The Phnom Penh Post Search

Search form




Logo of Phnom Penh Post newspaper Phnom Penh Post - វិនិយោគិន​យល់​ឃើញ​ផ្សេង​គ្នា​ពី​កំណើន​ប្រាក់​​កម្ចី និង​បញ្ញើ

វិនិយោគិន​យល់​ឃើញ​ផ្សេង​គ្នា​ពី​កំណើន​ប្រាក់​​កម្ចី និង​បញ្ញើ

បុគ្គលិកធនាគារមួយកំពុងដាក់លុយរាប់ក្នុងម៉ាស៊ីនរាប់លុយ។
បុគ្គលិកធនាគារមួយកំពុងដាក់លុយរាប់ក្នុងម៉ាស៊ីនរាប់លុយ។ ហេង ជីវ័ន

វិនិយោគិន​យល់​ឃើញ​ផ្សេង​គ្នា​ពី​កំណើន​ប្រាក់​​កម្ចី និង​បញ្ញើ

ភ្នំពេញៈ ជាមួយ​នឹង​កំណើន​កម្ចី​របស់​ធនាគារ​ពាណិជ្ជ​នៅ​កម្ពុជា​ក្នុង​ពេល​ថ្មីៗ​មាន​​ការ​ធ្វើ​អត្ថា​ធិប្បាយ​ផ្សេង​ៗ​គ្នា​​ពី​​កំណើន​នេះ​ពី​អ្នក​រក​ស៊ី​នៅ​ក្នុង​ឧស្សាហកម្ម​នេះ។

យោង​តាម​តួ​លេខ​​បាន​ពី​ធនាគារជាតិ​នៃ​កម្ពុជា​ចេញ​ផ្សាយ​ក្នុង​ពេល​ថ្មី​ៗ​នេះ ​ការ​ផ្តល់​​កម្ចី​​បាន​កើន​ឡើង​​ចំនួន​​ ២៨ ​​ភាគ​រយ​គិត​មក​ត្រឹម​ខែ​មិថុនា​ ​ដែល​កើន​ឡើង​​ប្រហែល ៩,៥ ពាន់​លាន​ដុល្លារ​អាមេរិក​ធៀប​នឹង​ចំនួន​​ ៧,៤ ​ពាន់​លាន​​ដុល្លារ​អាមេរិក​គិត​មក​ត្រឹម​ខែ​ធ្នូ​ ខណៈ​ប្រាក់​បញ្ញើ​សរុប​​ទទួល​បាន​កំណើន​ ១៥ ​ភាគរយ ​កើន​ពី​ ៨,៧ ​ពាន់​លាន​​ដុល្លារ​ធៀប​​នឹង​ ៧,៥៦ ​ពាន់​លាន​ដុល្លារ​អាមេរិក​គិត​មក​ត្រឹម​ចុង​ខែ​ធ្នូ។

លោក Grant ​Knuckey ​អគ្គនាយក​ធនាគារ ANZ Royal បាន​ឆ្លើយ​តប​អ៊ីមែល​របស់​ភ្នំពេញ​ប៉ុស្ដិ៍​កាល​ពី​ថ្ងៃ​ពុធ​ថា​ការ​កើន​ឡើង​របស់​អនុបាត​ប្រាក់​កម្ចី​ធៀប​ទៅ​នឹង​ប្រាក់​បញ្ញើ​គួរតែ​ត្រូវ​បានធ្វើ​ការ​ពិចារណា​ដើ​​ម្បី​បញ្ចៀស​ពី​ហានិភ័យ​ដែល​អាច​កើត​មាន​ចំពោះ​ឧស្សាហកម្ម​នេះ​។

លោក​បាន​សរ​សេរថា៖ «ដោយ​សារ​តែប្រព័ន្ធ​អនុបាត​ប្រាក់​កម្ចី​ធៀប​ទៅ​នឹង​ប្រាក់​បញ្ញើ​របស់​កម្ពុជា​​មាន​ប្រហែល​ ១០០ ​​ភាគរយ​នៅ​ចុង​ឆ្នាំ ២០១៣ បន្ទាប់​មក​ការ​ពិត​គឺ​ថា កម្ចី​នៅ​ធនាគារ​ពាណិជ្ជ​កំពុង​​កើន​ឡើង​​ក្នុង​កម្រិត​ពីរ​ដង​នៃ​អត្រា​ប្រាក់​​បញ្ញើ​ពិត​ជា​ការគួរ​ឲ្យ​បារម្ភ​ពិត​ប្រាកដ​មែន»។

