ភ្នំពេញ: គណៈប្រតិភូធុរកិច្ចសិង្ហបុរីកំពុងសម្លឹងឱកាសវិនិយោគនៅប្រទេសកម្ពុជា ក្នុងវិស័យអាជីវកម្មលក់រាយ ម្ហូបអាហារ បច្ចេកវិទ្យា ហិរញ្ញវត្ថុ និងវិស័យអប់រំ។ នេះបើយោងតាមតំណាងក្រុមធុរកិច្ចសិង្ហបុរីបានឲ្យដឹងកាលពីថ្ងៃពុធ។
ក្នុងដំណើរទស្សនកិច្ចរបស់គណៈប្រតិភូធុរកិច្ចសិង្ហបុរីតាមរយៈកម្មវិធី Travel and Learn មានរយៈពេល ៤ ថ្ងៃចាប់ពីថ្ងៃទី ៤ ដល់ ៧ ខែកញ្ញា ដើម្បីសិក្សាស្វែងយល់ពីឱកាសវិនិយោគនៅកម្ពុជា។
ដំណើរទស្សនកិច្ចនេះត្រូវបានរៀបចំដោយ Ngee Ann polytechnic ដែលជាវិទ្យាស្ថានអប់រំឈានមុខគេនៅប្រទេសសិង្ហបុរី។
លោក Edwin Tan សាស្ត្រាចារ្យជាន់ខ្ពស់នៃវិទ្យាស្ថាន Ngee Ann Polytechnic បានប្រាប់ភ្នំពេញ ប៉ុស្តិ៍កាលពីថ្ងៃពុធថា វិនិយោគិនមកពីប្រទេសសិង្ហបុរីចំនួន ២៩ នាក់បានជួបជុំគ្នាជាមួយអ្នកជំនួញនៅកម្ពុជា ដើម្បីស្វែងយល់ពីឱកាសអាជីវកម្មថ្មីនៅប្រទេសកម្ពុជា។
លោកថ្លែងថា៖ «តាមរយៈកម្មវិធី Travel and Learn នេះអ្នកជំនួញសិង្ហបុរីមកកម្ពុជាផ្តោតលើវិស័យម្ហូបអាហារ និងភេសជ្ជៈវិស័យបច្ចេកវិទ្យា និងវិស័យអប់រំជាដើម»។
តំណាងវិស័យឯកជននៅកម្ពុជាមានលោក ខេន លូ អគ្គលេខាធិការសមាគមរោងចក្រកាត់ដេរនៅកម្ពុជា និងលោក Vithourak Sarun ម្ចាស់ស្ថានីយប្រេង PTT ប្រធានសមាគមសហគ្រិនវ័យក្មេងកម្ពុជា (YEAC) រួមទាំងបណ្តាញមកពីសមាជិក Singapore Club Cambodia ក៏បានចូលរួមនៅក្នុងកម្មវិធីបង្ហាញចំណាប់អារម្មណ៍របស់វិនិយោគិនសិង្ហបុរីនេះផងដែរ។
លោក គូច ផេង ប្រធានសមាគមសហគ្រិនវ័យក្មេងកម្ពុជា (YEAC) ថ្លែងថា វិនិយោគិនសិង្ហបុរីគួរសម្លឹងមើលឱកាសវិនិយោគលើវិស័យបច្ចេកវិទ្យានៅកម្ពុជា។ លោកថ្លែងថា៖ «ខ្ញុំអាចនិយាយថា ប្រសិនបើអ្នកទាំងអស់គ្នាមកវិនិយោគនៅកម្ពុជាឥឡូវនេះ មិនទាន់យឺតពេលទេ»។
លោកបន្តថា៖ «មិនមែនតែឱកាសវិនិយោគទៅលើវិស័យអចលនទ្រព្យប៉ុណ្ណោះទេ ពួកគាត់អាចមានឱកាសវិនិយោគលើផ្នែកសេវាកម្ម ការផលិតកែច្នៃ និងបច្ចេកវិទ្យា»។
លោក សួន សុផល ប្រធាននាយកដ្ឋានទំនាក់ទំនងសាធារណៈ និងជំរុញការវិនិយោគឯកជននៃក្រុមប្រឹក្សាអភិវឌ្ឍន៍កម្ពុជាបានស្វាគមន៍ចំពោះការស្វែងរកឱកាសវិនិយោគនៅកម្ពុជា។ លោកថ្លែងថា៖ «បើអ្នកចង់វិនិយោគនៅកម្ពុជា ក្រុមប្រឹក្សាអភិវឌ្ឍន៍កម្ពុជានឹងជួយអ្នកដល់គម្រោងវិនិយោគរបស់អ្នក»៕