.jpg)
សកម្មភាពលើកកុងតឺន័រដាក់លើរថយន្តនៅកំពង់ផែភ្នំពេញ។ ហេង ជីវ័ន
ភ្នំពេញៈ បើទោះបីសកម្មភាពនៃការដឹកជញ្ជូនផលិតផលកសិកម្មសម្រាប់នាំចេញក្នុងរយៈពេល ៦ ខែកន្លងមកបានកើនឡើងច្រើនក៏ដោយ ប៉ុន្តែសកម្មភាពជារួមនៅក្នុងវិស័យដឹកជញ្ជូនទំនិញនៅកម្ពុជាមិនទាន់មានអ្វីប្រែប្រួលគួរឲ្យកត់សម្គាល់នោះទេ។ នេះបើយោងតាមអ្នកនៅក្នុងវិស័យដឹកជញ្ជូនកម្ពុជា។
ការបិទព្រំដែន និងការធ្លាក់ចុះយ៉ាងគំហុកការបញ្ជាទិញផលិតផលវាយនភណ្ឌ និងកាត់ដេរពីកម្ពុជាដែលបណ្តាលមកពីជំងឺកូវីដ១៩ បានធ្វើឲ្យវិស័យដឹកជញ្ជូនត្រូវជាប់គាំងស្ទើរទាំងស្រុងនាពេលកន្លងមក។
លោក ស៊ិន ចន្ធី ប្រធានសមាគមភ័ស្តុភារកម្មកម្ពុជា (CLA) បានប្រាប់ភ្នំពេញប៉ុស្តិ៍កាលពីថ្ងៃព្រហស្បតិ៍ថា ទោះបីការនាំចេញផលិតផលនៅក្នុងវិស័យកសិកម្ម (អង្ករ) នៅពេលនេះកំពុងមានកំណើនខ្ពស់ក៏ដោយ ប៉ុន្តែជារួមសកម្មភាពដឹកជញ្ជូនទំនិញនៅពេលនេះគឺបានកើនឡើងតិចតួចប៉ុណ្ណោះ បើធៀបនឹងក្នុងអំឡុងខែមីនា មេសា និងឧសភាដោយក្នុងអំឡុងពេលនោះការដឹកជញ្ជូនទំនិញស្ទើរតែធ្លាក់អស់ គ្មានតែម្តង។
លោកបន្តថា ការបន្តភាពស្ងប់ស្ងាត់នាពេលនេះអាចបណ្តាលមកពីការបញ្ជាទិញទំនិញរបស់ អ្នកវិនិយោគនៅបរទេសមិនទាន់កម្រើកឡើងវិញ ហេតុនេះសកម្មភាពដឹកជញ្ជូនទំនិញចេញ និងការដឹកវត្ថុធាតុដើមយកមកផលិតនៅកម្ពុជា ក៏ត្រូវធ្លាក់ចុះទៅតាមនោះដែរ។
លោកនិយាយថា៖ «បើយើងនិយាយពីបរិមាណនៃការដឹកជញ្ជូននាពេលនេះ គឺស្ថិតក្នុងរង្វង់ពី ៣០-៤០ ភាគរយបើធៀបនឹងមុនពេលមានការផ្ទុះជំងឺកូវីដ១៩។ សកម្មភាពដឹកជញ្ជូនកើនឡើងតិចតួចបំផុត បើធៀបនឹង ៣-៤ ខែមុន»។
ជាមួយភាពមិនច្បាស់លាស់ពីការបន្តរីករាលដាលជំងឺកូវីដ១៩ លោក ចន្ធី បានបញ្ជាក់ថា វិស័យនេះនៅតែមានបញ្ហាប្រឈមច្រើន ប្រសិនបើមិនទាន់មានការអះអាងពីអ្នកជំនាញថា ជំងឺនេះអាចគ្រប់គ្រង ឬព្យាបាលបានទាំងស្រុង។