លោក​បន្ត​ថា​៖ «​តែ​ង​តែ​មាន​តម្រូវ​ការ​កាន់​តែ​ច្រើន​ឡើង​ៗ​សម្រាប់​ការ​ខ្ចី​ប្រាក់ ​ប៉ុន្តែ​មិន​មាន​ន័យ​ថា​ តម្រូវ​ការ​ទាំង​អស់​នេះ​គួរ​ត្រូវ​បាន​បំពេញ​នោះ​ទេ​។ ការ​ផ្ដល់​ប្រាក់​កម្ចី​មួយ​ចំនួ​​ន​មាន​ការ​ធ្វេស​ប្រហែស។ ​យក​ល្អ​ត្រូវ​បន្ថយ​ល្បឿន​បន្តិច​នៅ​ពេល​នេះ ​ប្រសើរ​ជាង​បង្កើត​ហានិ​ភ័យ​​នៅ​ពេល​អនាគត»។

លោក​បន្ត​ថា​៖ «​បើ​អ្នក​ដាក់​បញ្ចូល​គ្នា​នូវ​ចំនួន​នោះ​នឹង​មាន​កំណើន​គួរ​ឲ្យ​មាន​ការ​ភ្ញាក់​ផ្អើល​នៅ​ក្នុង​សៀវភៅ​ប្រាក់​កម្ចី​របស់​គ្រឹះ​សា្ថន​មីក្រូ​ហិរញ្ញ​វត្ថុ ​(MFI) ​ដែល​អ្វី​​កំពុង​ចាប់​​ផ្ដើម​ស្វែង​រក​ការ​ពន្យឺត​ដំណើរ​ការ​បន្តិច។ នៅ​ពី​ក្រោយ​អតុល្យភាព​នេះ​ជា​ការ​បន្ត​បញ្ហា​ដោយ​ធនាគារ​ទាំង​នេះ​មាន​លទ្ធ​ភាព​អាច​រក​មូល​និធិបាន​​ដោយ​ខ្លួន​ឯង​ពី​​ធនាគារ​ក្រៅ​ប្រទេស​​ដោយ​មិន​មាន​ការរឹ​ត​បន្តឹង​ និង​គ្មាន​ទុន​បម្រុង​នោះ​ទេ​។ ​ខ្ញុំ​បាន​​លើក​បញ្ហា​នេះ​ឡើង​​ជា​និច្ច ​ហើយ​ខ្ញុំ​ជឿ​ជាក់​ថា​ វា​ដល់​ពេល​ចាត់​វិធាន​ការ​​លើ​ការ​ធ្វេស​​ប្រហែស​មួយ​ចំនួន​​ហើយ​»។

លោក​ស្នើ​ថា​ ត្រូវតែ​មាន​វិធាន​ការ​ទប់​ស្កាត់​អនុ​បាត​ប្រាក់​កម្ចី​ធៀប​ទៅ​នឹង​ប្រាក់​បញ្ញើ​នៅ​​ក្នុង​​ធនាគារ​នី​មួយ​ៗ​។

លោក ​អ៊ិន ​ចាន់​នី ​ប្រធាន​នាយក​ប្រតិ​បត្តិ​ធនាគារ​អេស៊ីលីដា​ ដែល​ធនា​គារ​នេះ​​មើល​ឃើញ​ពី​កំណើន​ប្រាក់​កម្ចី​​ប្រហែល​ ១១ ​ភាគរយ​រហូត​ដល់ ១,៦ ​ពាន់​លាន​ដុល្លារ​អាមេ​រិក ​និង​កំណើន​ប្រាក់​បញ្ញើ​ ២០ ​ភាគ​​រយ​រហូត​ដល់​ ១,៩ ​ពាន់​លាន​ដុល្លារ​មិន​មាន​ការ​បារម្ភ​អំពី​ការ​កើន​ឡើង​​ប្រាក់​កម្ចី​នោះ​ទេ​។

