The Phnom Penh Post Search

Search form




Logo of Phnom Penh Post newspaper Phnom Penh Post - វិនិយោគ​$២០០​លាន​លើ​កសិដ្ឋាន​ជ្រូក

វិនិយោគ​$២០០​លាន​លើ​កសិដ្ឋាន​ជ្រូក

វិនិយោគ​$២០០​លាន​លើ​កសិដ្ឋាន​ជ្រូក

131223_12a
ពូជជ្រូកយ៉កសៀដែលក្រុមហ៊ុនម៉ុង ឫទ្ធី បាននាំចូលពីប្រទេសអង់គ្លេសនាពេលកន្លងមក ហេង ជីវ័ន

ភ្នំពេញៈ លោក ម៉ុង ឫទ្ធី ដែល​ជា​សេដ្ឋី​មួយ​រូប និង​ជា​សមាជិក​ព្រឹទ្ធសភា​គណបក្ស​ប្រជាជន​កម្ពុជា​បាន​សហការ​ជាមួយ ក្រុមហ៊ុន​ចិន​គ្រប់គ្រង​ដោយ​រដ្ឋ​មកពី​ខេត្ត​គ័ងចូវ វិនិយោគ​រួម​គ្នា​នូវ​ទឹកប្រាក់​២០០ លាន​ដុល្លារ​អាមេរិក​ក្នុង​ការ​ពង្រីក​កសិដ្ឋាន​ចិញ្ចឹម​ជ្រូក​នៅ កម្ពុជា​ដើម្បី​ឆ្លើយតប​នឹង​តម្រូវការ​ទីផ្សារ និង​ទប់ស្កាត់​ការ​នាំ​ចូល​ដ៏ច្រើន​សន្ធឹកសន្ធាប់​ពី​ប្រទេស​ជិតខាង​។

លោក ម៉ុង ឫទ្ធី បាន​ប្រាប់​ភ្នំពេញ​ប៉ុស្ដិ៍​កាលពី​ថ្ងៃ​អាទិត្យ​ថា លោក​បាន​ចុះ​ហត្ថលេខា​រួច​ហើយ​លើ​អនុស្សរណៈ​នៃ​ការ​យោគយល់​គ្នា (MoU)​ជាមួយ​ក្រុមហ៊ុន​ចិន​កាលពី​ថ្ងៃ​ព្រហស្បតិ៍។ លោក​បន្ត​ថា​៖ «​យើង​បាន​ចុះ​ហត្ថលេខា​ក្នុង​ការវិនិយោគ​រួម​លើ​ការ​ពង្រីក​ការ ចិញ្ចឹម​ជ្រូក​នៅ​កម្ពុជា​។ ពួកគេ​នឹង​វិនិយោគ​ទឹកប្រាក់ ២០០ លាន​ដុល្លារ​ជាមួយ​យើង ប៉ុន្តែ​គេ​ផ្ដល់​ប្រាក់​ដល់​យើង​ជា​ជំហានៗ​។ គម្រោង​របស់​យើង​នេះ​នឹង​ចាប់ផ្ដើម​នៅ​ដើម​ឆ្នាំ​២០១៤​»។ លោក​និយាយ​ថា ស្ថិត​ក្រោម​កិច្ចព្រមព្រៀង​នេះ​លោក​គ្រោង​នឹង​ចិញ្ចឹម​ជ្រូក​យ៉ាង ហោច​ណាស់​៣​សែន​ក្បាល​ក្នុង​មួយ​ឆ្នាំ​។ លោក​លើក​ឡើង​ថា​៖ «​ដោយ​ទទួល​បាន​សមិទ្ធផល​នេះ យើង​ត្រូវការ​ពេលវេលា​ប្រហែល​៥​ឆ្នាំ​ដោយសារ​តែ​យើង​ចាំបាច់ ត្រូវការ​ពង្រីក​ផ្ទៃដី​កសិដ្ឋាន​របស់​យើង​បន្ថែម​ទៀត​»។