យោងតាមលោក ស៊ិន ចន្ធី បច្ចុប្បន្នការដឹកជញ្ជូនទំនិញរវាងកម្ពុជា និងបរទេស គឺតាមផ្លូវអាកាសស្ទើរមិនមានសោះតែម្តង ខណៈការដឹកតាមផ្លូវទឹក និងផ្លូវគោកមានតិចតួច។
លោក ឃុត សារឿន សហស្ថាបនិក និងជានាយកប្រតិបត្តិក្រុមហ៊ុនដឹកជញ្ជូន SHA Transport Express Co., Ltd បាននិយាយថា បើទោះបីក្តីបារម្ភពីការឆ្លងរាលដាលជំងឺកូវីដត្រូវបានកាត់បន្ថយ ហើយប្រទេសមួយចំនួនបានចាប់ផ្តើមបើកព្រំដែនសម្រាប់ការដឹកជញ្ជូនទំនិញវិញខ្លះមកហើយក៏ដោយ ក៏វិស័យដឹកជញ្ជូនទំនិញនៅកម្ពុជានៅមិនទាន់មានសញ្ញាកើនឡើងគួរឲ្យកត់សម្គាល់ទេ។ លោកបន្ថែមទៀតថា ស្ថានភាពបែបនេះធ្វើឲ្យប៉ះពាល់យ៉ាងខ្លាំងសម្រាប់អ្នកនៅក្នុងវិស័យដឹកជញ្ជូន។
លោកអះអាងថា៖ «ទោះជាពេលនេះស្ថានភាពជំងឺកូវីដមានភាពល្អប្រសើរ ប៉ុន្តែការដឹកជញ្ជូនទំនិញនៅក្រុមហ៊ុនរបស់ខ្ញុំមិនទាន់មានកំណើនទេ ដោយបរិមាណនៃការដឹកគឺនៅតែទាបដដែលបើធៀបនឹងពេលជំងឺកូវីដផ្ទុះឡើងដំបូង»។
យោងតាមក្រសួងពាណិជ្ជកម្ម ការចុះកិច្ចព្រមព្រៀងពាណិជ្ជកម្មសេរីរវាងកម្ពុជាជាមួយប្រទេសចិនជាផ្លូវការអាចនឹងចាប់ផ្តើមនៅចុងឆ្នាំនេះ ខណៈអ្នកជំនាញនិយាយថា កិច្ចព្រមព្រៀងនេះនឹងជួយរុញច្រានឲ្យសកម្មភាពសេដ្ឋកិច្ច និងការដឹកជញ្ជូនទំនិញនៅកម្ពុជាមានកំណើនខ្ពស់ខ្លាំង ព្រោះចិនជាទីផ្សារធំមានប្រជាជនច្រើន។
លោក លឹម ហេង អនុប្រធានសភាពាណិជ្ជកម្មកម្ពុជាកាលពីពេលថ្មីៗនេះធ្លាប់បានប្រាប់ភ្នំពេញប៉ុស្តិ៍ថា សកម្មភាពការធ្វើពាណិជ្ជកម្ម និងដឹកជញ្ជូនទំនិញដែលធ្លាក់ចុះដោយសារទទួលរងផលប៉ះពាល់ពីការរីករាលដាលនៃជំងឺកូវីដ១៩ បានចាប់ផ្តើមស្ទុះឡើងវិញជាបណ្តើរៗហើយ ដោយការបញ្ជាទិញទំនិញ និងការនាំចេញមានសញ្ញាវិជ្ជមានជាបន្តបន្ទាប់។
លោកបន្តថា៖ «កំណើននៃការនាំចេញអង្ករ មិនត្រឹមតែរួមចំណែកដល់កំណើនសេដ្ឋកិច្ចប៉ុណ្ណោះទេ តែវានឹងជួយដល់ផ្នែកពាក់ព័ន្ធដូចជា កសិករអ្នកដាំដុះ និងក្រុមហ៊ុនដឹកជញ្ជូនជាដើម»៕ LA