លោក​បញ្ជាក់​ថា​៖ «​ខ្ញុំ​​មិន​មើល​ឃើញ​ពី​ហា​និភ័យ​ណា​មួយ​ដែល​អាច​កើត​មាន​នោះ​ទេ​ ដោយ​សារ​តែ​​វា​ឆ្លើយ​តប​​នឹង​​ការ​កើន​ឡើង​នៃតម្រូវ​ការ​សម្រាប់​ការ​ពង្រីក​ពាណិជ្ជកម្ម។​ ហេតុ​អ្វី​ក៏​ខ្ញុំ​និយាយ​ដូច​នោះ​ ដោយ​សារ​តែ​យើង​ទទួល​បាន​​មូលនិធិ​ ៣​ប្រភេទ [សម្រាប់​ប្រាក់​កម្ចី​] ​ដូច​ជា​ បាន​ពី​ទុន​ផ្ទាល់​ខ្លួន​ ពី​ប្រាក់​បញ្ញើ ​និង​គ្រឹះស្ថាន​ហិរញ្ញ​វត្ថុ​អន្តរ​ជាតិ​ដែល​មាន​កម្ចី​រយៈ​ពេល​យូរ»។

លោក​សង្កត់​ធ្ងន់​ថា​៖ «​ក្រៅ​ពី​​នេះ​ ធនា​គារ​ពាណិជ្ជ​យើង​ភាគច្រើន​​ផ្ដល់​​ប្រភេទ​កម្ចី​ដែល​មាន​ផលិត​ភាព​ [កម្ចី​សម្រាប់​​ពាណិជ្ជ​កម្ម​]​ មិន​មែន​កម្ចី​មិន​បាន​ប្រើ​ប្រាស់​ដែល​មាន​ហានិភ័យ​ខ្ពស់​នោះ​ទេ។ ​ដូច្នេះ​តាម​ពិត​កម្ចី​ដែល​មាន​ផលិត​ភាព​គឺ​ផ្ដល់​អត្ថ​ប្រយោជន៍​ដល់​សេដ្ឋកិច្ច»។

លោក ​ជា ​ចាន់​តូ ​ទេសាភិបាល​​ធនាគារជាតិ​នៃ​កម្ពុជា​បាន​ថ្លែង​ក្នុង​អំឡុង​នៃ​​កិច្ច​ប្រជុំ​ប្រចាំ​ឆមាស​នៅ​ទី​ក្រុង​ភ្នំ​ពេញ​កាល​ពី​ថ្ងៃ​អាទិត្យ​ថា ​ NBC​ តែង​តែ​​សម្លឹង​​មើល​កំណើន​ថ្មី​ៗ​របស់​ឧស្សា​ហ​កម្ម​នេះ​ដើម្បី​បញ្ចៀស​ហា​និភ័យ​។

លោក​​ថ្លែង​ថា​៖ «​ដើម្បី​រក្សា​​បាន​ស្ថិរភាព​សម្រាប់​ការ​អភិវឌ្ឍ​របស់​ប្រ​ព័ន្ធ​ធនាគារ។​ ធនា​គារ​ជាតិ​នៃ​កម្ពុជា​​ជារឿយ​ៗ​កែ​លម្អ​សមត្ថ​ភាព​របស់​បុគ្គ​លិក​ វិធី​សាស្ដ្រ​ត្រួត​ពិនិត្យ​ ច្បាប់ ​និង​ការ​​ពង្រឹង​បទ​ប្បញ្ញត្តិ​ និង​ការ​វិភាគ​លើ​ហានិ​ភ័យ​ដូចជា​​ហានិភ័យ​លើ​កម្ចី​ សន្ទនីយ​ភាព​ ទី​ផ្សារ​ និង​ហានិភ័យ​ប្រតិ​បត្តិ​ការ​ក្នុង​​គោល​​បំណង​​រក្សា​ការ​តាម​ដាន​ និង​ការ​ត្រួត​ពិនិត្យ​អំពី​ផល​ប៉ះពាល់​របស់​ហានិ​ភ័យ​ទាំង​នោះ​លើ​​ប្រាក់​ចំណេញ​ និង​ស្ថាន​ភាព​ទុន​របស់​ធនាគារ​​ទាំង​នោះ​​»៕PB

អត្ថបទគួរចាប់អារម្មណ៍