ក្រុងប៉េកាំងៈ រោងភាពយន្តគ្មានមនុស្ស ការធ្វើដំណើរតាមរថភ្លើងល្បឿនលឿនបានលុបចោល ទីតាំងទេសចរណ៍បានបិទទ្វារ ខេត្តទាំងមូលបិទទ្វារ ដែលទាំងអស់នេះគឺជាវិធានការវិសាមញ្ញដែលបានធ្វើឡើងដោយប្រទេស ចិន ដើម្បីគ្រប់គ្រងវីរុសកូរ៉ូណា ដែលបង្កឲ្យមនុស្សស្លាប់ និងគំរាមកំហែងធ្វើឲ្យមានផលប៉ះពាល់ដល់សេដ្ឋកិច្ចដែលងាយរងគ្រោះរួចទៅហើយ។
ដោយសារជាប្រទេសមានសេដ្ឋកិច្ចលំដាប់ទី ២ របស់ពិភពលោកមួយដែលពឹងផ្អែកខ្លាំងលើអ្នកប្រើប្រាស់ក្នុងប្រទេស ដើម្បីជំរុញកំណើនសេដ្ឋកិច្ច វីរុសនេះបានវាយប្រហារក្នុងពេលវេលាដ៏អាក្រក់បំផុត ដោយប្រជាជនច្រើនលាននាក់បានធ្វើដំណើរទូទាំងប្រទេសនេះសម្រាប់ថ្ងៃឈប់សម្រាកបុណ្យចូលឆ្នាំចិន។
ផលិតផលក្នុងស្រុកសរុបបានកើនឡើងកាលពីឆ្នាំមុន ដែលជាល្បឿនទាបបំផុតក្នុងរយៈពេល ៣ ទសវត្សរ៍ ដោយបានរងផលប៉ះពាល់ដោយតម្រូវការក្នុងស្រុកខ្សោយ និងសង្គ្រាមពាណិជ្ជកម្មជាមួយអាមេរិក។
ប៉ុន្តែតួលេខក្នុងរយៈពេល ៣ ខែចុងក្រោយនេះ បានចង្អុលបង្ហាញឆ្ពោះទៅស្ថិរភាពមួយចំនួន ហើយកិច្ចព្រមព្រៀងពាណិជ្ជកម្មដែលបានចុះហត្ថលេខានៅពេលថ្មីៗជាមួយអាមេរិកបានផ្ដល់ក្ដីសង្ឃឹមបន្ថែមទៀត។
ប៉ុន្តែលោក Julian Evans-Pritchard បម្រើការងារនៅក្រុមហ៊ុន Capital Economics បានឲ្យដឹងថា មិនមាន «ការសង្ស័យណាមួយ» នោះទេថា ការផ្ទុះឡើងនៃវីរុសកូរ៉ូណាដែលបានសម្លាប់មនុស្សជាង ១០០ នាក់នោះនឹងផ្ដល់ការវាយប្រហារថ្មីមួយដែលព្រមានថា ការដឹកជញ្ជូន និងការប្រើប្រាស់កាន់តែទូលំទូលាយនឹងត្រូវរងផលប៉ះពាល់ដែលរួមទាំងការបរិភោគ និងការលក់រាយផងដែរ។
ថ្ងៃឈប់សម្រាកត្រូវបានបន្តរយៈពេល ៣ ថ្ងៃ ដែលមានន័យថា ប្រទេសនេះអាចត្រឡប់ទៅធ្វើការងារវិញយឺតពេលគឺចាប់ពីថ្ងៃចន្ទទៅ។
ក្រុមហ៊ុនមួយចំនួនបានប្រាប់បុគ្គលិកឲ្យធ្វើការងារនៅផ្ទះ ឬពីចម្ងាយដែលរួមទាំង Tencent ជាក្រុមហ៊ុនបច្ចេកវិទ្យាឈានមុខគេដែលបានប្រាប់បុគ្គលិកឲ្យធ្វើការងារនៅផ្ទះរហូតដល់ថ្ងៃទី ១០ ខែកុម្ភៈ។
