ភ្នំពេញៈ វិទ្យាស្ថានជាតិប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍ និង ព័ត៌មានវិទ្យា (NIPTIC) កាលពីថ្ងៃចន្ទបានចុះហត្ថលេខាលើអនុស្សរណៈនៃការយោគយល់គ្នា (MoU) ជាមួយក្រុមហ៊ុន Smart City Consortium (SCC) មានមូលដ្ឋានមាននៅទីក្រុងហុងកុង គោលបំណងលើកកម្ពស់ការបង្កើនសមត្ថភាពក្នុងវិស័យ ICT ដើម្បីគាំទ្រគំនិតផ្ដួចផ្ដើមរដ្ឋាភិបាលអេឡិចត្រូនិក។
MoU នេះត្រូវបានចុះហត្ថលេខាដោយលោក សេង សុភាព ប្រធាន NIPTICT និងលោក Jones Chan ប្រធានក្រុមហ៊ុន SCC។ តាមរយៈភាពជាដៃគូនេះក្រុមហ៊ុន Smart City Consortium (SCC) នឹងជួយចែករំលែកបទពិសោធ និងចំណេះដឹងរបស់ពួកគេនៅក្នុងវិស័យឌីជីថលដល់ដៃគូកម្ពុជា ខណៈ NIPTIC នឹងសហការគ្នាដើម្បីចែករំលែកឯកសារចាំបាច់ និងព្រាងគោលនយោបាយជាប់ទាក់ទងនៅក្នុងវិស័យឌីជីថលកម្ពុជា។
លោក Jones Chan បានថ្លែងកាលពីថ្ងៃចន្ទថា ដៃគូទាំង ២ នេះនឹងជួយគ្នាទៅវិញទៅមក ដើម្បីពង្រឹងការស្រាវជ្រាវ និងការអភិវឌ្ឍដើម្បីគាំទ្រដល់គំនិតផ្ដូចផ្ដើមរបស់រដ្ឋាភិបាលក្នុងការដំណើរការរដ្ឋាភិបាលអេឡិចត្រូនិក និងពង្រឹងសន្ដិសុខ ICT។
លោកបន្ថែមថា វាជាគោលបំណងក្នុងការលើកកម្ពស់សកម្មភាពអាជីវកម្មតាមរយៈរបៀបឌីជីថលផងដែរ។
លោកថ្លែងថា៖ «នៅពេលអនាគត យើងសង្ឃឹមថានឹងមានក្រុមហ៊ុនមកពីទីក្រុងហុងកុង និងក្រុមហ៊ុនកម្ពុជាដែលអាចរួមដៃគ្នាក្នុងការដំណើរការគម្រោងវិនិយោគដែលផ្ដល់អត្ថប្រយោជន៍ដល់ប្រជាជនកម្ពុជា»៕LA