារប្រទេសមហាអំណាចសេដ្ឋកិច្ចទី ១ ក្នុងតំបន់ជាលើកដំបូងកាលពីថ្ងៃទី ២០ ខែឧសភា។
ការសម្រេចបាននៃការឈានជើងចូលទៅផ្សារចិននេះធ្វើឡើង បន្ទាប់ពីស្វាយស្រស់ជាង ១០០ តោនត្រូវបានដឹកចេញដោយផ្ទាល់ពីកម្ពុជាកាលពីថ្ងៃទី ៧ ខែឧសភា។
អនុព័ន្ធពាណិជ្ជកម្មប្រចាំនៅទីក្រុងណាននីង លោក តាំង លីសេង បានឱ្យដឹងថា ពិធីទទួលផ្លែស្វាយស្រស់កម្ពុជាចូលមកដល់ប្រទេសចិនលើកដំបូងត្រូវបានរៀបចំដោយគណៈកម្មាធិការគ្រប់គ្រងកំពង់ផែតំបន់ពាណិជ្ជកម្មសេរី ទីក្រុង Qinzhou នៃតំបន់ស្វយ័តក្វាងស៊ី។
លោក លីសេង បន្ថែមថា កម្ពុជាបាននាំចេញផ្លែស្វាយស្រស់ (កែវរមៀត) ជាលើកដំបូងនៅថ្ងៃទី ៧ ខែឧសភា ឆ្នាំ ២០២១ ហើយបានមកដល់កំពង់ផែទីក្រុង Qinzhou នៃតំបន់ស្វយ័តក្វាងស៊ីនៅថ្ងៃទី ២០ ខែឧសភា ឆ្នាំ ២០២១។ លោកបានឱ្យដឹងទៀតថា ដើម្បីជំរុញទីផ្សារស្វាយស្រស់កម្ពុជានៅប្រទេសចិន គណៈកម្មាធិការគ្រប់គ្រងកំពង់ផែតំបន់ពាណិជ្ជកម្មសេរី ទីក្រុង Qinzhou បានរៀបចំកម្មពិធីទទួលផ្លែស្វាយកម្ពុជានៅថ្ងៃទី ២១ ខែឧសភា ឆ្នាំ ២០២១។ កម្ពុជាបាននាំចេញផ្លែស្វាយស្រស់ទៅកាន់ទីផ្សារចិនមានចំនួន ១៧០ តោន ស្មើនឹង ៨ កុងតឺន័រ។
កម្មវិធីទទួលផ្លែស្វាយស្រស់កម្ពុជាមានការចូលរួមពីថ្នាក់ដឹកនាំទីក្រុង Qinzhou លោកស្រីអគ្គកុងស៊ុលកម្ពុជាប្រចាំនៅទីក្រុងណាននីង ថ្នាក់ដឹកនាំគ្រប់គ្រងកំពង់ផែតំបន់ពាណិជ្ជកម្មសេរីទីក្រុង Qinzhou មន្ទីរការិយាល័យការបរទេស Beibu Gulf នៃតំបន់ស្វយ័តក្វាងស៊ី ព្រមទាំងថ្នាក់ដឹកនាំនៃនាយកដ្ឋានរដ្ឋបាលគយនៃទីក្រុងណាននីង គណៈកម្មការអភិវឌ្ឍន៍ និងកំណែទម្រង់ក្រុង ការិយាល័យពាណិជ្ជកម្ម និងថ្នាក់ដឹកនាំការិយាល័យជំរុញពាណិជ្ជកម្ម និងមន្ត្រីនៃក្រុមហ៊ុននានាសរុបជាង ១០០ រូប។
កាលពីថ្ងៃទី ២៦ ខែមេសា រដ្ឋបាលគយចិនបានអនុម័តទទួលស្គាល់ជាផ្លូវការនូវបញ្ជីឈ្មោះចម្ការស្វាយចំនួន ៣៧ និងរោងចក្រវេចខ្ចប់ចំនួន ៥ ដែលអាចនាំចេញផ្លែស្វាយស្រស់ទៅកាន់ប្រទេសចិន។
អ្នកនាំពាក្យក្រសួងការបរទេសចិនបានឱ្យដឹងក្នុងសន្និសីទព័ត៌មានកាលពីថ្ងៃទី ១៤ ខែឧសភាថា ប្រទេសចិនបានចាត់វិធានការពិសេស ដើម្បីជួយសម្រួលដល់ការនាំចូលស្វាយស្រស់ដែលមានគុណភាពពីប្រទេសកម្ពុជាទៅទីផ្សារចិន និងរំពឹងថាស្វាយស្រស់ចំនួន ១០០ ០០០ តោននឹងចូលទៅទីផ្សារចិនក្នុងឆ្នាំនេះ។
លោកស្រី Hua Chunying ថា តាមពិតនាយកដ្ឋានជាប់ពាក់ព័ន្ធបានជម្នះបញ្ហាជាច្រើនដែលបណ្ដាលមកពីជំងឺកូវីដ១៩ និងអាចឆ្លងកាត់កិច្ចសហប្រតិបត្តិការពាណិជ្ជកម្មប្រកបដោយប្រសិទ្ធភាព និងជាក់ស្ដែង ផ្នែកផលិតផលកសិកម្ម តាមរយៈមធ្យោបាយនវានុវត្តន៍នៃការត្រួតពិនិត្យដាច់ដោយឡែកតាមរយៈវីដេអូអនឡាញ។
លោកស្រីបញ្ជាក់ថា កិច្ចសហប្រតិបត្តិការនេះមិនគ្រាន់តែជួយសម្រេចបានតាមតម្រូវការរបស់អតិថិជនចិនប៉ុណ្ណោះទេ ប៉ុន្តែថែមទាំងជួយកសិករកម្ពុជាក្នុងការរកប្រាក់ចំណូលបន្ថែម និងជួយពួកគេជម្នះពេលវេលាដ៏ពិបាកដោយសារជំងឺកូវីដ ១៩។
លោកស្រីថ្លែងថា៖ «ព័ត៌មាននេះបានទទួលការយកចិត្តទុកដាក់ខ្លាំង និងស្វាគមន៍យ៉ាងកក់ក្ដៅពីប្រទេសកម្ពុជា។ កិច្ចសហប្រតិបត្តិការនេះគឺលើសពីស្វាយទៅទៀត។ វាបង្ហាញពីមិត្តភាពជាបងប្អូនរវាងប្រទេសយើងទាំង ២»។
លោកស្រីលើកឡើងថា៖ «ក្នុងនាមជាមិត្តដែកថែបរបស់កម្ពុជា ប្រទេសចិននឹងសហការជាមួយកម្ពុជា ដើម្បីធ្វើឱ្យកិច្ចសហប្រតិបត្តិការជាក់ស្ដែងកាន់តែស៊ីជម្រៅជាបន្តនៅក្នុងវិស័យនានា ដែលរួមទាំងផលិតកម្មកសិកម្ម ដើម្បីនាំយកអត្ថប្រយោជន៍ជាក់ស្ដែងដល់ប្រជាជនរបស់ប្រទេសទាំង ២»។
គិតត្រឹមឆ្នាំ ២០២០ កម្ពុជាមានផ្ទៃដីដាំដុះស្វាយ ១៣ ម៉ឺនហិកតា ក្នុងនោះ ៩១ ១០៤ ហិកតាកំពុងប្រមូលផល។ ទិន្នផលជាមធ្យម ១,៣៨ លានតោនក្នុង ១ រដូវ៕ LA