ក្រុមហ៊ុនភោជនីយដ្ឋាន Haidilao ដ៏ពេញនិយមនឹងបិទទ្វារហាងទាំងអស់របស់ខ្លួននៅក្នុងប្រទេសចិនរហូតដល់ចុងខែនេះ។
រដ្ឋាភិបាលបានលុបចោលដំណើរទេសចរណ៍ជាក្រុមក្នុងស្រុក និងអន្តរជាតិ ជាវិធានការមួយដែលអាចមានផលប៉ះពាល់ធ្ងន់ធ្ងរដល់វិស័យទេសចរណ៍ ដែលជាឧស្សាហកម្មដ៏សំខាន់មានទំហំ ១១ ភាគរយ នៃផលិតផលក្នុងស្រុកសរុបរបស់ប្រទេសនេះ។
កាលពីថ្ងៃអង្គារ អាជ្ញាធរបានណែនាំថា អ្នកដំណើរជាជនជាតិចិនទាំងអស់ត្រូវពន្យារពេលការធ្វើដំណើរទៅបរទេសរបស់ពួកគេ «ដើម្បីការពារសុខភាព និងសុវត្ថិភាពរបស់ប្រជាជនចិន និងជនបរទេស» ដែលជាព័ត៌មានអាក្រក់សម្រាប់ឧស្សាហកម្មអាកាសចរណ៍របស់ប្រទេសនេះ។
ការគំរាមកំហែងចំពោះឧស្សាហកម្ម
ការធ្វើដំណើរតាមផ្លូវដែក និងផ្លូវអាកាសនៅថ្ងៃទី ១ នៃបុណ្យចូលឆ្នាំចិនបានធ្លាក់ចុះទាំង ២ ជាង ៤០ ភាគរយ ធៀបនឹងឆ្នាំមុន។ នេះបើតាមអនុរដ្ឋមន្ត្រីក្រសួងដឹកជញ្ជូន។
រថយន្តល្បឿនលឿនរាប់រយគ្រឿងដែលជាមានប្រជាប្រិយភាពក្នុងការធ្វើដំណើរក្នុងប្រទេសដ៏ធំមួយនេះត្រូវបានផ្អាករហូតដល់ថ្ងៃទី ៩ ខែកុម្ភៈ។
វិស័យដែលកំពុងលូតលាស់មួយផ្សេងទៀតគឺឧស្សាហកម្មភាពយន្តក៏រងគ្រោះផងដែរ។
ប្រាក់ចំណូលពីការលក់សំបុត្រភាពយន្តរបស់ប្រទេសចិនសម្រាប់ថ្ងៃបុណ្យចូលឆ្នាំចិនមានចំនួនតែ ១ ភាគ ១០ នៃចំណូលកាលពីឆ្នាំមុនប៉ុណ្ណោះ ខណៈដែលមនុស្សគេចវេះចេញពីកន្លែងដែលមានមនុស្សច្រើន ហើយភាពយន្តល្អៗចំនួន ៧ ដែលគ្រោងនឹងចាក់បញ្ចាំងក្នុងអំឡុងពិធីបុណ្យនេះត្រូវបានលុបចោលវិញ។
ក្រុមអ្នកវិភាគមកពីក្រុមហ៊ុន S&P ឲ្យដឹងថា ការប្រើប្រាស់បានចូលរួមចំណែកប្រហែល ៣,៥ ពិន្ទុភាគរយ នៃអត្រាកំណើនសេដ្ឋកិច្ចរបស់ចិនក្នុងឆ្នាំ ២០១៩ និងបានព្រមានថា ការធ្លាក់ចុះការប្រើប្រាស់ ១០ ភាគរយ នឹងប៉ះពាល់ដល់ផលិតផលក្នុងស្រុកសរុបចំនួន ១,២ ពិន្ទុភាគរយ។
