The Phnom Penh Post Search

Search form

Logo of Phnom Penh Post newspaper Phnom Penh Post - វិធានការ​ចិន ​ក្នុង​សង្គ្រាម​ពាណិជ្ជកម្ម​ ជាមួយ​អាមេរិក

វិធានការ​ចិន ​ក្នុង​សង្គ្រាម​ពាណិជ្ជកម្ម​ ជាមួយ​អាមេរិក

Content image - Phnom Penh Post
អតិថិជន​ចិន​ក្នុង​ហាង​កាហ្វេ Starbucks របស់​អាមេរិក​មួយ​កន្លែង​នៅ​ទីក្រុង​ប៉េកាំង ប្រទេស​ចិន​។ រូបថត AFP

វិធានការ​ចិន ​ក្នុង​សង្គ្រាម​ពាណិជ្ជកម្ម​ ជាមួយ​អាមេរិក

ក្រុងប៉េកាំងៈ វិធានការ​ដំបូង​ត្រូវ​បាន​លើក​យក​មក​ប្រើ​នៅក្នុង​សង្គ្រាម​ពាណិជ្ជកម្ម​រវាង​ប្រទេស​ចិន​ និង​សហរដ្ឋអាមេរិក ដែល​ក្រុម​អ្នក​ជំនាញ​បាន​ឲ្យ​ដឹងថា អាច​នឹង​មាន​ការខូចខាត​ដល់​សេដ្ឋកិច្ច​ពិភពលោក​។

ប្រទេស​មហាអំណាច​ទាំង​ ២ ​នេះ​កាលពី​ថ្ងៃ​សុក្រ​សប្តាហ៍​មុន​បាន​ដកហូត​ពន្ធគយ​សងសឹក​គ្នា​ទៅវិញ​ទៅមក​លើ​ទំនិញ​នាំចូល​តម្លៃ​រាប់ពាន់​លាន​ដុល្លារ​។

ខណៈ​ប្រធានាធិបតី​អាមេរិក លោក ដូណាល់ ត្រាំ បាន​ច្រាន​ចោល​ការព្រមាន​ដែល​ថា ជម្លោះ​ពាណិជ្ជកម្ម​ជាមួយ​ដៃគូ​មហាអំណាច​ដូចជា​ប្រទេស​ចិន អាច​ធ្វើឲ្យ​ប៉ះពាល់​ដល់​អាមេរិក​នោះ​ប្រទេស​ចិន​មាន​វិធានការ​ផ្សេងៗ​ទៀត​នៅក្នុង​ប្រទេស​របស់​ខ្លួន​ក្រៅពី​ពន្ធគយ ដើម្បី​បង្ក​ការខូចខាត​ក្នុង​ការ​ប្រយុទ្ធ​គ្នា​មួយ​។

ដំណើរ​ឆ្ពោះ​ទៅ​រក​ការខាតបង់​

ភាពយន្ត​របស់​តារា​ហូលីវូដ Tom Cruise កាហ្វេ Starbucks និង​ទូរស័ព្ទ iPhone X និង​រថយន្ត Buick សុទ្ធតែ​ជា​ផលិតផល​ដែល​លក់ដាច់​បំផុត​នៅ​ចិន ហើយ​អាជ្ញាធរ​អាច​នឹង​ស្វែងរក​វិធីសាស្ត្រ​គ្រប់​ប្រភេទ​ដើម្បី​ធ្វើ​ឲ្យ​ផលិតផល​ទាំង​នេះ​ជួប​ការពិបាក​។ នេះ​បើ​តាម​លោក Louis Kuijs អ្នកវិភាគ​ប្រចាំ​ទ្វីប​អាស៊ី​របស់​ក្រុមហ៊ុន​វិភាគ Oxford Economics​។

លោក​ថ្លែង​ថា​ប្រទេស​ចិន «​មាន​វិធានការ​តិច​ជាង​បើ​គិត​លើ​ការដកហូត​ពន្ធ ប៉ុន្តែ​ប្រវត្តិសាស្ត្រ​បង្ហាញថា មាន​វិធានការ​ដទៃទៀត​ដែល​ចិន​អាច​ធ្វើ​បាន ដើម្បី​បង្ក​ការឈឺចាប់​ទៅ​លើ​ក្រុមហ៊ុន​អាមេរិក​»​។

