The Phnom Penh Post Search

Search form

Logo of Phnom Penh Post newspaper Phnom Penh Post - វិនិយោគិន​ឥណ្ឌា អាច​នឹង​វិនិយោគ​បន្ថែម​នៅ​កម្ពុជា




វិនិយោគិន​ឥណ្ឌា អាច​នឹង​វិនិយោគ​បន្ថែម​នៅ​កម្ពុជា

វិនិយោគិន​ឥណ្ឌា អាច​នឹង​វិនិយោគ​បន្ថែម​នៅ​កម្ពុជា

121224_12
លោកនាយករដ្ឋមន្ត្រី ហ៊ុន សែន និងនាយករដ្ឋមន្ត្រីឥណ្ឌា ចាប់ដៃគ្នានាពេលកន្លង Reuters

ភ្នំពេញៈ ប្រទេស​កម្ពុជា​រំពឹង​ថា​នឹង​អាច​ទាក់​ទាញ​ការ​វិនិយោគ​បន្ថែម​ទៀត​មក​ពី​ប្រទេស​ឥណ្ឌា បន្ទាប់​ពី​មាន​កិច្ច​ព្រម​ព្រៀង​ស្តី​ពី​ការ​វិនិយោគ និង​ពាណិជ្ជកម្ម​អាស៊ាន-ឥណ្ឌា​ដែល​ត្រូវ​បាន​ធ្វើ​ឡើង​ដោយ​មេដឹកនាំ​ទាំង​អស់​កាល​ពី​សប្តាហ៍​មុន​នៅ​ទី​ក្រុង​ញូវដែលី។ មន្ត្រី​បាន​ឲ្យ​ដឹង​ថា ប្រទេស​ឥណ្ឌា​នឹង​ក្លាយ​ជា​ទី​ផ្សារ​ដ៏​មាន​សក្តានុពល​មួយ​ទៀត​សម្រាប់​ប្រទេស​កម្ពុជា​។

កិច្ច​ព្រម​ព្រៀង​នេះ​នឹង​ជំរុញ​លើក​ទឹក​ចិត្ត​វិនិយោគិន​ឥណ្ឌា​ឲ្យ​មក​វិនិយោគ​ក្នុង​បណ្តា​ប្រទេស​អាស៊ាន ស្រប​ពេល​ដែល​វា​បាន​ក្លាយ​ជា​ទី​ផ្សារ​ឈាន​មុខ និង​កន្លែង​វិនិយោគ​ថ្មី​របស់​ពួកគេ។

លោក​ឧបនាយក​រដ្ឋ​មន្ត្រី ហោ ណាំ​ហុង រដ្ឋ​មន្ត្រី​ក្រសួង​ការ​បរទេស និង​កិច្ច​សហ​ប្រតិបត្តិការ​អន្តរជាតិ​បាន​ប្រាប់​អ្នក​សារព័ត៌មាន​នៅ​អាកាស​យាន​ដ្ឋាន​ភ្នំពេញ​អន្តរជាតិ​ក្រោយ​ត្រឡប់​មក​ពី​ចូល​រួម​ការ​ប្រារព្ធ​ខួប​ភាព​ជា​ដៃ​គូ​ពិភាក្សា​អាស៊ាន-ឥណ្ឌា​លើក​ទី​២០​ជា​មួយ​នាយក​រដ្ឋ​មន្ត្រី​ថា លោក​នាយក​រដ្ឋ​មន្ត្រី ហ៊ុន សែន បាន​ស្នើ​សុំ​លោក​នាយក​រដ្ឋ​មន្ត្រី​ឥណ្ឌា​ឲ្យ​ពង្រឹង​ពាណិជ្ជកម្ម​និង​ការ​វិនិយោគ​នៅ​ក្នុង​តំបន់​ដើម្បី​កសាង​កិច្ច​សហប្រតិបត្តិការ​ដ៏​រឹង​មាំ​មួយ​ក្នុង​បំណង​ប្រែ​ក្លាយ​ជា​ដៃគូ​យុទ្ធសាស្រ្ត​រវាង​អាស៊ាន-ឥណ្ឌា​។

លោក​បាន​ថ្លែង​ថា៖ ​«មេដឹក​នាំ​ទាំង​អស់​បាន​ស្វាគមន៍​កិច្ច​ព្រម​ព្រៀង​នៃ​ការ​វិនិយោគ និង​ពាណិជ្ជកម្ម​រវាង​អាស៊ាន-ឥណ្ឌា​នេះ។ តាម​ពិត​ការ​ចរចា​អំពី​កិច្ច​ព្រម​ព្រៀង​នេះ​គឺ​បាន​ធ្វើ​ឡើង​ជា​យូរ​មក​ហើយ ប៉ុន្តែ​យើង​ទើប​តែ​សម្រេច​បាន​»​។

លោក​បន្ត​ថា៖ ​«​កិច្ច​ព្រម​ព្រៀង​នេះ​ពិត​ជា​សំខាន់​ណាស់​សម្រាប់​យើង។ នា​ពេល​អនាគត​ឥណ្ឌា​នឹង​បញ្ចូល​ដើម​ទុន​វិនិយោគ​បន្ថែម​ទៀត​នៅ​អាស៊ាន​»​។ លោក​បាន​បន្ថែម​ថា ក្រុម​ហ៊ុន​ធំៗ​ចំនួន​ពីរ​របស់​ឥណ្ឌា​បាន​ជំរាប​លោក​នាយក​រដ្ឋ​មន្ត្រី​រួច​ហើយ​ពី​ការ​វិនិយោគ​រាប់​លាន​ដុល្លារ​នៅ​កម្ពុជា​។

