.jpg)
លោក វង្សី វិស្សុត ពេលចូលរួមក្នុងវេទិកាសាធារណៈកន្លងមក។ ហេង ជីវ័ន
ភ្នំពេញៈ លោក វង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការ ក្រសួងសេដ្ឋកិច្ច និងហិរញ្ញវត្ថុបានលើកឡើងថា រដ្ឋាភិបាលកម្ពុជាបានរៀបចំចំណាយមានទឹកប្រាក់ប្រមាណជិត ២ ពាន់លានដុល្លារក្នុងការទប់ស្កាត់ការរាតត្បាតនៃជំងឺកូវីដ ១៩ និងគ្រប់គ្រងផលប៉ះពាល់មកលើវិស័យសំខាន់ៗនៃសេដ្ឋកិច្ចកម្ពុជា តាមរយៈការដាក់ចេញនូវវិធានការអន្តរាគមន៍ចំនួន ៨ ជុំរួចមកហើយ។
ការលើកឡើងរបស់លោក វិស្សុត បានធ្វើឡើងក្នុងកិច្ចប្រជុំរដ្ឋមន្ត្រីហិរញ្ញវត្ថុ អាស៊ានលើកទី២៥ (25th AFMM) កិច្ចប្រជុំរដ្ឋមន្ត្រីហិរញ្ញវត្ថុ និងទេសាភិបាលធនាគារកណ្តាល អាស៊ានលើកទី៧ (7th AFMGM) និងកិច្ចប្រជុំពាក់ព័ន្ធនៅថ្ងៃទី ៣០ ខែ មីនា ឆ្នាំ ២០២១ តាមរយៈប្រព័ន្ធវីដេអូ។
លោកបានលើកឡើងអំពីការយកចិត្តទុកដាក់របស់រដ្ឋាភិបាលកម្ពុជាក្នុងការអនុវត្ត គោលនយោបាយកំណែទម្រង់នានាសំដៅបង្កើនភាពប្រកួតប្រជែងរបស់កម្ពុជា និងបង្កើតបរិយាកាសអំណោយផលសម្រាប់វិស័យឯកជនក្នុងការធ្វើអាជីវកម្ម និងការវិនិយោគទាំងក្នុងប្រទេស និងឆ្លងកាត់ព្រំដែន។
លោកថ្លែងថា៖ «រាជរដ្ឋាភិបាលកម្ពុជាក្នុងការអនុវត្តវិធានការទប់ស្កាត់ការរាតត្បាតនៃជំងឺកូវីដ ១៩ និងគ្រប់គ្រងផលប៉ះពាល់មកលើវិស័យសំខាន់ៗនៃសេដ្ឋកិច្ចកម្ពុជា តាមរយៈការដាក់ចេញនូវវិធានការ អន្តរាគមន៍ចំនួន ៨ ជុំ ដែលសរុបជាទឹកប្រាក់ប្រមាណ ១ ១៦៤ លានដុល្លារក្នុងឆ្នាំ ២០២០ និង ៧១៩ លានដុល្លារ ចាប់ពីដើមឆ្នាំ ២០២១ មក។
កាលពីថ្ងៃទី ២៥ ខែមីនា រដ្ឋាភិបាលបានប្រកាសដាក់ចេញនូវវិធានការបន្ថែមជុំទី៨ សម្រាប់វិស័យកាត់ដេរ វាយនភណ្ឌ ស្បែកជើង ផលិតផលធ្វើដំណើរ និងកាបូបដែលរដ្ឋាភិបាលនឹងបន្តផ្ដល់ប្រាក់ឧបត្ថម្ភ ៤០ ដុល្លារក្នុង ១ ខែសម្រាប់កម្មករ និយោជិត ១ នាក់ដែលបំពេញការងារនៅក្នុងវិស័យនេះសម្រាប់រយៈពេល ៣ ខែបន្ថែមទៀតពីខែមេសា ដល់ខែមិថុនា ឆ្នាំ ២០២១។ ម្ចាស់រោងចក្រ សហគ្រាស ក្នុងវិស័យនេះត្រូវបន្ថែមចំនួន ៣០ ដុល្លារសម្រាប់កម្មករនិយោជិត ១ នាក់ (ជាសរុបកម្មករនិយោជិត ១ នាក់ទទួលបាន ៧០ ដុល្លារ ១ ខែ)។
លោក Anthony Galliano នាយកប្រតិបត្តិក្រុមហ៊ុនវិនិយោគហិរញ្ញវត្ថុខេមបូឌាគ្រុបបានមានប្រសាសន៍ថា ដោយមានការគាំទ្រជាបន្តបន្ទាប់ពីរដ្ឋាភិបាលពិតជាបានចូលរួមចំណែកធ្វើឱ្យអាជីវកម្មតូចៗនៅមានដំណើរការទៅមុខយ៉ាងសន្សឹមៗ។
លោកបន្តថា៖ «យើងសង្កេតឃើញថា រដ្ឋាភិបាលនៅតែបន្តដាក់ចេញនូវវិធានការជាបន្តបន្ទាប់ដើម្បីគាំទ្រដល់អាជីវកម្មខ្នាតតូចនៅក្នុងបរិយាកាសធុរកិច្ចដ៏លំបាកដែលមិនធ្លាប់មាននេះ។ ទន្ទឹមនឹងការផ្តល់សាច់ប្រាក់ងាយស្រួល (Liquidity) ដល់អាជីវកម្មដែលកំពុងជួបការលំបាកតាមរយៈប្រាក់កម្ចីធានា គឺមានប្រយោជន៍ណាស់ក្នុងការលើកទឹកចិត្តពន្ធបន្ថែមគឺពិតជាចាំបាច់ណាស់សម្រាប់វិស័យដែលទទួលរងផលប៉ះពាល់»។
បើយោងទៅតាមលោក វង្សី វិស្សុត រាជរដ្ឋាភិបាលកម្ពុជាកំពុងរៀបចំដាក់ចេញនូវផែនការស្តារសេដ្ឋកិច្ច ក្រោយវិបត្តិជំងឺកូវីដ ១៩ ឆ្នាំ ២០២១-២០២៣ ដោយផ្តោតសំខាន់លើអភិក្រមចំនួន ៣ គឺទី១ ការងើបឡើងវិញ និងការរស់រាន (Revival and Survival) ទី២ ការកែទម្រង់ (Reform) ផ្តោតលើការប្រែក្លាយវិបត្តិទៅជាកាលានុវត្តភាព ដោយផ្តោតលើការធ្វើពិពិធកម្ម និងពង្រឹងការប្រកួតប្រជែងសេដ្ឋកិច្ច និងទី៣ ការលើកកម្ពស់ភាពធន់ (Resilience) របស់កម្ពុជាទប់ទល់នឹងវិបត្តិ៕ LA