លោក ស្រ៊ុន ពៅ ប្រធាន​សមាគម​អ្នក​ចិញ្ចឹម​ជ្រូក​កម្ពុជា ស្វាគមន៍​ចំពោះ​ការ​វិនិយោគ​នេះ​សម្រាប់​ការ​រួម​ចំណែក​ដល់​ការ​នាំ​ចូល ផង​ដែរ​។ លោក​លើក​ឡើង​ថា​៖ «កសិកម្ម​ចិញ្ចឹមជ្រូក​នៅក្នុង​ប្រទេស​របស់​យើង​គឺ​នៅ​មាន​ទំហំ​ធំ ប៉ុន្តែ​បញ្ហា​គឺ​ការ​ផ្ដល់​ប្រាក់​សម្រាប់​ការ​ចិញ្ចឹម​។ បើ​ពួកគេ​មាន​ប្រាក់​ច្រើន​សម្រាប់​ការ​វិនិយោគ​នេះ នោះ​គឺជា​ការ​ល្អ​ប្រសើរ​ក្នុង​ការ​ជួយ​ដល់​ឧស្សាហកម្ម​ចិញ្ចឹម​ជ្រូក របស់​យើង​ដោយសារ​តែ​ជា​ធម្មតា​យើង​នាំ​ចូល​មកពី​ប្រទេស​ជិត​ខាង ដើម្បី​បំពេញ​តម្រូវការ»។ យោងតាម ស្រ៊ុន ពៅ រដ្ឋាភិបាល​បាន​បង្កើត​កូតា​សម្រាប់​ការ​នាំ​ចូល​ជ្រូក​ប្រហែល​៨០០ ក្បាល​ក្នុង​មួយ​ថ្ងៃ​។ លោក​បន្ត​ថា កម្ពុជា​ប្រើ​ជ្រូក​ប្រហែល ៤ ០០០​ក្បាល​ក្នុង​មួយ​ថ្ងៃ​ទូទាំង​ប្រទេស​។

បច្ចុប្បន្ន លោក ម៉ុង ឫទ្ធី បាន​គ្រប់គ្រង​ក្រុមហ៊ុន M's PIG ACMC (CAMBODIA) CO., LTD(M's Pig ACMC) ដែល​ជា​ការ​វិនិយោគ​រួម​គ្នា​ជា​ទឹកប្រាក់​៥​លាន​ដុល្លារ​រវាង​ក្រុមហ៊ុន Mong Reththy Group Co., Ltd គ្រប់គ្រង​ភាគហ៊ុន​៩១​ភាគរយ ACMC Limited (United Kingdom) មាន​ភាគហ៊ុន​៩​ភាគរយ។ លោក​ម៉ុង ឫទ្ធី ទិញ និង​នាំ​ចូល​ជ្រូក​យ៉កសៀ​ពី​ប្រទេស​អង់គ្លេស​កាលពី​ឆ្នាំ​២០០៩។

យោងតាម​ទិន្នន័យ​ពី USAID ឆ្នាំ​២០០៩ កម្ពុជា​នាំ​ចូល​ជ្រូក​ពី​ថៃ​តាម​ការ​ប៉ាន់​ប្រមាណ​មាន ២ ០០០​ក្បាល​កាលពី​ឆ្នាំ​២០០៧ ដល់​៣០០ ០០០ ក្បាល​កាលពី​ឆ្នាំ​២០០៨ និង​ឆ្នាំ​២០០៩។ ការ​នាំ​ចូល​នេះ​តាម​ការ​ប៉ាន់​ប្រមាណ​ចំណាយ​ទឹកប្រាក់​៣៥ លាន​ដុល្លារ​។ ការ​ប៉ាន់ប្រមាណ​នេះ​មិន​រាប់​បញ្ចូល​ការ​នាំ​ចូល​មិន​បាន​ត្រួតពិនិត្យ ពី​ប្រទេស​ថៃ និង​វៀតណាម​ទេ​។