ទន្ទឹម​នឹង​នេះ​ដែរ​លោក​ក៏​បាន​លើកឡើង​ពី «​ការត្រួតពិនិត្យ​ផ្នែក​សុខភាព សុវត្ថិភាព និង​ពន្ធគយ​ខ្លាំង​ជាង​មុន ដែល​ពន្យារពេល​ដល់​ការ​នាំចូល​ទំនិញ និង​ការធ្វើ​ពហិការ​ទំនិញ​អាមេរិក​»​។

មន្ត្រី​កំពង់ផែ​ចិន​ចាប់ផ្តើម​បង្កើន​ការធ្វើ​អធិការកិច្ច​ទៅ​លើ​សាច់ជ្រូក និង​រថយន្ត​របស់​អាមេរិក​រួច​ហើយ ដោយ​បង្ក​ឲ្យ​មាន​ការ​ពន្យារពេល​ធ្ងន់ធ្ងរ​។

ពហិការ​ប្រើ​រថយន្ត Buick

ក្រុមហ៊ុន General Motors បច្ចុប្បន្ន​លក់​រថយន្ត​ក្នុង​ប្រទេស​ចិន​បាន​ច្រើន​ជាង​នៅ​អាមេរិក ហើយ​ម៉ាក​រថយន្ត​អាមេរិក​ល្បីៗ​ផ្សេង​ទៀត​ឥឡូវ​នេះ​បាន​រក​ចំណូល​មួយ​ភាគ​ធំ​ពី​ទីផ្សារ​ចិន ដែល​កំពុង​រីកចម្រើន​លឿន​នេះ​។

ក្រុម​អ្នក​ជំនាញ​បាន​ឲ្យ​ដឹងថា ចិន​អាច​រឹតបន្តឹង​ក្រុមហ៊ុន​ទាំងនេះ​តាម​របៀប​ការិយាធិបតេយ្យ ឬ​ជំរុញ​ឲ្យ​មាន​ការ​ធ្វើ​ពហិការ​យ៉ាង​មាន​ប្រសិទ្ធភាព​ពី​អ្នក​ប្រើប្រាស់​ចិន​»​។

លោក Mark Williams ប្រធាន​សេដ្ឋវិទូ​ប្រចាំ​ទ្វីបអាស៊ី​នៃ​ក្រុមហ៊ុន Capital Economics បាន​ថ្លែង​ថា ទីក្រុង​ប៉េកាំង​អាច​រៀបចំ «​យុទ្ធនា​ការឃោសនា​ដែល​អាច​ឲ្យ​មន្ត្រី​រួច​ផុត​ពី​ការបង្ក​ឲ្យ​មាន​ការ​រាំងស្ទះ​ដល់​ការលក់​»​។

លោក Mark Williams បាន​ថ្លែង​បន្ត​ថា​៖ «​កាលពី​​អតីតកាល វិធីសាស្ត្រ​ទាំង​នេះ​បង្ហាញ​ថា​មាន​ប្រសិទ្ធភាព និង​លឿន​»​។ លោក​កត់សម្គាល់​អំពី​យុទ្ធនាការ​ស្រដៀង​គ្នា​ប្រឆាំង​ប្រទេស​កូរ៉េ​ខាង​ត្បូង និង​ជប៉ុន​កាលពី​ពេល​មាន​ភាព​តានតឹង​ផ្នែក​នយោបាយ «​ដែល​បាន​នាំ​ឲ្យ​មាន​ការ​ធ្លាក់ចុះ​ការលក់​រថយន្ត​ ៥០ ​ភាគរយ​របស់​ក្រុមហ៊ុន​របស់​ប្រទេស​ទាំង​ ២ ​នេះ​ក្នុង​រយៈពេល​តែ​ ១ ​ខែ​»​។

កាលពី​ឆ្នាំ​មុន​អ្នក​ប្រើប្រាស់​របស់​ចិន​បាន​នាំ​គ្នា​ប្រឆាំង​នឹង​ក្រុមហ៊ុន​លក់រាយ​របស់​កូរ៉េ​ខាង​ត្បូង Lotte ដែល​បាន​បង្ខំ​ឲ្យ​ក្រុមហ៊ុន​នេះ​បិទ​ហាង​របស់​ខ្លួន​ចំនួន​​ ៣ ​ភាគ​ ៤ ​នៃ​ហាង​ក្នុង​ប្រទេស​ចិន បន្ទាប់ពី​ក្រុមហ៊ុន​នេះ​បាន​ផ្តល់​ឲ្យ​រដ្ឋាភិបាល​ក្រុង​សេអ៊ូល​នូវ​ដី​មួយ​កន្លែង ដើម្បី​ដំឡើង​ខែល​ការពារ​មីស៊ីល​អាមេរិក​ដែល​ទីក្រុង​ប៉េកាំង​បាន​ជំទាស់​។

