ភ្នំពេញៈ ក្រុមវិនិយោគិនចិន ៤២ នាក់មកពីវិស័យផ្សេងៗគ្នាបានបន្តស្វែងរកឱកាសវិនិយោគ ពាណិជ្ជកម្មនៅក្នុងប្រទេសកម្ពុជា ខណៈប្រទេសនេះកំពុងក្លាយជាទីតាំងវិនិយោគរបស់ចិនកាន់តែច្រើនឡើងៗ។
គណៈប្រតិភូសហព័ន្ធពាណិជ្ជកម្មចិនទាជីវសកលលោក (TXCS) ដែលដឹកនាំដោយលោក លី សុងជាន ប្រធានក្រុមហ៊ុន Mingyuan Group Limited កាលពីថ្ងៃចន្ទ បានចូលរួមសន្និសីទសេដ្ឋកិច្ចប្រចាំឆ្នាំលើកទី ៥ នៃសហព័ន្ធពាណិជ្ជកម្មទាជីវ (TXCS) នៅភ្នំពេញជាមួយនឹងការបង្ហាញពីច្បាប់ និងព័ត៌មានស្តីពីការវិនិយោគនៅកម្ពុជាពីលោក សុក ចិន្តាសោភា អគ្គលេខាធិការក្រុមប្រឹក្សាអភិវឌ្ឍន៍កម្ពុជា (CDC) និងលោក ពុង ឃាវសែ ប្រធានសហព័ន្ធខ្មែរ ចិន នៅកម្ពុជា។
ថ្លែងក្នុងវេទិកាកាលពីថ្ងៃចន្ទលោក សុក ចិន្តាសោភា បានថ្លែងថា កម្ពុជា គឺជាប្រទេសបើកចំហខ្លាំងបំផុតដែលក្រុមវិនិយោគិនបរទេសអាចវិនិយោគ ១០០ ភាគរយលើគ្រប់វិស័យ ដោយមិនមានការគ្រប់គ្រងមូលធន និងអាចយកប្រាក់ត្រឡប់ទៅវិញដោយមិនមានការរឹតបន្តឹងនោះទេ។
លោកថ្លែងថាវាមិនមែនជារឿងភ្ញាក់ផ្អើលនោះទេក្នុងការមើលឃើញកំណើនធំៗនៃការវិនិយោគរបស់ជនជាតិចិននៅកម្ពុជា ដោយសារតែប្រទេស ២ នេះមានប្រវត្តិសាស្ដ្រទំនាក់ទំនងកាទូតដ៏រឹងមាំ និងបានរក្សាមិត្តភាពល្អ រហូតមកដល់ពេលនេះ។
លោកបន្តថាប្រទេសទាំង ២ នេះមានការតភ្ជាប់កាន់តែងាយស្រួលទៅវិញទៅមកតាមផ្លូវអាកាសដែលផ្ដល់អត្ថប្រយោជន៍ច្រើនបំផុតសម្រាប់កម្ពុជា មិនគ្រាន់តែភ្ញៀវទេសចរប៉ុណ្ណោះទេ ប៉ុន្តែថែមទាំងការវិនិយោគផងដែរ។
លោកថ្លែងថា៖ «កាលពី ៥ ឆ្នាំមុនការតភ្ជាប់ជើងហោះហើររវាងកម្ពុជា និងចិនមានជើងហោះហើរប្រហែល ៥ ប៉ុណ្ណោះក្នុង ១ សប្ដាហ៍ ប៉ុន្តែនៅពេលនេះមានប្រហែល ៨៨ ក្នុង ១ សប្ដាហ៍»។
តាមលោក ចិន្តាសោភា យ៉ាងហោចណាស់គម្រោងអគារខ្ពស់ ៨០ ដែលមាននៅទីក្រុងភ្នំពេញ ហើយភាគច្រើននៃគម្រោងទាំងនោះគឺជាការវិនិយោគមកពីប្រទេសចិន។
ក្រុមវិនិយោគិនចិនដែលបានមកពីសហគ្រាសចិន ៣៥ មានមកពីផ្នែកអចលនទ្រព្យ ហិរញ្ញវត្ថុ កសិកម្ម ឧស្សាហកម្ម បច្ចេកវិទ្យា ការថែទាំសុខភាព និងជីវបច្ចេកវិទ្យា។ ក្រុមគណៈប្រតិភូគ្រោងនឹងជួបលោក ហ៊ុន សែន ផងដែរនៅថ្ងៃអង្គារនេះ។
លោក Li Songjiang បានថ្លែងនៅក្នុងវេទិកាពាណិជ្ជកម្មកាលពីម្សិលមិញថា៖ «ដំណើរទស្សនកិច្ចរបស់ពួកយើងនឹងទទួលបានការយល់ដឹងកាន់តែប្រសើរអំពីសក្ដានុពលពាណិជ្ជកម្ម និងគោលនយោបាយលើកទឹកចិត្តរបស់កម្ពុជា និងដើម្បីស្វែងរកឱកាសវិនិយោគដែលនឹងរួមចំណែកបន្ថែមទៀតដល់ការអភិវឌ្ឍសេដ្ឋកិច្ចកម្ពុជា»។
លោក ពុង ឃាវសែ ប្រធានសហព័ន្ធខ្មែរ ចិន នៅកម្ពុជាថ្លែងថាប្រទេសចិន ជាដៃគូពាណិជ្ជកម្មដ៏ធំរបស់កម្ពុជា និងជាប្រភពវិនិយោគរយៈពេលវែង។
លោកថ្លែងថា៖ «កម្ពុជាត្រូវការការវិនិយោគបរទេសច្រើន កិច្ចប្រជុំរបស់ក្រុមគណៈប្រតិភូចិន និងមន្ដ្រីកម្ពុជា នឹងជាវេទិកាដ៏ធំមួយសម្រាប់បង្កើនល្បឿនកិច្ចសហប្រតិបត្តិការពាណិជ្ជកម្ម និងការវិនិយោគ»៕LA