ក្រុងវ៉ាស៊ីនតោនៈ ក្រសួងហិរញ្ញវត្ថុអាមេរិកបានរាយការណ៍កាលពីថ្ងៃពុធថា ពន្ធនាំចូលពាណិជ្ជកម្មខ្ពស់ដែលលោកប្រធានាធិបតី ដូណាល់ ត្រាំ បានដកហូតកាលពីឆ្នាំមុន បាននាំយកទឹកប្រាក់ ៩ ពាន់លានដុល្លារបន្ថែមទៀតចូលទៅក្នុងហិបប្រាក់របស់រដ្ឋាភិបាលនៅត្រីមាសទី ៣ ប៉ុន្តែឱនភាពសារពើពន្ធនៅតែមានកម្រិតខ្ពស់ជាងឆ្នាំ ២០១៧ ចំនួន ៤២ ភាគរយ។
លោក ត្រាំ បានលើកឡើងដដែលៗ អំពីពន្ធនាំចូលដែលដកហូតកាលពីឆ្នាំមុន ជាពិសេសលើការនាំចូលប្រចាំឆ្នាំក្នុងតម្លៃ ២៥០ ពាន់លានដុល្លារពីប្រទេស ចិន ថាជាអត្ថប្រយោជន៍មួយសម្រាប់រដ្ឋាភិបាលអាមេរិកដែលត្រូវបានបង់ដោយក្រុមហ៊ុនរបស់ប្រទេស ចិន នៅពេលដែលតាមការពិតទៅ ប្រាក់ពន្ធទាំងនោះត្រូវបានបង់ដោយក្រុមហ៊ុនរបស់អាមេរិកទៅវិញទេ។
លោក ត្រាំ បានឲ្យដឹងកាលពីថ្ងៃអង្គារថា នៅពេលនេះប្រទេស ចិន កំពុងតែ «ចំណាយរាប់ពាន់លានដុល្លារក្នុងមួយខែសម្រាប់សិទ្ធិចូលក្នុងទីផ្សារអាមេរិក»។
ពន្ធគយសរុបដែលបានប្រមូល បានកើនឡើងដល់ ១៨ ពាន់លានដុល្លារ ធៀបនឹងរយៈពេលដូចគ្នាកាលពីឆ្នាំ ២០១៧ ខណៈដែលនៅខែធ្នូ ប្រាក់ពន្ធគយនេះបានកើនឡើង ២ ដងដល់ ៦ ពាន់លានដុល្លារ។ នេះបើតាមរបាយការណ៍ថវិកាប្រចាំខែ។
លោក ត្រាំ ក៏បានហូតពន្ធពិន័យខ្ពស់ផងដែរលើដែកថែប និងអាលុយមីញ៉ូមនាំចូល ព្រមទាំងទំនិញផ្សេងទៀតដូចជាបន្ទះសូឡា និងម៉ាស៊ីនបោកគក់ ក្នុងគោលបំណងការពារឧស្សាហកម្មអាមេរិក ដែលបានធ្វើឲ្យមានការចាត់វិធានការតបតវិញពីដៃគូពាណិជ្ជកម្មរបស់អាមេរិកជាច្រើន។
ប៉ុន្តែរបាយការណ៍នេះបានបង្ហាញថា ទោះបីមានកំណើនក្នុងការប្រមូលពន្ធគយក៏ដោយ ក៏ឱនភាពសារពើពន្ធអាមេរិកនៅត្រីមាសទី១ នៃឆ្នាំសារពើពន្ធ ២០១៩ ដែលបានចាប់ផ្ដើមកាលពីថ្ងៃទី ១ ខែតុលា ឆ្នាំមុន បានកើនឡើងចំនួន ៩៤ ពាន់លានដុល្លារ ដល់ចំនួន ៣១៩ ពាន់លានដុល្លារ ដោយសារតែកំណើនការចំណាយជិត ១០០ ពាន់លានដុល្លារ។
កំណើនការចំណាយរួមមានកំណើនដ៏ច្រើនសម្រាប់ការចំណាយលើប្រព័ន្ធថែរក្សាសុខភាព សន្ដិសុខសង្គម ការពារជាតិ និងកំណើន ១៨ ពាន់លានដុល្លារនៃការប្រាក់សម្រាប់បំណុលសាធារណៈ ដែលនៅខែនេះបានកើនឡើងដល់កម្រិតខ្ពស់បំផុត ២២ ពាន់ពាន់លានដុល្លារ៕ AFP/LA