ភ្នំពេញៈ វិនិយោគិនតួកគីបានបង្ហាញពីការចាប់អារម្មណ៍ក្នុងការស្វែងរកដៃគូវិនិយោគនៅកម្ពុជាក្នុងវិស័យអគ្គិសនី និងអេឡិចត្រូនិក ខណៈទំនាក់ទំនងពាណិជ្ជកម្មរវាងប្រទេសទាំង ២ មានកម្រិតទាបនៅឡើយ។
ក្នុងជំនួបជាមួយថ្នាក់ដឹកនាំនៃសភាពាណិជ្ជកម្មកម្ពុជានៅទីក្រុងភ្នំពេញកាលពីសប្តាហ៍មុន លោក Guven Uckan ប្រធានក្រុមប្រឹក្សាសមាគមអ្នកនាំចេញក្នុងវិស័យអគ្គិសនី និងអេឡិចត្រូនិក ប្រទេសតួកគីបានលើកឡើងថា កម្ពុជាជាប្រទេសដែលមានសក្តានុពលច្រើនសម្រាប់ការវិនិយោគ ហើយបច្ចុប្បន្នក៏មានវិនិយោគិនតួកគីមួយចំនួនកំពុងវិនិយោគនៅទីនោះផងដែរ។
លោកបន្តថា ជាមួយនឹងឱកាសវិនិយោគដ៏ច្រើននៅកម្ពុជា លោកមានផែនការនឹងដឹកនាំក្រុមវិនិយោគិនតួកគី ដើម្បីមកធ្វើទស្សនកិច្ច និងស្វែងរកដៃគូវិនិយោគនៅកម្ពុជានៅក្នុងអំឡុងខែមេសា ឆ្នាំ ២០២០ ខាងមុខ។
លោកថ្លែងថា៖ «ក្រុមគណៈប្រតិភូធុរកិច្ចតួកគីដែលគ្រោងនឹងមកបំពេញទស្សនកិច្ចនៅកម្ពុជាមានចំនួន ១២ ក្រុមហ៊ុនដែលសុទ្ធសឹងតែជាអ្នកជំនាញខាងវិស័យអគ្គិសនី និងអេឡិចត្រូនិក»។
លោក លឹម ហេង អនុប្រធានសភាពាណិជ្ជកម្មកម្ពុជាបានប្រាប់ភ្នំពេញប៉ុស្តិ៍កាលពីម្សិលមិញថា តួកគីជាប្រទេសរីកចម្រើន និងមានបច្ចេកវិទ្យាខ្ពស់ក្នុងការវិនិយោគលើរោងចក្រផលិតអគ្គិសនី និងគ្រឿងអេឡិចត្រូនិក ដូច្នេះបើពួកគេចូលមកវិនិយោគនៅកម្ពុជានោះ វានឹងចូលរួមចំណែកក្នុងការបង្កើនប្រាក់ចំណូលជាតិ និងបង្កើតការងារថ្មីសម្រាប់ប្រជាជនខ្មែរ។
លោកថ្លែងថា៖ «ទោះបីនេះគ្រាន់តែជាការមកស្វែងរកឱកាសវិនិយោគ ប៉ុន្តែយើងពិតជារីករាយ ព្រោះតាមផែនការពួកគេនឹងនាំអ្នកវិនិយោគតួកគីថ្មីជាច្រើនទៀតមកកម្ពុជានៅខែមេសា ឆ្នាំក្រោយ»។
បើតាមលោក លឹម ហេង បច្ចុប្បន្នផលិតផលកម្ពុជាដែលនាំចេញទៅតួកគីមានដូចជា សម្លៀកបំពាក់ ស្បែកជើង អង្ករ និងផលិតផលកសិផលមួយចំនួន ចំណែកការវិនិយោគរបស់តួកគី មានដូចជា សាលារៀន គ្រឿងសម្ភារតុបតែង និងកម្រាលព្រំជាដើម។