លោក ម៉ុង ឫទ្ធី និយាយ​ថា លោក​នឹង​សាងសង់​កសិដ្ឋាន​ចិញ្ចឹម​ជ្រូក​ថ្មី​មួយ​មាន​ចម្ងាយ​ពី​ទីតាំង ចាស់​១០​គីឡូម៉ែត្រ​នៅ​ស្រុក​កំពង់សិលា ខេត្ត​ព្រះសីហនុ នៅលើ​ផ្ទៃដី​៥០​ហិកតា​។ លោក​លើក​ឡើង​ថា ការ​សាងសង់​ការដ្ឋាន​នឹង​ត្រូវ​ធ្វើ​ឡើង​កាន់តែ​ច្រើន​ដើម្បី​សម្រេច បាន​ទិសដៅ​នេះ​។ លោក​បន្ថែម​ថា​៖ «​យើង​កំណត់​ទិសដៅ​ដំបូង​ក្នុង​ការ​ផ្គត់ផ្គង់​តម្រូវការ​ក្នុង​ស្រុក ហើយ​បន្ទាប់មក​យើង​នឹង​ពិចារណា​សម្រាប់​ការ​នាំចេញ​»​។

លោក ស្រ៊ុន ពៅ បាន​និយាយ​ថា ការ​វិនិយោគ​នេះ​នៅ​តែ​មាន​កម្រិត​ក្នុង​ការ​ឆ្លើយតប​ទៅ​នឹង​តម្រូវការ ដែល​កំពុង​កើនឡើង​នេះ ។ លោក​បន្ត​ថា​៖ «​ខ្ញុំ​គិត​ថា ការ​វិនិយោគ​នេះ​មិន​អាច​ដោះស្រាយ​តម្រូវការ​បាន​១០០​ភាគរយ នោះ​ទេ​នៅក្នុង​ឧស្សាហកម្ម​នេះ​យើង​នៅ​តែ​គាំទ្រ​ដល់​កសិករ​ក្នុង​ស្រុក ឲ្យ​បង្កើន​ការ​ចិញ្ចឹម​ជ្រូក​កាន់តែ​ច្រើន​ឡើង​ថែម​ទៀត​»។

កម្ពុជា ប្រើប្រាស់​ជ្រូក​តែ​១​លាន​ក្បាល​ក្នុង​មួយ​ឆ្នាំ​ឬ មនុស្ស​ម្នាក់​បរិភោគ​សាច់ជ្រូក​ចន្លោះ​ពី​៥​ទៅ​៧​គីឡូក្រាម ក្នុង​មួយ​ឆ្នាំ ប៉ុន្តែ​តាមពិត​នៅពេល​ផលិតផល​ក្នុង​ស្រុក​សរុប និង​កំណើន​សេដ្ឋកិច្ច​ពីរ​ខ្ទង់ មនុស្ស​ម្នាក់ៗ​ត្រូវការ​សាច់ជ្រូក​១៥​គីឡូក្រាម​ក្នុង​មួយ​ឆ្នាំ ឬ​២,១​លាន​ជ្រូក​ក្នុង​មួយ​ឆ្នាំ​។ តាម​ការ​អង្កេត​របស់​ក្រុមហ៊ុន M's PIG ACMC (CAMBODIA) CO., LTD ដើម្បី​ផ្គត់ផ្គង់​ជ្រូក​ឲ្យ​បាន​២,១​លាន​ក្បាល​ក្នុង​មួយ ឆ្នាំ កម្ពុជា​ចាំបាច់​ចិញ្ចឹម​ជ្រូក​ញី​យ៉ាង​ហោច​ណាស់​១៥០ ០០០​ក្បាល​ក្នុង​ពេល​បច្ចុប្បន្ន​នេះ​៕PB

អត្ថបទគួរចាប់អារម្មណ៍