អប់រំ និង​ទេសចរណ៍

ចិន​អាច​ចាប់ផ្តើម​កំណត់​ចំនួន​ភ្ញៀវទេសចរ​ធំៗ​ដែល​ចំណាយ​ប្រាក់​ច្រើន និង​និស្សិត​របស់​ខ្លួន​ចំនួន​ ៣៥០ ពាន់​នាក់​ដែល​ទៅ​សហរដ្ឋអាមេរិក​ក្នុង​ ១ ​ឆ្នាំ ដែល​នឹង​មាន​ផលប៉ះពាល់​ខ្លាំង​ទៅ​លើ​ទីផ្សារ​អាមេរិក​។

លោក Mark Williams បាន​ថ្លែង​ថា​៖ «​ការចំណាយ​របស់​ចិន​ទៅ​លើ​ការធ្វើ​ដំណើរ និង​ការអប់រំ​នៅ​អាមេរិក​មាន​ទំហំ​ប្រហែល​គ្នា​នឹង​ការ​ចំណាយ​របស់​ចិន​លើ​ការទិញ​សណ្តែកសៀង និង​យន្តហោះ​អាមេរិក​ដែល​ទាំង​ ២ ​នេះ​គឺជា​ការទិញ​ទំនិញ​ធំ​បំផុត​»​។

អ្នក​ជំនាញ​រូប​នេះ​បាន​កត់សម្គាល់​ថា ចិន​កាលពី​ពេល​មុន​បាន​ដាក់​កម្រិត​ក្រុមហ៊ុន​ទេសចរណ៍​ឲ្យ​ដាក់​សម្ពាធ​លើ​កោះ​តៃវ៉ាន់ និង​កូរ៉េ​ខាង​ត្បូង​។

ទោះ​យ៉ាង​ណា​ក្តី​លោក​បាន​បន្ថែម​ថា​៖ «​ចិន​អាច​មាន​អារម្មណ៍​ថា សាកលវិទ្យាល័យ​អាមេរិក​មាន​ឥទ្ធិពល​ដែល​នៅ​មាន​កម្រិត​លើ​រដ្ឋបាល​លោក ត្រាំ ហើយ​ការកំណត់​ចំនួន​សិស្ស​អាច​ប៉ះពាល់​កិច្ច​ប្រឹងប្រែង​បង្កើន​សមត្ថភាព​ផ្នែក​បច្ចេកទេស និង​វិទ្យាសាស្ត្រ​របស់​ចិន​»​។

ឧបសគ្គ​ចំពោះ​ក្រុមហ៊ុន ផលិត​យន្តហោះ Boeing

ក្រុមហ៊ុន Boeing លក់​យន្តហោះ​ ១ ​ភាគ​ ៤ ​នៃ​យន្តហោះ​របស់​ខ្លួន​ក្នុង​ប្រទេស​ចិន​ដែល​ជា​ទីផ្សារ​ធំ​បំផុត​ទី​ ២ ​ក្នុង​ពិភពលោក ហើយ​ក្រុមហ៊ុន​យន្តហោះ​អាមេរិក​នេះ​ជា​គូប្រកួត​ប្រកៀក​ប្រកើយ​ជាមួយ​ក្រុមហ៊ុន​យន្តហោះ​អឺរ៉ុប Airbus​។

ការណ៍​នេះ​អាច​ជា​ចំណុច​ដាក់​សម្ពាធ​មួយ​ទៀត ដោយសារ​ក្រុមហ៊ុន​អាកាសចរណ៍​ចិន​ភាគច្រើន​បំផុត​ស្ថិត​នៅ​ក្រោម​ការគ្រប់គ្រង​របស់​រដ្ឋ ដែល​ការបញ្ជា​ទិញ​របស់​ក្រុមហ៊ុន​ទាំងនោះ​ត្រូវ​បាន​បង្គាប់​យ៉ាង​តឹងរ៉ឹង​ដោយ​ទីក្រុង​ប៉េកាំង​។

បើ​ទោះបី​ជា​ការបញ្ជាទិញ​ត្រូវ​បាន​រៀបចំ​ផែនការ​សម្រាប់​រយៈពេល ៥ ឆ្នាំ​ខាង​មុខ​ក្តី​ក៏​កាសែត Global Times របស់​រដ្ឋ​ចិន​បាន​លើក​ឡើង​ពី​ការព្រមាន​មួយ​រួចហើយ​ដោយ​បាន​រាយការណ៍​ថា ទីក្រុង​​ប៉េកាំង​អាច​នឹង «​កែសម្រួល​ទំហំ​លក់​»​។