កាលពីដើមឆ្នាំ ២០១៩ កម្ពុជាធ្លាប់បានទាក់ទងនាំយកកប៉ាល់ផលិតអគ្គិសនីពីប្រទេសតួកគីមកបំពេញកង្វះខាតអគ្គិសនីនៅកម្ពុជា ប៉ុន្តែក្រោយមកផែនការនេះត្រូវផ្អាកទៅវិញ ព្រោះតែវាមានតម្លៃខ្ពស់ពេក។
លោក វិចទ័រ ហ្សូនា អគ្គនាយកនៃអគ្គនាយកដ្ឋានថាមពលបានស្វាគមន៍ចំពោះការចាប់អារម្មណ៍មកវិនិយោគលើវិស័យអគ្គិសនីនៅកម្ពុជា ដោយលោកប្រាប់ថា ជាការល្អបើមានការចូលមកវិនិយោគលើវិស័យផលិតថាមពលអគ្គិសនីនៅកម្ពុជា ខណៈតម្រូវការប្រើប្រាស់នៅកម្ពុជាបានបន្តកើនឡើងយ៉ាងច្រើននារយៈពេលប៉ុន្មានឆ្នាំចុងក្រោយនេះ។
លោកបន្តថា៖ «ទោះយ៉ាងណា ដើម្បីឲ្យការវិនិយោគបានជោគជ័យ តម្លៃអគ្គិសនីលក់ចេញត្រូវតែទាប ព្រោះរដ្ឋាភិបាលកម្ពុជាមានគោលនយោបាយបញ្ចុះតម្លៃជារៀងរាល់ឆ្នាំចាប់ពីឆ្នាំ ២០១៥ មក»។
តាមលោក ហ្សូនា ទោះបីជាតួកគីជាប្រទេសដែលមានបច្ចេកវិទ្យាខ្ពស់ក្នុងការផលិតអគ្គិសនី ប៉ុន្តែវិស័យអគ្គិសនីនៅកម្ពុជារហូតមកទល់ពេលនេះនៅមិនទាន់មានការវិនិយោគរបស់តួកគីនៅឡើយទេ។
ក្នុងពេលជួបជាមួយលោកប្រធានាធិបតីតួកគី លោក Recep Tayyip Erdogan នៅប្រទេសតាហ្ស៊ីគីស្ថានកាលពីថ្ងៃទី ១៥ ខែមិថុនា ឆ្នាំ ២០១៩ លោកនាយករដ្ឋមន្ត្រី ហ៊ុន សែន ក៏ធ្លាប់បានជំរុញ និងលើកទឹកចិត្តឲ្យមានការបង្កើនការវិនិយោគរកាន់តែច្រើនរវាងប្រទេសទាំង ២ ឲ្យបានកាន់តែខ្លាំងបន្ថែមទៀត។
លោក ហ៊ុន សែន ថា ចង់ឃើញទំហំពាណិជ្ជកម្មរវាងកម្ពុជា និងតួកគីកើនដល់ ១ ពាន់លានដុល្លារក្នុង ១ ឆ្នាំ ខណៈទំនាក់ទំនងការទូតរវាងប្រទេសទាំង ២ កំពុងមានភាពល្អប្រសើរ។ លោកថ្លែងថា៖ «គួរធ្វើបញ្ជីមុខទំនិញដែលអាចនាំចេញ នាំចូលរវាងប្រទេសទាំង ២ ពោលទំនិញអ្វីដែលកម្ពុជាអាចនាំទៅតួកគីបាន ហើយតួកគីអាចនាំទំនិញអ្វីមកកម្ពុជាបាន»។
បើតាមលោក Recep Tayyip Erdogan បច្ចុប្បន្នទំហំពាណិជ្ជកម្មរវាងតួកគី និងកម្ពុជានៅមានទំហំត្រឹមតែជាង ៩១ លានដុល្លារប៉ុណ្ណោះ។
មិនមានទិន្នន័យទំហំពាណិជ្ជកម្មរវាងកម្ពុជា និងប្រទេស តួកគី ក្នុងឆ្នាំ ២០១៨ ទេ ប៉ុន្តែលោក កែម វិចិត្រ ឲ្យដឹងថាសម្រាប់ការនាំចេញទំនិញពីកម្ពុជាទៅតួកគីកាលពីឆ្នាំ ២០១៧ មានតម្លៃប្រមាណ ១៩,៦ លានដុល្លារ៕ LA