លោក Stephen Innes មកពីក្រុមហ៊ុន AxiCorp ថ្លែងថា «ទំហំផលប៉ះពាល់ នឹងមើលឃើញកាន់តែច្បាស់» បន្ទាប់ពីថ្ងៃបុណ្យចប់។
ការបិទសេវាកម្មទាំងអស់នេះបានធ្វើឡើងនៅខេត្តហ៊ូប៉ី ជាចំណុចដែលមានការរីករាលដាល់របស់វីរុស ជាទីដែលស្ថានីយរថភ្លើងត្រូវបានបិទ ព្រឹត្តិការណ៍នានាត្រូវបានលុបចោល ហើយរោងល្ខោន បណ្ណាល័យ និងការ៉ាអូខេ និងបារ៍ត្រូវបានបិទក្នុងទីតាំងមួយចំនួន។
ប៉ុន្តែក្រៅពីការប្រើប្រាស់ និងការដឹកជញ្ជូន ការបិទនេះនឹងមានផលប៉ះពាល់រយៈពេលវែងដល់ឧស្សាហកម្ម។
ទីក្រុងវូហានដែលជារដ្ឋធានីរបស់ខេត្តហ៊ូប៉ី និងជាមជ្ឈមណ្ឌលផលិតកម្មដ៏ធំមួយ និងមានប្រជាជនចំនួន ១១ លាននាក់ដែលផលិតដែកថែប និងរថយន្តនោះត្រូវបានដាក់ឲ្យស្ថិតនៅក្រោមចត្តាឡឺស័កចាប់ពីថ្ងៃព្រហស្បតិ៍សប្តាហ៍មុនមក។
លោក Raymond Yeung ប្រធានសេដ្ឋវិទូនៅក្រុមហ៊ុន ANZ Research បានថ្លែងថា៖ «ទីក្រុងវូហានគឺជាមជ្ឈមណ្ឌល និងមណ្ឌលផលិតកម្មសំខាន់មួយស្ថិតនៅភាគកណ្តាលប្រទេសចិន។ ប្រសិនបើការបិទនេះបន្តធ្វើឡើងបន្ទាប់ពីបុណ្យចូលឆ្នាំចិន វានឹងប៉ះពាល់ដល់ផលិតកម្មឧស្សាហកម្មដែលជាកត្តាមួយនៃកត្តាកំណើនសេដ្ឋកិច្ចដ៏សំខាន់នានា»។
ចង្វាក់ផលិតកម្មដ៏ស្មុគស្មាញ
យោងតាមក្រុមហ៊ុន S&P ទីក្រុងវូហានមានចំណែកប្រហែល ១,៦ ភាគរយ នៃផលិតផលក្នុងស្រុកសរុបរបស់ប្រទេសចិន។
ហើយបើយោងតាមសភាពាណិជ្ជកម្មជប៉ុនក្នុងទីក្រុងវូហាន ក្រុមហ៊ុនជប៉ុនប្រហែល ១៦០ មានការិយាល័យក្នុងទីក្រុងនេះ។
ក្រុមហ៊ុនផលិតរថយន្តបរទេសមួយចំនួនរួមទាំងក្រុមហ៊ុន General Motors និង Renault ផលិតរថយន្តក្នុងទីក្រុងនេះតាមរយៈការបណ្តាក់ទុនរួមគ្នាជាមួយក្រុមហ៊ុនចិន។
តម្លៃទិន្នផលនៃគ្រឿងបន្លាស់រថយន្ត និងរថយន្តក្នុងទីក្រុងវូហានមានប្រហែល ៤០០ ពាន់លានយន់ (៥៧ ពាន់លានដុល្លារ)។ នេះបើយោងតាមសេចក្តីរាយការណ៍របស់កាសែត Changliang Daily៕ LA