ប័ណ្ណបំណុល និង​ការទម្លាក់​ថ្លៃ​រូបិយប័ណ្ណ

ដោយ​មាន​ប្រាក់​បម្រុង​ជា​រូបិយប័ណ្ណ​បរទេស​ដ៏ច្រើន​របស់​ខ្លួន ចិន​កាន់កាប់​ប័ណ្ណ​បំណុល​រតនាគារ​អាមេរិក​ក្នុង​តម្លៃ​ប្រមាណ ១,២ ពាន់​ពាន់​លាន​ដុល្លារ ហើយ​មាន​ការរាយការណ៍​ថា ក្រុមមន្ត្រី​បាន​ចាប់​ផ្តើម​ពន្យឺត និង​បញ្ឈប់ ការទិញ​របស់​ពួកគេ​។

បើ​ទោះ​ជា​មនុស្ស​មួយ​ចំនួន​មើល​ឃើញ​ថា ចំណុច​នេះ​ជា​វិធីសាស្ត្រ​ចរចា​ដ៏មាន​អំណាច​ជាមួយ​ទីក្រុង​វ៉ាស៊ីនតោន​ក្តី ក៏​វា​ជា​អាវុធ​មុខ​ ២ ​សម្រាប់​ទីក្រុង​ប៉េកាំង ដោយសារ​ការបោះចោល​ប័ណ្ណ​បំណុល​នឹង​បង្ក​ឲ្យ​មាន​ការ​ខាតបង់​ដល់​ខ្លួនឯង​វិញ​។

អាវុធ​មួយ​ទៀត​ដែល​ទីក្រុង​ប៉េកាំង​មាន​គឺ​រូបិយប័ណ្ណ​យន់​ដែល​ត្រូវ​បាន​គ្រប់គ្រង​យ៉ាង​តឹងរ៉ឹង​ដោយ​ធនាគារ​កណ្តាល​ដែល​អាច​ធ្លាក់​ថ្លៃ​ដើម្បី​គាំទ្រ​ក្រុមហ៊ុន​នាំ​ចេញ​។

ប៉ុន្តែ​ជាថ្មី​ម្តង​ទៀត​ការណ៍​នេះ​នឹង​អាច​ក្លាយ​ជា​របួស​ដែល​បង្ក​ដោយ​ខ្លួនឯង​ផងដែរ ដោយសារ​វា​អាច​បង្ក​ឲ្យ​មាន​លំហូរ​ចេញ​មូលធន​ក្នុង​បរិមាណ​ធំ​ពី​ប្រទេស​ចិន​។ នេះ​បើ​តាម​លោកស្រី Julian Evans-Pritchard មកពី​ក្រុមហ៊ុន Capital Economics​។

លោកស្រី​ថ្លែង​ថា​៖ «​បើទោះ​ជា​ការទម្លាក់​តម្លៃ​រូបិយប័ណ្ណ​អាច​ប៉ះប៉ូវ​មួយ​ចំនួន​ដល់​ការខូចខាត​សេដ្ឋកិច្ច​ដែល​បង្ក​ឡើង​ដោយ​ពន្ធគយ​អាមេរិក​ក្តី​ក៏​នឹង​មាន​ហានិភ័យ​ធំ​ជាង​មុន​ចំពោះ​ស្ថិរភាព​ហិរញ្ញវត្ថុ ដែល​នឹង​មិន​មាន​តម្លៃ​ដើម្បី​ធ្វើ​ដូច្នេះ​ទេ​»​។

កិច្ចសហប្រតិបត្តិការ​ស្តីពី​កម្មវិធី​នុយក្លេអ៊ែរ​កូរ៉េ​ខាង​ជើង​ក៏​ជា​អាវុធ​មួយ​ផង​ដែរ​សម្រាប់​ចិន​។ លោក ត្រាំ ពឹង​ផ្អែក​យ៉ាងខ្លាំង​លើ​កិច្ចសហប្រតិបត្តិការ​ជាមួយ​ចិន​ក្នុង​ការ​រារាំង​មហិច្ឆតា​នុយក្លេអ៊ែរ​របស់​លោក គីម ជុងអ៊ុន​៕ PS

អត្ថបទគួរចាប់អារម្មណ៍