.jpg)
លោក វិចទ័រ ហ្សូនា អគ្គនាយកអគ្គនាយកដ្ឋានថាមពលនៃក្រសួងរ៉ែ និងថាមពល ថ្លែងនាពេលកន្លងមក។ រូបថត ក្រសួងរ៉ែ និងថាមពល
ភ្នំពេញ: មន្ត្រីជាន់ខ្ពស់ខេត្តពោធិ៍សាត់បានប្រាប់ឲ្យដឹងថា គម្រោងអភិវឌ្ឍន៍ទំនប់វារីអគ្គិសនីស្ទឹងពោធិ៍សាត់ ១ ទំហំ ៨០ មេហ្គាវ៉ាត់ ដោយក្រុមហ៊ុនកូរ៉េខាងត្បូងដែលមានទឹកប្រាក់វិនិយោគជាង ២៣១ លានដុល្លារ កំពុងដំណើរការសាងសង់ដោយរលូន បើទោះបីជាការរីករាលដាលនៃជំងឺកូវីដ ១៩ នៅតែបន្តក៏ដោយ។
ក្រុមហ៊ុន SPHP (Cambodia)Co.,Ltd ដែលគ្រប់គ្រងដោយវិនិយោគិនខាងលើបានទទួលការយល់ព្រមពីរដ្ឋាភិបាលលើគម្រោងនៅទំនប់វារីអគ្គិសនីស្ទឹងពោធិ៍សាត់ ១ ដែលស្ថិតនៅក្នុងស្រុកវាលវែង ខេត្តពោធិ៍សាត់។
លោក ខូវ រីដា អភិបាលរងខេត្តពោធិ៍សាត់ប្រាប់ភ្នំពេញប៉ុស្តិ៍កាលពីថ្ងៃចន្ទថា ក្រុមហ៊ុនកំពុងពន្លឿនការកសាងហេដ្ឋារចនាសម្ព័ន្ធនានាចូលទៅកាន់ទីតាំងសាងសង់ទំនប់វារីអគ្គិសនីនេះ។
លោកបានថ្លែងថា៖ «ក្រុមហ៊ុនកំពុងត្រួសត្រាយផ្លូវ និងដោះមីនឆ្ពោះទៅកាន់ទីតាំងវារីអគ្គិសនីដែលវាមានចម្ងាយប្រហែល ២០ គីឡូម៉ែតពីផ្លូវជាតិ។ យើងកំពុងជំរុញក្រុមហ៊ុនឲ្យពន្លឿនការសាងសង់ផ្លូវ ដើម្បីអាចឲ្យគម្រោងសាងសង់ទៅតាមផែនការកំណត់»។
លោកបានឲ្យដឹងថា ក្រៅពីគម្រោងអភិវឌ្ឍន៍ទំនប់វារីអគ្គិសនី ក្រុមហ៊ុនក៏ចាប់អារម្មណ៍វិនិយោគតំបន់នេះទៅជារមណីយដ្ឋានទេសចរណ៍ធម្មជាតិនៅពេលអនាគតផងដែរ។
លោកបន្តថា៖ «បើតាមក្រុមហ៊ុនប្រហែលជាគាត់មិនត្រឹមតែវិនិយោគទៅលើថាមពលអគ្គិសនី ៨០ មេហ្គាវ៉ាត់នេះទេ ដោយក្រុមហ៊ុនប្រហែលអាចវិនិយោគទៅជាតំបន់ទេសចរណ៍ធម្មជាតិ ដើម្បីទាក់ទាញភ្ញៀវជាតិ និងអន្តរជាតិ»។
លោក វិចទ័រ ហ្សូនា អគ្គនាយកអគ្គនាយកដ្ឋានថាមពលនៃក្រសួងរ៉ែ និងថាមពលប្រាប់ភ្នំពេញប៉ុស្តិ៍ថា ក្រសួងបានផ្ដល់អាជ្ញាបណ្ណឲ្យក្រុមហ៊ុនសិក្សាលើលទ្ធភាពនៅទីតាំងនេះតាំងពីឆ្នាំ ២០១២។ លោកបន្តថា ក្រុមហ៊ុននេះបានចុះកិច្ចព្រមព្រៀងរួចហើយជាមួយអគ្គិសនីកម្ពុជា សម្រាប់ការលក់ថាមពលទាំងអស់ដែលខ្លួនផលិតបានដើម្បីភ្ជាប់ទៅបណ្តាញជាតិជាមួយនឹងតម្លៃ ០,៧ សេនដុល្លារក្នុង ១ គីឡូវ៉ាត់ម៉ោង។
លោកថ្លែងថា៖ «ក្រុមហ៊ុនកំពុងសាងសង់ហេដ្ឋារចនាសម្ព័ន្ធផ្លូវ និងដោះមីន ហើយគម្រោងនេះនឹងបញ្ចប់ត្រឹមឆ្នាំ ២០២៣»។
បើតាមលោក ហ្សូនា នេះជាគម្រោងទំនប់វារីអគ្គិសនីទី ២ ក្នុងខេត្តពោធិ៍សាត់ ខណៈបច្ចុប្បន្នទំបន់វារីអគ្គិសនីតាតៃដែលមានអានុភាព ១២០ មេហ្គាវ៉ាត់បានដំណើរការរួចហើយ។ ខេត្តនេះក៏បានទទួលគម្រោងថាមពលសូឡាចំនួន ២ ដែលមានសមត្ថភាពផលិត ៦០ មេហ្គាវ៉ាត់ក្នុងគម្រោងនីមួយៗ។
លោក កែវ រតនៈ អគ្គនាយកអគ្គិសនីកម្ពុជា (EDC) កាលពីពេលកន្លងមកបាននិយាយថា អគ្គិសនីកម្ពុជាកំពុងស្វែងរកថាមពលថ្មីបន្ថែមឲ្យបាន ១ ០០០ មេហ្គាវ៉ាត់ នៅមុនដំណាច់ឆ្នាំ ២០២០ ដែលទាញប្រភពថាមពលពីរោងចក្រអគ្គិសនី ដើរដោយថាមពលធ្យូងថ្ម ពន្លឺព្រះអាទិត្យ និងការទិញពីប្រភពដែលមានតម្លៃទាប៕ LA
