.jpg)
តំណាងក្រុមហ៊ុន NQ Better Confluence ក្នុងជំនួបមន្ត្រីខេត្តសៀមរាប។ រូបថត ខេត្តសៀមរាប
ភ្នំពេញ: តំណាងក្រុមហ៊ុន NQ Better Confluence ដែលជាក្រុមហ៊ុនមកពីប្រទេសបារាំងបានបង្ហាញចំណាប់អារម្មណ៍លើការវិនិយោគបង្កើតមជ្ឈមណ្ឌលកម្សាន្តនៅក្នុងខេត្តសៀមរាប។
បំណងវិនិយោគនេះបានលាតត្រដាងក្នុងជំនួបជាមួយថ្នាក់ដឹកនាំខេត្តសៀមរាបដែលជាខេត្តគោលដៅទេសចរណ៍ដ៏ទាក់ទាញបំផុតរបស់កម្ពុជា ខណៈអ្នកស្ថិតក្នុងវិស័យទេសចរណ៍រំពឹងថា គម្រោងវិនិយោគនេះអាចជួយស្តារវិស័យទេសចរណ៍ក្នុងខេត្តសៀមរាបឡើងវិញ បន្ទាប់ពីស្ថានភាពជំងឺកូវីដ ១៩ ធូរស្រាល។
លោក ង៉ាន់ ភិរុណ អភិបាលរងខេត្តសៀមរាបបានឲ្យដឹងថា លោកបានជួបពិភាក្សាជាមួយតំណាងក្រុមហ៊ុនកាលពីសប្តាហ៍មុន ដោយក្រុមហ៊ុននេះគ្រោងវិនិយោគបង្កើតមជ្ឈមណ្ឌលកម្សាន្តនៅក្នុងខេត្តសៀមរាបដែលជាតំបន់សក្តានុពលវប្បធម៌ទេសចរណ៍ដ៏ទាក់ទាញនៅកម្ពុជា។
លោកថ្លែងថា៖ «ក្រុមហ៊ុនរបស់ប្រទេសបារាំងនេះបានមកជួបពិភាក្សាជាមួយយើងអំពីកិច្ចការងារវិនិយោគលើវិស័យទេសចរណ៍ដោយគ្រោងបង្កើតគម្រោងរៀបចំធ្វើទីកន្លែងសួនកម្សាន្តនៅខេត្តសៀមរាប»។
លោកបន្តថា៖ «យើងគាំទ្រគម្រោងវិនិយោគនេះតាមច្បាប់នៃការវិនិយោគនៅកម្ពុជាបានកំណត់ថា គម្រោងវិនិយោគដែលមានទំហំទឹកប្រាក់ក្រោម ២ លានដុល្លារ ត្រូវបានសម្រេចនៅត្រឹមថ្នាក់ខេត្ត តែបើគម្រោងនោះមានទំហំទឹកប្រាក់ច្រើនជាង ២ លានដុល្លារ គឺសម្រេចនៅថ្នាក់ជាតិ»។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា (CATA) ដែលធ្លាប់ជួបពិភាក្សាជាមួយតំណាងក្រុមហ៊ុននេះកាលពីថ្មីៗនេះ បានប្រាប់ភ្នំពេញប៉ុស្តិ៍ថា ក្រុមហ៊ុននេះកំពុងសិក្សាស្វែងរកទីតាំងនៅក្បែរ ក្រុងសៀមរាបដើម្បីបង្កើតមជ្ឈមណ្ឌលកម្សាន្តដែលមានទំហំដីប្រមាណ ១០ ហិកតា។
លោកស្រីបន្តថា បើទោះជាវិស័យទេសចរណ៍កំពុងរងផលប៉ះពាល់ធ្ងន់ធ្ងរជាងគេ ដោយសារវិបត្តិជំងឺកូវីដ ១៩ គម្រោងវិនិយោគនេះនឹងជួយទាក់ទាញភ្ញៀវទេសចរអន្តរជាតិមកទស្សនាក្នុងខេត្តនេះ បន្ទាប់ពីស្ថានភាពជំងឺកូវីដ ១៩ ស្ងប់ស្ងាត់ទៅវិញ។
លោកស្រីថ្លែងថា៖ «ផលិតផលកែច្នៃក្នុងវិស័យទេសចរណ៍នៅខេត្តសៀមរាបនៅមានកម្រិត ដូច្នេះខេត្តនេះនៅមានសក្តានុពលច្រើនក្នុងការទាក់ទាញវិនិយោគិនបន្ថែមទៀត»។
កម្ពុជាទទួលបានចំណូលជាង ១៨ លានដុល្លារអាមេរិក ពីការលក់សំបុត្រឲ្យភ្ញៀវបរទេសចូលទស្សនារមណីយដ្ឋានអង្គរក្នុងរយៈពេល ៥ ខែដំបូងឆ្នាំ ២០២០ នេះធ្លាក់ចុះ ៦៤,១៨ ភាគរយ បើធៀបនឹងរយៈពេលដូចគ្នាឆ្នាំមុន។ នេះបើតាមសេចក្តីប្រកាសព័ត៌មានរបស់គ្រឹះស្ថានអង្គរ។
គ្រឹះស្ថានអង្គរបានឲ្យដឹងថា ចាប់ពីខែមករាដល់ខែឧសភាភ្ញៀវទេសចរបរទេសចំនួន ៣៨៦ ០៩៣ នាក់ បានទិញបណ្ណចូលទស្សនារមណីយដ្ឋានអង្គរក្នុងអំឡុងពេលនេះធ្លាក់ចុះ ៦៥,៤៦ ភាគរយ បើធៀបនឹងរយៈពេលដូចគ្នាឆ្នាំមុន៕ LA