លោក ច័ន្ទ នរ៉ា រដ្ឋ​លេខាធិការ​ក្រសួង​ពាណិជ្ជកម្ម​បាន​ប្រាប់​ថា ឥណ្ឌា​នឹង​ក្លាយ​ជា​ទី​ផ្សារ​ដ៏​មាន​សក្តានុពល​សម្រាប់​កម្ពុជា​នៅ​ពេល​ខាង​មុខ​។ លោក​ថា៖ «​ខ្ញុំ​គិត​ថា យើង​មាន​វិស័យ​ទាក់​ទាញ​ជា​ច្រើន​សម្រាប់​វិនិយោគិន​របស់​ឥណ្ឌា​ឲ្យ​ចូល​មក​រក​ស៊ី​ក្នុង​ស្រុក​យើង​។ ប៉ុន្តែ​អ្វី​ដែល​ជា​កត្តា​សំខាន់​ដែល​ឥណ្ឌា​ចាប់​អារម្មណ៍​ខ្លាំង​នោះ​គឺ​វិស័យ​កែ​ច្នៃ​អាហារ និង​កសិកម្ម។ ឥណ្ឌា​នឹង​ក្លាយ​ជា​ទី​ផ្សារ​ដ៏​មាន​សក្តានុពល​របស់​យើង​នា​ពេល​ខាង​មុខ​ពី​ព្រោះ​ពួកគេ​មាន​តម្រូវ​ការ​ខ្ពស់​»។

ពាណិជ្ជកម្ម​ទ្វេ​ភាគី​រវាង​កម្ពុជា និង​ឥណ្ឌា​ក្នុង​ឆ្នាំ​២០១០​និង​២០១១​មាន​ទឹក​ប្រាក់​ចំនួន​ត្រឹម​តែ​៧១,៩២​លាន​ដុល្លារ​អាមេរិក​ប៉ុណ្ណោះ។ យោង​តាម​តួលេខ​ពី​សភា​ពាណិជ្ជកម្ម​ឥណ្ឌា​ប្រចាំ​នៅ​កម្ពុជា​បាន​ឲ្យ​ដឹង​ថា តម្លៃ​នៃ​ការ​នាំចេញ​របស់​ឥណ្ឌា​ចូល​មក​កម្ពុជា​មាន​រហូត​ដល់​៦៣,៩១​លាន​ដុល្លារ​អាមេរិក ខណៈ​ការ​នាំ​ចេញ​របស់​កម្ពុជា​ទៅ​ឥណ្ឌា​មាន​ត្រឹម​តែ ៨,០១​លាន​ដុល្លារ​អាមេរិក​ប៉ុណ្ណោះ។

ទិន្នន័យ​ពី​ក្រុម​ប្រឹក្សា​អភិវឌ្ឍន៍​កម្ពុជា​(CDC)​បាន​បង្ហាញ​ថា ការ​វិនិយោគ​របស់​ឥណ្ឌា​ដែល​បាន​អនុម័ត​មាន​ចំនួន​ជាង​៣​លាន​ដុល្លារ​អាមេរិក​ក្នុង​រយៈ​ពេល​៧​ខែ​ដំបូង​នៃ​ឆ្នាំ​នេះ​។ ភាគ​ច្រើន​នៃ​ការ​វិនិយោគ​ទាំង​នោះ​គឺ​លើ​វិស័យ​កសិកម្ម ហើយ​ធនាគារ​ឥណ្ឌា​ក៏​បាន​បើក​ដំណើរ​ការ​នៅ​កម្ពុជា​កាល​ពី​ខែ​ឧសភា ឆ្នាំ​២០០៩ ផង​ដែរ។

សម្ព័ន្ធ​សមាគម​សហគ្រាស​ខ្នាត​តូច​និង​មធ្យម​កម្ពុជា​(FASMEC) ​កាល​ពី​ដើម​ខែ​នេះ​បាន​ចុះ​ហត្ថលេខា​លើ​អនុស្សរណៈ​យោគ​យល់​គ្នា​មួយ​ជាមួយ​សហព័ន្ធ​ឧស្សាហកម្ម​ឥណ្ឌា(CII)​ដើម្បី​ពង្រឹង​កិច្ច​សហ​ប្រតិបត្តិការ​លើ​ការ​បណ្តុះ​បណ្តាល​ធន​ធាន​មនុស្ស និង​ការ​គ្រប់​គ្រង​គុណភាព​នៅ​កម្ពុជា​។

លោក​ហោ ណាំហុង​បាន​ថ្លែង​ឲ្យ​ដឹង​ទៀត​ថា នៅ​ដំណាច់​ឆ្នាំ​២០១១ ពាណិជ្ជកម្ម​រវាង​អាស៊ាន-ឥណ្ឌា​មាន​ចំនួន​ប្រហែល​៧៩​ពាន់​លាន​ដុល្លារ​អាមេរិក​ហើយ​គោលដៅ​គឺ​ធ្វើ​យ៉ាង​ណា​ឲ្យ​ឈាន​ឡើង​ដល់​១០០​ពាន់​លាន​ដុល្លារ​អាមេរិក​ក្នុង​ឆ្នាំ​២០១៥ និង​២០០​ពាន់​លាន​ដុល្លារ នៅ​ឆ្នាំ​២០២២៕ CC

អត្ថបទគួរចាប់អារម្មណ៍